MUCHS tluang takin kal se

ZPM a han sorkar a, Congress leh MNF te pamṭul ṭhakna, mipui chhawr tur hriselna atana senso Mizoram Universal Healthcare Scheme a kalpui a; mipuiin kan chhawr ṭan viau a, a lawmawm tak zet.

Rethei bawk, hrisel loh bawk si damdawia inenkawl ngai reng mai tan chuan a luhaithlak ṭhin khawp mai. Sorkar hnathawk nih loh phei chuan thih daih maite pawh a chakawm rum rum mai dawn a lawm le.

MNF sorkarah khan insurance company kaltlangin healthcare a kalpui a, mahse, duhthu a sam lo viau a ni. Congress a sorkar leh khan MNF sorkar laia Health Minister Pu R. Tlanghmingthanga kha MNF sorkara Health Minister Pu Lalrinliana Sailo khan namênlovin a bei a, media lah min ko phar châmchî bawk a. A chhan let nan Pu R. Tlanghmingthanga khan media te min ko ve fo bawk.

Engpawh chu ni se, Congress leh MNF kha chu an hlawhchham titih a ni ber a. ZPM-in a han kalpui ta a, a takin damlote'n an chhawr ta viau mai hi a lawmawm tak zet a ni. Tha thlah loin han kalpui zel teh se.

Sorkar hnathawk mawlh mai hi an fakawm ka ti. An hlawh aṭang an hlawh tam leh tlem azirin thla tin sorkarin a cut a, mi tam tak ka zawh kual chuan an phun lo a, ṭha zu ti em em zawka maw le. Hmang loa an thawh thei zawka an ṭang chu nâ an ti miah lo nia.

Ka mi kawmte chuan thla tin kan thawh a, mahse, kan hmang lo a nih pawhin a lawmawm zawkah ka ngai. Pathianin hriselna min pe a, kan thawh ve te kha chu mi harsa zawk leh damlo mamawhin an hman ṭangkai chuan a lawmawm zawk a lawm maw le, an ti hlauh zawk. An fakawm khawp mai.

MUCHS 2.0 hi engtia kalpui zel tur nge ni ang le. Sorkar hnathawkte'n an thawh khawm leh mipuiin registration an tihna aṭanga an sum theh khawm ngawt chuan a daih seng dawn lo. Tunah hian sorkar chuan Asian Development Bank aṭangin sum pûk a tum a, source hrang hrang a dap reng bawk.

MUHCS ṭha taka kalpui a nih hi eptu party lam chuan an hlauh ber a ni a, sawiselna pawh a na sâwt viau. MNF chuan April ni 15, 2026 khan Aizawl Press Club-ah press mite an kâwm a. Kohhranin an kohhrante chu an mi leh sa zingah MUCHS-a inziah luhna nei lo pui turin a tih kha an sawisel mauh mai.

Synod hian thil a ti mai mai lo a, ngun taka a zir chian hnuah MUCHS chu rethei tan a ṭhat zia a hre chiang a, a kohhrante pawh mirethei zawk inziah luhna nei lote lo ṭanpui turin a ti a ni. Hei hi MNF hian nâ an lo ti a nih chuan anmahni an inenfiah a ngai tihna a ni zawk.

MNF sorkar laia hlawhchham tawh kha ZPM sorkarah Health Minister Pi Lalrinpuii leh a thawhpuite nena hmalakna hi keini mirethei tan chuan a ṭha thlâwt. MNF leh Congress sorkar hlawhchhamna a ni tih Mizo mipuite'n i hria ang u. Tuna taka Synod hmalakna avanga a hlawhchham ta anga press mite min han hrilh phei hi chuan, an sorkar laia an hlawhchhamzia a rawn pho lang chiang lehzual tih hi mipuite'n kan hria a ni.

A thuhrimah, Synod thuchhuah political party-te'n an han sawisel ve ngawt hi mirethei an khawngaih lo a, an hmangaih lo tih tichiangtu zawk a ni. MUHCS sawisel an tumna lamah Synod an bei ta mai mai zawk a ni ber e.

- Lal Rinmawia