Ek hi kan bulah lo pawh a uih reng

Kan ṭhenawmpa in a tia lawm, “Ek na na na hi chu kan bula a awmin a uih em em a, mi bulah pawh ni sea uih leh em em a, khawi hmunah pawh awm se a uih em em ringawt a, a nihna chu uih a ni tlat,” tiin, tun hnaia CAA tih velah hian hei hi ka hre chhuak zawk nia mawle! CAB a nihlai khan political party tinin an duh lovin an dova, tlawmngai pawl pawhin a dova, kohhran pawhin a dova, BJP kid nih vanga MNF lamin an thlawp thut avanga ek hi rimtui ta ni awma CAA han fak thar vel ka hmuh hian ka nuih a za mai pawh ni lovin ka thin pawh a rim tel thei zuk nia. 

CAA hi keini ang duang thil hre zau lote chuan TV lamte hi kan hriat vena a ni a, chanchinbu lamah pawh article CAA in ziahna hi chu ka lo la dah ṭha zel a, pastor lam hi chuan CAA an thlawp thu an la ziak miah lo. CAA a hlauhawm loh thu ziak ve ka chhinchhiah tawh chin chu party politics lam rimnam an lo ni deuh vek tih pawh thil chiang tak a ni. CAA chungchang sawi nep tumna awm chu MP inthlana an vote a hriat thei a, buichhia laih lovin an in puang a ni. 

CAA kan duh loh chhante chu, sakhuana kaihhnawih hmanga India khua leh tui nih theihna tur a ni a, chu chu Hindu kana kawng hawn na a ni bik a, Hindu an lo lut ruih ruih anga (Mizoramah lo lut lo pawh ni se) chumi hnuah citizen-ah dan ang in ziah luh an nih hnuah vote an nei dawn a, inthlan huna chung hoin an vote tur chu BJP a ni. CAA hmanga lo lut hi nuai 20 ni ta se, BJP vote chu nuai 19 talin a pung dawn tihna a ni, hei ai pawhin a punna a tam thei ang. 

Tin, CAA hi a nihna angin hmang chu ni se Hindu lo luh belh tur hi nuai 100 dawn ni thei turah an chhut a ni. Chu chu a nia uih kan tih em em leh kan duh loh tlan chu, tuna Mizoram MP-in a support tak avang hian a ṭha thar chuang lo reng reng a ni, a la uih nam vung vung. CAA hi kan ram (India) tan a ṭha lo a, ILP awmna state-ah an hman loh avanga fak na chhan tur a awm lo. Ṭhenkhatin kan NGO leh MP duh loh vangin min huam lo angin an sawi a, a teuh lo mai, Arunachal Pradesh, Nagaland te pawh a huam lo hrim hrim a, Assam, Meghalaya, Tripura velah pawh 6th Schedule hnuaia awm chu a huam lova,a  tawi zawngin tribal leh tlang mi awmna chu a huam lova, chu chu kan NGO hruaitute thawh rah a ni lo tih pawh sawi tel a ngai. Ek chu khawi hmunah pawh awm se a uih reng ang hian, CAA hian min huam lo mahse a dan lo support hi Mizo Kristian pa tih tur a ni lova, CAA thlawptu hi chuan a rim kan nam vung vung dawn tho tho, a uih si a.

- Lalremruata