BAWNGKAWN AMC GROUND BUAINA DIK TAK

Bawngkawna AMC Playground a hmuna YouTuber hruaia va en luih luih kha thil holam tak a ni. Scandal lian tak awm an politicise avangin thu dik pawh ngaihsak lovin, politics zawk a langsar kha a pawi khawp mai. MNF AMC tih dik loh hulhual mai a ni a, miin an dem em em tur a nih lain, ZPM ho chu MNF thangkamah an âwk a, thil tisualtu chiang takte insawifiahna platform ṭha tak an siamsak a; ZPM politics thiam loh a lang leh ta.

He ZPM hian vote hi chu an hmu ṭeuh ṭeuh chung hian politics hi an thiam lo hulhual a. An insawi dan taka an tih ṭhat zawk miau avangin AMC-ah pawh chiang takin an tling ngei ang. Chutih mek lai chuan, Bawngkawn Brigade-a AMC Playground chungchanga thu dik zawk leh thil sual pawi zawk hi in lo theihnghilh palh hlauh ang tih a hlauhawm a; lungpui in ngawi reng si a, keini lung tê ka rawn au chhuak a ni.

(1) A bilha tho lo ground:

An insawifiahna hrang hrang ka lo en ve khan ka lo hriat reng reng loh ka hmuh chhuah chu, Detailed Project Report (DPR) tel lova hna an thawk thei kha a ni.

DPR tel lovin engtin nge ni cheng vaibelchhe tel man an thawh theih, tih hi ka zawhna zawh duh chu a ni a; mithiamte’n rawn sawi chiang rawh u. DPR tel lo chuan hna tenau pawh thawh a thiang lo va, vaibelchhe nga a thawh dan tur (DPR) awm lova an kâwk chawp mai mai a nih chuan scandal lian tak a ni chiang a ni.

DPR tel lova hnathawhtirtu hi AMC hotute politician an ni tih chu a chiang a. Chutihrual chuan, an engineer leh an AMC Commissioner leh a hote hi an thiam bik lo va, hei hi scandal a ni thei tlat a ni. Sorkar hnathawk hian an eiru tihna ni lovin, mi dangte eirukna remchang lutuk kawng zau tak an hawnsak tihna a ni.

DPR tel loa hnathawh hi court-ah khing se, thiam loh chang tur chu a sorkar hnathawk daih an nih zawk hmel ta si a. Contractor hi a hlêp hnem hnem an ni dawn ta si a. Hei hi a nia, politics lama thil a kal tawh si chuan thu dik pawh lak chhuah theih loh khawpin a chîrî tawh dawn a, a pawi tak zet a ni.

(2) Tender loh trick ṭhing:

AMC Playground hi restricted tender chu sawi loh, tender mumal lovin vaibelchhe 5 chuang an seng a, chu chu nuai hlira chhût pawhin nuai 500 a ni. Politician ho ṭawngkam takin nuai hlir hi chhep ta ila, nuai chheh 500 a tling. Chu chu open tender chu sawi loh, restricted tender takngial pawh ni lovin, duhsak zawng an inthei sem hmiah hmiah a, hei hi scandal chu a ni. MNF Ṭhalai leh ZPM Ṭhalai inhnialna zawk khan boruak a la ta daih mai si a. A dik lo hai chhuah lova awm tur leh inhnialna ang maia scandal kan sawi mâm ta mai mai kha a pawi khawp mai.

An sawi dan kha chuan cheng nuai 25 chung lam chin an tender ṭhin avangin pavillion siam kha chu an tender a, a bak kha chu nuai 25 tling lo chiah chiahin an siam a. An trick hman chu–nuai 25 tling lova an siam hnu khan an revise ta ṭhin a, an siam belh an siam belh a, a tawpah chuan a belhkhawm nuai 500 a lo ni ta a nih chu.

DPR awm ta lo bawk si chu a estimate siam tawp, a kalpui zui dan tur awm tawh si lo, nuai 500 vel an han hmang ham ham mai hi scandal lian lutuk mai a ni. Engineer-in a tawpa bill a pek avang maiin dan an bawhchhe lo tihna pawh a ni lo. A nih dan tur (DPR) leh a siam dan tur kimchang dik tak Bill of Quantity (BoQ) pawh mumal lo lutuk maia an kalpui thei kha scandal a ni. BoQ awm chhun pawh BoQ ang lova siam a nihin engineer-in an check lo a nih loh chuan an mit an siai tihna a ni a. Aizawl khawpui chhungah ṭhalaite infiamna hmunhma tur nuai 500 chuang sen hnua inkhelhna tlak lova an chhuah hi, a phênah scandal a awm ngei ang.

Hei hi ZPM tehreng pawh hian FIR thehlutin chhui zui ngei rawh se. He thil hi registered contractor pawh ni lo hnenah tender pawh tender lova hna inpekna, DPR awm mumal lova thawh, cheng nuai 500 hman vek hnua inkhelhna tlak loh, field thar diai laih chawp pawh ni lo, field awm sa tihzauh leh siam ṭhatna a ni lek si a. AMC Playground Bawngkawn hi chu AMC inthlan vote inchuhna anga hmang mai lovin chhui chian ni se, dan hmangin a tuar tur politician emaw, official emaw an awm pawhin an chan tawk a ni mai lo vem ni le?

- H.Lalhlimpuia