KAN AWM DAN HI

Mizote Jerusalem Aizawl AMC inthlanah hian kan awm dan hi Krista chanchin ṭha nên a inmawi kan ti em? Party ropui duhna vangin, thu inchuh thawm rite hian ram leh hnam hmangaihna thinlung a awm mawlh lo a ni hi. He ram hruaitu nihna te, he Pathian zawn chhuah ramah hian eng ti tûrin nge Lalpa’n min dah tih ngaituah miah lova mahni party hming lansarhna zawng reng rengin party liante an buai mek a. Ruling dang lo, oppsision dang lo; a tu emaw zawk zawk hi chuan kan rin chhan Pathian vangin tlawm an chuh loh a nih chuan boruak a la so sang zel ang.

Tu nge thu dik hria? Thu dik hria sawi chhuak si lova ngawih lo chuh tlattu hi mi dawihzep ber an ni. Mi fing tam takin thiamthu an sawi a, mi mâwlte min bum turin hmanraw kim an fawm khawm a. Keini ang thingtlang mi tan chuan thliar thiam a va har tak em. Kei zawng, mahni party a ni emaw, thu dik ka hriat hma chu khawi lam mah ka ṭang lo vang. Kan party an dik lo zawk a nih pawhin, thup bo ka tum hek lo. Dâwta thiam chan tum tlatte kha chuan Chawlhni tukah biak in kawng pawh hi zawh tawh suh u. Mizo Kristian tihmingchhetu mai in ni.

Ram hruaitu, thu dik hrûla dâwt zakzeh tel ṭhinte kha he ram hian a mamawh lo che u. Eng ti thei si lo, ram leh hnam hmangaihtu thinlung hi in va tina tak em. Dâwt hmanga thiam changin, ropui taka vuiliam nih ai chuan, dik taka nung ṭhinte hian hriat zui an hlawh fo zawk a. Pathian leh kan ram tan ti a, Bible-a kut nghata thu tiamtute hian an lu chungah meiling an chhêk mek a ni. ‘He ramah hian awm la, rinawmna ûm zel rawh,’ tih thute hian kan thinlungah thu a sawi pha hlawl lo em ni?

Hausakna leh ropuina hian hlimna leh lawmna a keng tel lo va, Lalpa ṭih chunga a harsat lai ber pawha Pathian hnaih tlattute hi a ni, lâwm ṭhin a, hlim ṭhinte chu. A ṭha apiang kan lama kan hûi a, a chhia apiang kan hnawl a, party dangte kan bel a. Thu dik erawh thup bo hlen theih a ni chuang lo. Kan ṭanna hi a dik lo nia kan hriat chuan tlâwm ngam ang u; chu chu Pathianin ram hruaitu tura min dah chhan pawh a ni ang.

Tlâwm zawk nih ngam khawpa mi huaisen hi kan ram mamawh chu a ni a. Mi dik lote hrem ngamtu chuan Lalpa lawm zawng a ti a ni. Inhriatthiam tawnna hi pumkhata min phuar khawmtu a ni a, rual lo taka thutlukna siamtu chu a mu tui ngai lo vang. Kan ram siamṭha turin beidawnna kawng aiin, beiseina kawng a thui zawk tih hre tlat ila. Tuna kan ram hruaitute sûkthlêk hian kan ram ṭhalai tluchhe mekte hi a vei hlawl lo va, heti taka ṭhalaite nun chhe mek hi tuam dam lah an tum hek lo. Ropui zawk inchuh reng rengin an hun leh ni an hmang ral a, nakinah an tu leh fate chunga a la thlan ve hunah zawng, an tukhum an la dawm ve vawng vawng ta ve ang.

Diknain kawng sir a chang a, dâwtin hmun laili ber a channa ramah hian, eirute kan intlawnsiakna hmun aṭang hi chuan Lalpa lamlian sialtu chu kan ni hlawl lo ve. Ringlomite’n an ram an hruai dan kan hmuin kan hria; Pathian nung ringtu ram hruaitute ram hruai dan pawh kan hai lo ve. I dam chhungin ram hruaitu i ni dawn lo va, mi pangngai ve mai i nih hunah chuan ṭhenrual zingah pawh i awm ngam dawn em ni, zah nachangte i hre ve ngai a nih chuan?

Kan kih hnawkah kan tang a, thian fai tûrin kan thain a tlin lo va, hriamhrei dang ruaiin, lamṭang kan siam a, chu chuan eng nge a hrin? Dâwt bawk a hring chhuak ṭhin. I hre reng a, kan dam chhung nite hi tun hun chauh atan thlir lovin, kan tu leh fate, chhuan lo la awm tur thlenga kan dâwn a ngai. I pu kha he ram tan hian a va hlu em, an la rawn tih theihna turin he ram hruaina hna i chelh mek hi Krista chanchin ṭha nen inmawi phawt rawh se. Chu chu kan awm dan tur a ni.

A ruh lang râwtin ziak rawh, in ti a; a thlîng baw hawkin ka ziak a nih hi.

- Zothansanga, Chhiahtlang Kawn Veng. Ph : 9612333536.