SUMTHUNINU SORKAR

MNF sorkar chuan kum khat vel ro an rel chhungin a sum senna tur zawng hlirin hma an la ta mai emaw tih turin ro an rel a. MLA nih te hi a hlawkzia hriain a hlawh pangngai pawh tel miah lova nih an chak em em a ni. An hlawh 130.77 % in an tipung a, MLA te hian mipui rawng an bawlna kawngah hian 130% work load hi an tipung ve ang em le? Kan ram dinhmun en hian 130% laia punna ringawt pawh hi MLA ho hian an thawh chhuah belh hmel bawk si lova, a tuar tur chu kan ram hmasawnna leh mipui kan ni dawn. 

Hun chep tak karah state games an buatsaih avang hian infiammi ṭha chherchuah a beiseiawm lem lo. Constituency based in an kal pui a, MLA te tan sum senna tur a va tam dawn em. MLA tan phurrit mai ni lovin ram tan phurrit a tling hialin a rinawm. Sumthuninu dik tak a va ni leh dawn em. 

Sorkar hian hman ṭangkaina tur awm em em lo tura rin, sum tam tak senralna turin board hrang hrang an siam leh pek a. Sum sen ralna ti tam turin board Vice Chairman te chu Minister of State rank an pe vei rawl  emaw ni? An ni enkawlna tura sum sen ral ho chu thuhran ni se, anniho tan hian personal branch an han pe vek a, staff pali emaw panga emaw te nen chuan an sum an sen ral hi cheng eng zat tak ni ang maw le? 

Heng  Board te hian an staff te hlawh hi thawk chhuah tal se la chu thil dangah hman ṭangkaina awm miah lo mah se a zia tak a awm a. Mahse, khawiah mah hian chutiang chu an thawk chhuah awm der si lova sumthuninu an ni leh ngawt dawn. Politician leh a chekawite tana an sum bakah Secretary leh a hnuaia  mite, hlawh tam em em vek, Secretariat-a an awm vanga personal peon nei vekte tan an hnathawhna tur electronic bungrua leina tur sum tam tawk tak an han phal leh tawp mai nia! 

Tun sorkar hnuaiah hian sum sen ralna tur thil lawm leh kut fahrah te te, intihhlimna lam an uar viau mai. Kum danga Chapchar kut ni khat hman ṭhin kha ni hnih an hmang a, Sahmulphah thlaah Pawl kut ka buatsaih e te an ti. In tawllenna leh eng emaw programme, sum senna tur lam hlir an buatsaih vak vak mai! In enlet a va ṭul tak em. 

A thawh chhuah lam uar si lova a hmanna lam ringawt buaipui hi chuan ram ropui min thlen dawn lo. Sum sen ralna lam hi a uar dawn a nih chuan a hmuhna lam tal hi uar ve ta se. Kan sorkar hian sum seng hnem lo leh hek sak lo zawnga thil kal pui hi uar lo se la, a nih loh chuan kan ram leh hnam hian a chhiatpui lutuk ang tih a hlauhawm. 

- L Vanchiau