ENGTIN AWM ZEL ANG MAW MIZORAM HI?

Citizenship Amendment Bill, 2019 chu Lok Sabha leh Rajya Sabha-ah pass a nih hnu in President of India chuan a lo pawmpui ta a, tunah chuan Citizenship Act, 2019 (CAA) a lo ni ta a. Dodalna nasa tak karah passed a nih ang bawkin pass a nih hnuah pawh duhlohna lantirna chuan India ram hmun hrang hrangah chanchin thar a la luah khat reng a, India ram mai ni lo, United Nation thlengin hmun a luah chho mek bawk. 

CAA, 2019 hian min huam ve dawn loh vang hian lawma lo au hluah hluah chi a ni reng em tih hi ngaihtuah tham tak a ni. Kawng hrang hranga min nghawng theih dan lo thlir ta ila: 

1.  CAA, 2019 hi ngun taka thlir chuan Hindu sakhua vulh­lenna tur a nihzia hi kan hrethiam turah ngai ila,  India ram ṭhenawm Bangladesh, Pakistan leh Afghanistan-ah te hian Kristian te, Sikh, Budhist, etc te ai hian Hindu te hi an tam lawr lak a, hengte tana India rama citizenship awlsam taka an lo neihna tur hmanrua a ni. Tin, ṭhenawm ramah hian sakhua vanga tihduhdah tawrhna thu hi kan hre ngai lo khawp mai. CAA vang hian Bangladesh Foreign Minister pawh a thinrim hle a, Bangladesh-ah sakhua vanga tawrhna a thlen ngai loh thu tlang takin a lo sawi rap tawh bawk. Heta lang chiang ta ber chu Religious persecution hi kan ṭhenawm ramah te hian a thleng ngai lo a tih theih ang. Mahse Hindutva lalram dinna turah chuan Hindu sentiment an chawk tho mek si a, chhuanlam atan a lo ṭha ber a ni chék a ni ang e. 

2. Kristiante hi a tuartu tur kan ni leh ang. India ramah hian Hindu an hrân nasat poh leh Kristiante hian an tuar nasa ṭhin tih hi kan hre vek ang. Religious percentage-ah kan hniam em em a, ṭhenawm ram ni lovin India ram ngeiah hian persecution hi kan tawk ṭhin zawk a nih hi! Chuvangin, ṭhenawm rama Hindu ho an lo luh belh ruih ruih chuan kan sakhua hian a tuar nasa zel lo ang tih hi sawi a har khawp mai. News tam taka kan lo hmuh ṭhin angin kum 2021-ah chuan Hindu lal ram dinchhuah an tum thu kan hre ṭheuh bawk ang. 

3. Mizoramah ILP nei leh nei lo an lo luh belh ruih ruih ang. Assam-ah tun hnai lawka NRC an hman vang khan ILP diltu pawh an tlahniam rawih rawih a, mahse CAA chuan NRC hi awmze nei lovah a lo chhuah leh ta si a. December ni 31, 2014 hma lama lo lut tawhte kha chuan Citizenship an entitle thei tawh dawn si a,  hei hian NRC chu awmze nei loah a lo chhuah leh ta a ni. Kan ramah hian ILP hi enforcement ni lovin NGO te hian an check mai ṭhin. Sawrkar inthlahdah tak hnuaiah chuan ILP valid lo leh nei lo hrim hrim te a sang tel an dapchhuak ṭhin a nih hi. Engzat tak lo luh belh leh ang maw, a ṭhente phei chuan chi an lo la thlah zui a,  vai fa an pung zel turah ngai ang. Assam buaina tawn hi a ṭhenawm Mizoram ram hian kan tuar zel chu a nih hi. 

4. CAA, 2019 hnuaia Citizen neih theihna turah hian document engmah neih a ngai lo. Illegal migrant-te hi a rûka lo lut an nih miau vangin tunge an lo luh hun record thlip thlep tura kan rin tlat le? 

5. Indian Constitution hnuaia awm kan nih vang leh kan inhumhimna dan ILP pawh hi Parliament-a ṭhiah theih a nihzia chu Article 370 (Jammu @ Kashmir special provision) ṭhiah a nih thu hian a tarlang chiang hle. 

6. Uniform Civil Code hi sawi tam ngai lo turah dah bawk ila. BJP hian an sawrkar chhung ngeia tihhlawhtlin an tumzia chu kawng hrang hranga an hmalakna aṭang hian a lang chiang viau. 

7. Indian Constitution hi sâwi danglam rup rup an hreh lo riau niin a lang. CAB chungchangah hian sakhaw zalenna leh inthluktlanna secularism chungchang a palzut e tih hi dan lam thiam tam tak thuthlukna a ni.  Fundamental Right thlengin nghawng pawi tak nei turah an ngai bawk. BJP hian anmahni lamṭang hi Supreme Court-ah pawh Judge atan an appoint nghauh nghauh tih hi an sawi ri fo bawk. Hetiang a nih vang hian J&K provision Article 370 nuai bo chungchanga Public Interest Litigation (PIL) pawh a hlawhtling thei meuh lo a, tuna CAA, 2019 chungchanga PIL lut zozai pawh hi awmze nei loah an chhuak ang tih a hlauhawm hlel lo e. 

8. Chakma lam chuan CAA, 2019-a Mizoram exempt a nihna hi duh lovin Supreme Court lamah zualko an lo tum mek bawk. Hetih lai hian Chakma mi ṭhenkhat chuan social media kaltlangin MNF leh an MP chungah CAB an support vangin lawmthu an lo sawi mek bawk. 

9. Northeast states seven sisters ṭanrualna chung­changah nghawng ṭha lo tak a neih a rinawm. Central India rama zirna in hrang hrangah North East student-te hi an ṭangho ṭhin. Buaina tawk se an inchhan tlang ṭhin. He mi vang hian state danga Mizo zirlaiten kan MP-in CAB a lo support hi an duh lo takzet bawk. 

10. Ṭhenawm ram kang duai duai karah Mizoram hi kan him reng thei dawn em? I ṭhenawm kha mikhual huangtauten lo luhchilhin lo luah ruih ruih se i him reng ang em? Ngun takin i lo thlir ang ule. 

- Lalnunmawia Pachuau