Suangtuahna vâk velin ziak lo thei lovin min tur

Zîng khawvar êng mawi tak a rawn inṭham a,lentupui kai vel a bawh tu ṭhâl romei zâm paw chiai mai leh siahthing zâr bêl vate hrâm thiam hrâm rimawi tak tak te,uar taka ‘Hringfate u tho tawh r’u le,khua a vâr leh tawh e’ ti niâwm fahrana bawh ar inkhuan chhâwk chuah chuah mai te. Lenkawla zîng ni chhuak êngmawi tak mai chuan mual leh tlâng bâwk panga zo thing ding lih leih te chu a chhun êng nghelh a. Zo tui thiang luang ri her her leh zo thlifîm thaw heu heu chuan a ram mite chu hahdamna a pe a ni.

A ni lah tak a, kan Mizo hla phuah thiam hmasate pawh khan kan zoram dung leh vâng mawina,nawmna te leh an lung a lênna te chu up bo mai lova hlaa chantîrin lungkuai zetin hla thu mawi êm êm mai an rawn phuah chhuah ṭhin ni. Khâng hunlai te kha chuan kan sa liam puat a,sikulah te khan kan rilrua vawn(by-heart) mâwl ve tawp mai ṭhin a, mahse, tunah chuan ka hrethiam ve ta tak tak ta.Kan zoram nuam chhîng zo hi an lo awm lo rêng a ni. Chûng zîngah chuan Pu Rokunga hlaa ka duh leh mawi ka tih êm êm mai ‘Kan Zo tlang ram nuam’ tih hlaa a châng nawnna hi ka han thai lang ve hrim hrim ang nge:

‘I mawi êm e,

kan Zoram hmun sâng

Fiara tui thiang kan dawnna

Tlâng tina thing tin zarmawi leh

romei a zâm kârah,

Tlâng tin zalêng zawngte lungruala kan insuihkhawm,

Aw, I mawi chuang mang e,

kan lênna Zo tlang ram nuam,’ tiin.

Ka tehkhin lo thei ṭhin lo. Hmasâwnna leh changkânna lamah chuan ramdangte angin ṭhang ve thûl thûl lo mah se kei zawng ka la thlang ber tho tho kan zoram nuam. Phai ram lum zetah kum thum ṭha ang zên zâwn chu kan lo vai khawilai ui lên ve ta,a ram te chu nuamin changkânnaah ûm phâk vut lo mah ila, inchhâwng sâng pui pui ding thleh thluah ve lo mah se. Tin, khawvel ram hrang hrang dâiin kil tin kil tang hrût chhuak mah ila ka la thlang ber cheu ka pian leh mûrna, zo thlifîm thaw heu heu leh lentupui hring dup, Zo nun ze mawi tlawmngaihnain a chiah, ṭhian chhan thih ngama mi huaisen fam tate thisen luanna ram ka lu nghahna tur ni bawk Mizoram ngei.

Kan mi hmasate hla phuah thiam tak tak tepawh hian khawi hmunah pawh awm se, ram hrang hrangah dar zauvin khuavel dung leh vâng pawh hrût chhuak mah se kan zoram tluka an lungdumtu, an thlirnin hleih theih loh,hahîpa an fak bân loh hi a awm lo niin a lang.

Khawtlâng lunglên châng ni hian i zun zâm zûn lêngin min zêm a,aw kan zo khaw tlâng leh mual tinte u, chhuihthangvala hi kei ka tuallêna thlangkawrvai ram aṭang hian nang ngâiin ka kiu leh ṭhin.

- Joel TT Laldinpuia, National Institute of Homeopathy, Kolkata