Addict huangtau zual an va la tam ve

Ka bial hi a zim khawp mai a, ka kalna ngaiah ka kal zing ve viau. Ka bial zim ang bawkin ka rilru leh ka vei zawngte pawh hi a té tham ṭhin khawp mai. Miin engah mah an ngaih loh leh an en liam mai mai ṭhin ang hi kei chuan ka lo hahpuiin ka lo buaipui leh tlat ṭhin.

Addict hote hi miin hmangaih leh lainat ena an en theih lai leh, khawngaih em ema an duat theih lai hian kei chuan hnawksak, ninawm leh ngeiawm hmuhin ka lo hmu tlat zel a. Khualzin laka kan mualphona tur leh min la tihmingchhetu tur an nihzia te, tourist ho an la bumin thil an la ruksak mai theih thute ka sawi tawh ṭhin.

CYMA-in addict ho an han thianfai leh deuh duak pawh hi ka lawm ve em em mai a. A chhan pawh addict ho hi hmuh hrehawm ka ti a, ka mit an tihkham ṭhin vang a ni. Mahse, tunlai hian hmun ṭhenkhatah addict luhlul leh huangtau zual, Aizawl hmun lun lai leh ualau laia zak miah lova a hmei a paa khawsa ṭhin an awm leh ta tlat mai.

Ka kal zinna lai zim te, Aizawl Bazarpui leh kan veng Venghlui inkar maiah pawh hian addict ho zalen taka awm ṭhin eng emaw zat an la awm tlat reng mai hi ka ngaimawh hle. A bik takin Zodin square Solomon Cave bul vel leh Tuikual chhuk thlakna step zau velah hian a hmei a pain an zalen em em reng. Transport office vel leh Vanapa hall velah an la awm reng tho, Mizofed pump vel nen.

Hmuh hrehawm ka tihna lai ber leh hnawk ka tih lehzualna lai ber chu, DC office peng, Court road hlui tawntirha a hmei a paa an zalen lutuk te, Treasury bus stand waiting shed hi a hmei a paa an luah nileng zankhua thin te, Treasury aṭanga Venghlui kalna kawngpui sir, footpath vela zak miah lova an awm reng theite hi hmuh hrehawm ka ti ṭhin. Waiting shed phei khi chu a mamawhtu mi pangngai tana han ṭhut vena tur hun leh hmun a awm ngai mang lo va, ṭhut ve ngamna chi pawh a ni tawh lo. Addict ho inpui a ni ta ringawt mai.

Heng ka sawina lai bik hmuna addict zalen ho hi a bul hnai veng neitute hian an ngaimawh lo emaw, an hnawt darh ngam lo emaw pawh ni se, mikhual leh mipui dang tam tak tan hmuh an hrehawm a, an hlauhawm a, an ninawm a, a mawi lo va, mit an tikham ṭhin a ni. Hengho hi chu hmun khat aṭanga hnawh darh ringawt hian awmzia a nei lo lehnghal. Kawi lehlamah an va hnawksak leh tho. Chuvangin, khung khawm bo mai hi an tan leh vantlang tan a ṭha ber kei chuan ka la ti reng.

Heng hmun vela addict huangtau zual ho hi a veng neitute’n an hnawt boin an khung khawm ngam lo a nih pawhin, CYMA-in zone-a ṭhen anga heng lai zone bialtute khan zone angin hma han la se ka ti hle. Veng mal leh mimal ang chuan han hmachhawn hi thil nuam lo leh hrehawm ve deuh a ni si a. Sawrkar leh mimalin kan tih theih loh leh kan tih ngam loh apiangah hian YMA hi kan pun in ngai leh ṭhin a ni.

Nge ni, a rilru têt thlak em mai, an duh duhin lo awm ve mai mai rawh se, kan ti tawh zawk mai dawn em ni?

- K. Hmingthankaia