CAB/ CAA DO TUR HIAN MIHRING NIH A TAWK!

CAB/ CAA avang­in kan ram innghahna lung­phum (Constitution) a nghing a, secular democracy ram kan nihna sadai ṭhiah­in a awm mek a ni. Chumi avang chuan mi maktaduai tel teh meuhin an tuar ṭan a, an la tuar zel dawn bawk a ni (Muslim leh Northeast a indi­genoues group te an ni ber). 

Chuvang chuan a ram pumin kan phu suau suau a nih ber hi - kan thin a rim a, kan mangang a, kan ram hmakhua kan ngaihtuah a, kan thàu-ah min man a ni. 

Chutih laia...

"Kan ram leh hnam, kan sakhua, kan area min effect loh chuan a pawi lo, keini chu kan him" tih ngaihdan leh thlirna bak nei thei miah lote nen hi chuan sawiho tur tam tak kan nei lovin ka hre ta hial mai. Ka hre dik bik a, ka ṭha bik ka ti lo, mahse khawvel dang daihah kan cheng niin ka hria. Kan inkarah lei khi chat awm hi a zau lutuk a ni ber awm e.

India democracy leh secularism hum­him lam thu a ni a, rorelna dik lo dodal thu a ni zawk. Chak lo zawk leh rahbeha awmte lama ṭan thu a ni bawk. Kan ram/ hnam himna hi a pawimawh teh meuh mai, mahse chu tarmit (chutah pawh a thlir zim bik chi) chauh chu em ni mi tam tak hian kan lo thlan tak? 

A nihna takah chuan he dan leh hetiang thil dodal tur hian Mizo nih emaw Kristian nih kher pawh a ngaiin ka hre lo 'mihring' nih hi a tawkin ka hria (mimal tak chuan ka Kristianna hriatthiam dan avanga hetiang thlirna hi nei chu ka ni deuh ber tho a). 

Mihring nih hi a tawk, mihring nih! Party politics ruihchilh avang te, hnam bil rilru zim mi avang te, kan sawkhaw bilte chauh ngaihtuah phak rilru avangte hian lainatna leh hmangaihna kan neih ve te, dikna kan duhna te hian a va

huam zim ta si em! Kan va han inren hlek hlek ngai ve le.

Thla hnih vel kal ta, August/September thla vel (CAB hma) pawhin hemi chungchang hi news report-ah hmuh tur chu a awm tawh, mahse tunah chuan Muslim ho tan a nih tak ber hi. Maktaduai tel em ni kan khung khawm dawn? This is not my India! 

Hetiang thil a thlen­na ram hi ka 'chhawrpial rûn' a ni ve thei ngang lova, 'Chhawrpial Rûn' ṭha zawk chakin kan rum a ni e. 

- RCA Jongte, Princeton Theological Seminary, USA