ZPM sawrkar hi an fîm (An kawng siam avangin an tling ang)

“A hnar a fim chuan a mawng lam chu a fim tur a ni,” tih kha an thunawn a ni a. AMC election hi Dampa by-election leh Lai Autonomous District election ang kha chu a ni lo vang.

Kum hnih awrh ZPM sawrkarin a hmang liam ta. An sawrkar tirh phat aṭangin sawrkar hmasa te’n an bei nghal char char a. Whatsapp group-te siamin party mi leh sate’n hming dang forum aṭangtein an bei a. Sawrkar hmasa lam experience nei intite’n, “Budget vawi khat pawh la pharh lote’n rawn sawi rawn sawi ve lo ula a ni mai” tih te khan an ṭawng khum ṭhin a. Pu Lalduhoma MLA Serchhip bial te kha an ban tawl mai phei kha chu inthlan hautak a, a hahthlak tehreng nen; a mak thin hle mai.

1. KAWG AN SIAM: An siam ṭha ta hle mai. Aizawl khawpui kawnga motor khalh ṭhinte pawh an lawm hle mai. An kawng siam a hnawng ṭha a, a khawro ve lo; a hnûm zut mai a, a ṭhil ve lo a, a chhah ṭha bawk a. Khawpui dung kawngpui (main line) mai a ni lo va, veng chhung kawng thlengin an cover zo vek a. Durtlang Hospital kawt pawh an khuh chhuak leh vek tawh. Heng ringawt pawh hi, mipui chuan AMC inthlanah hian an lantir a rinawm. Minister ho hi an la upa hlawm lo va, an fel hlawm vek a. PWD Minister Pu Vanlalhlana (example-ah) ho kawng siam ṭhat avangin Aizawl mipui an lawm a, Mizoram chhung kawng dang pawh an siam ṭhat zel beisei a ni.

Kan hma ministry kal tate anga media platform-a a lang ve sek lo hi ka ngaihsanna chhan a ni. Ṭawng lova hna ṭha taka a thawh miau si chuan kan lo fak mai a ni. Hnam fingte’n “Work more, talk less“ tih te pawh an neih kha. Ani hi Brig. T Sailo pûm chhuak a ni a’ A hriselna pawh lo ṭha zel teh se. Brig. T Sailo, Mizoram politician ṭha ber kha a chak hun laiin kan rel phar a, a tar a, thlan tlak tawh loh hnuah kan han fak leh vel a ni. I inen fiah ang u.

Aizawl tlak lam pang (west corridor) kawng an zawng hi an kutkawih ropui tak a ni. Tin, Lengpui Airport to ZMC Hospital, visiting professor-in awlsam taka lecture an han pe tur leh doctor special–surgical connectivity service thlen theitu tur a nih avangin han champion pui teh se. Kan ZMC pawh research centre ni ve turin leh, air service connectivity a ṭhat phawt chuan, operation theatre ropui tak kan nei thei ang a, foreign doctor thiam pawh luh te tum ila. Phai lam pana inzai kan pumpelh ang a, ram sum kan lo hum bawk dawn a ni.

2. Ti tak tak minister-te thusawi ngaihthlak a nuam hle. Minister Pu B. Lalchhanzova hi media aṭang chiaha hmu kan ni a. A takin kan la inhmu lo va. A chet zia leh a thil tihah tak tak nun a lang thei. Tin, state lian zawkte thil tih dan a zirte hi media aṭang bawkin ka hmu a. Odissa leh state dang ah minister a nih tirh te khan a kal a. Minister chuan state lian zawkte tawnhriat an zir tur a ni rêng a. Tin, Land Revenue and Settlement Department, CM kal tate’n ‘Ramhuai te pûk’ tia an sawi kha, officer-te an meeting pui a, a lo danglam ta kâwk kâwk mai. E- Portal siamin land survey method a siam ṭha a. GPS link an ti nghal te hian ramri buai leh LSC lem a tibo dawn a ni. Online application leh file endorsement chak zawka a lo kal thei te hi Mizoram mipuite tan phurrit lak kiansakna ropui tak a ni. A Supply Department pawh ṭha tak a ni. Mahse, kan sawi vek hman rih lo ni se.

3. Eirukna (Corruption) do CM: Eirukna do hi an thupui pakhat a ni a. A hma chuan CM leh minister-te tan kha chuan material supply, PWD, PHE, Agriculture, inter state trading-ah fet taka chetna a tam mai thei. Mahse, chung thawm leh mit hmuh (red handed) media platform-ah hian a lang lo a ni lawm ni. Huaisen tak taka an ṭawng, thu an sawi reng thei hi a lawmawm a. Thil dik lo zakkep chung chuan huaisen a har si a. Tin, thil dik lo a awm chuan mipuite’n kan sawi chhuak ngei tur a ni ang. Mahse, thutling (evidence prove) a ni tur a ni. Thutling awm si lova inbeih vak vak mai hi hlawkna (feedback) a awm lo a, mualphona mai a ni.

4. Political Environment Reform: ZPM sawrkar naupang tê a ni. Zawlbuk zirtirna ang, rinawmna, huaisenna, taimakna an sawi chamchi ve a. Aia upa zawkte zahna a pawimawh ber hi ti ri ve nghal nghe nghe se la. CM-in huaisen taka thu a sawi theih chuan mipuiin rinna an nghat a; ṭawngkam tihthlum a, Pathian thu nena seh-hmeh teh chiam pawh a ngai lo. Thil dik an tih chuan a tawk em em. Mipui lawm zawng emaw sawi tum kher pawh a ngai lo. Ṭawng tam em em pawh a ngai lo. Ti tak tak ṭhin lung thusawi hi ngaihthlak a nuam em em a ni.

Tihian, ZPM sawrkar chu kan han fak a, ministry hmasaa tuarna avangte pawh a ni ang. Ministry hmasaa tuarna chu eng nge kan ti mai thei, tlemte han ti lang ila:

i. Assam sawrkarin min tibuai reng a. David Zolawma, Chuhvel huan an sâmsak a, thlâm an hâl fai vek a, media-ah an chet dan an chhuah a.

ii. Assam Police company khat laiin Mizoram chhung Vairengte Police post, police 30 awmna an rawn rûn a, an luahlân a.

iii. DC office, historical monument ṭha deuh a kâng ral a, administrative record tam tam a kâng ral ta vek a ni.

iv. Lengpui Airport terminal building renovation sak lai a chim. Vice President M. Venkaiah Nadu, Raj Bhavan-a a riah dawn zan (10 March, 2022 4:30 PM a ni).

v. Kuhva phur motor an man reng a, an hal hluah hluah mai a. Motor tam tak an hal chhe ṭhin a, eng nge inquiry result mipuite’n an hre lo.

vi. State dang news service ten min hmusit a ang khawp mai.

A tam, duh tawk ang. Mizoram politics zin kawng hi pipute ze ṭha entawna kan inzir a ngai tak zet a ni. “Mizoram hi independent-in kalsan mah ila, India hian a hnehlâk tho ang che u,” by Alexander Ronald Hume MacDonald.

- C. Vanlal Ruaia. 9862569310.