STATE ELECTION COMMISSION DEM THEIHNA CHIN A AWM
April 21, 2026 khan tluang takin Aizawl Municipal Corporation enkawltu tur thlanna chu kan zo a, a lawmawm hle. Chutihrual erawh chuan, vote thlak tuma kal eng emaw zatin electoral roll-ah an hming an hmu zo lo kha a pawi a, democracy hnuaia an chanvo an chang lo a ni.
Democracy kalphung chu– mipui ta, mipui aṭanga chhuak, mipui tân (of the people, by the people, for people) tih a ni. Khawvelin puitlinga a ngaih tu pawh kum 18 tling tawh phawt chuan democracy kalphung hnuaia chanvo a neih chu a tana roreltu tur thlan theihna a ni a. Aizawla cheng, puitling vote nei thei tawh, electoral roll-a a hming a chuan loh avanga atana roreltu tur tun AMC inthlana thlang thei lo an awm hi thil pawi tak a ni.
Democracy hi hlu ka tih em avangin inthlan hi ka ngai pawimawh a, ka chhung leh khat te pawh ka ngaih pawimawhtir hram hram ṭhin. Tun AMC inthlanah pawh hian ka tupa pakhat, MLA inthlan hnuhnung bera vote nei ve tawh pawh AMC inthlana vote thlak turin ka tur chhuak a. A EPIC kengin vote thlak a tum a, a hming electoral roll-a a chuan ve loh avangin vote thlak thei loin a rawn haw leh a, amah a thinrim a, kei pawh ka thinrim a ni.
India ram pum huapin Electoral Commission kan nei a; MP leh MLA inthlan chungchangah thuneihna sang ber neiin, vote thei tawhin vote an thlak theih ngeina turin electoral revision hi kum tin a kalpui ṭhin a. Kum tin an kalpui lo a nih chuan special revision an nei leh ṭhin tho a ni. State tinin anmahni state chhung bik inenkawlna (local government) thlan chungchangah State Election Commission an nei leh ṭheuh a. State SEC-te hian khawpui enkawltu tur, municipal corporation, council leh board-te bakah thingtlang khuate enkawltu tur, gram panchayat (local council/village council) te thlengin an inthlanna a buaipui a. Heng inthlanna a buaipui tur zingah hian inthlannaa vote nei thei tur vote neihtir chu a mawhphurhna a ni.
He mawhphurhna lian tak leh pawimawh tak hi kan Mizoram SEC hian a kalpui uluk lo tih chu tun AMC inthlanah hian a lang chiang hle. Mizoram SEC hian thil a tikimchang lo a ni tih hriain thupha pawh a chawi hial a; mahse, a pawi tur chu a pawi zo tawh a, siam ṭhat theih a ni tawh lo.
SEC hian electoral revision hi kum 2025 khan an nei ngei mai a. Mahse, hei hi mipui zawng zawng hriat turin local council-te a hmang ṭangkai lo niin a lang. YMA Newsletter velah chuan Roll Revision hi chhuah a ni mai thei. Mahse, local council thupuan tluka mipuiin kan ngaih pawimawh a awm lo a, roll revision hi kan hre zau lo niin a lang ta ber.
Tuna kan SEC-a Chief Election Commissioner hi pa fel tak, hna thiam tak, SDO (Civil) a nih laia ka hriat tawh a ni a, tun AMC inthlana voter chungchanga thil buarchuar awm hi mak ka ti hle nghe nghe. SEC hi a pawimawh si a, a mawhphurhnate hi tun aia nasa zawk leh uluk zawka phur turin duhsakna ka hlan a, sèl an ngaihnaah ka han sêl bawk a ni e.
- David M. Thangliana