HINDU LALRAM THLAWPTUTE CHUAN CHAKMA LEH TUIKUK LALRAM PAWH AN THLAWP MAI A RINAWM

Mahni hnam puala ram leilung nghet nei ve lo chuan midang ram pawh an chuhpui ve mai a, an hnam leh sakhaw dinchhuah nan thi leh thau pawlh a ṭan an lak ve a ngai ṭhin. 

Kan Zoram ah ngei pawh Zofate ram leilung nghet tak nisa chu Chakma leh Tuikuk unau te'n min sahthlak sak tumin min chuhpui ta der mai. An ni pawh hian an hnam din khawchhuah ve nan an mahni pual a ram leilung nghet an neih ve loh chuan sakhua pawh neiin he khawvel ah hian a hnam ang pawhin a mihring chu awm ve reiruih mahse, an lu nghah natur leh  thlamuangtaka an awm ve theih natur ram leilung an pual a an neih ve si loh chuan an hnam leh sakhua pawh chu ram tel lovin a kal ve naw naw ang a. A tawp ah chuan ram leilung neilo na pui chu mi ram hrang hrang a an mikhual kualna ram hrang hrang ah chuan an ral lo thei dawn lo a ni. Chutiang bawkin, mahni hnam pual a ram leilung nei tawh phawt chuan eng hnam mahin an ram chu khap khat pawh chan emaw an phal ngai lo.

Tunlai hian Citizenship Amendments Bill 2019 (CAB, tun a dan/ Acts lo ni ta) chungchang ah Central a BJP sawrkarin India ram chu Hindu lalram a siam a tum dan leh a tum nachhan chu India ram a sakhaw hrang hrang zawmtute zingah Hindu an tam ber avangin awm tihpui a, hindu ho tan (support) titih ta zawk mai pawh an awm ta nual mai a ni. Heng te erawh hi chu mimal ngaihdan leh mimal thil thlir dan a ni a. Heng, an mimal ngaihdan a BJP sawrkarin India ram hi Hindu lalram a siam a tum awm tihpui a lawm zawk ta phian te hian "India hi Hindu ram a ni a, India  rama a tam ber/majority te'n an ram hi Hindu lalram ah siam an duh chuan a awm a lawm, CAB 2019 vanga tuar nasa ber tura ngaih muslim ho te chuan khawvel hmun hrang hrang ah muslim lalram an nei ṭeuh tawh a, hindu ho pawhin an tamna ramah Hindu lalram din ve an tum hi a awm a ni," an tihpui vang a ni. Mahse, India hi engtiklai mahin Hindu ho ram bik a ni ngai lova, sakhaw hrang hrang betute ram, sakhaw duhsak fal bik neilo ram a ni.

Sakhaw zawng a India ram hi Hindu lalram a din duhtute thiltih awm leh thil tih awm tak ni a ngai a thlawptu kan zofate zing a mi te hian an ngaihdan ang hi chuan ram leilung neilo Chakma leh Tuikuk hovin Mizoram min sahthlak sak a. He kan Mizoram leilung ngei a an hnam leh sakhua tan a ram din ve an tum pawh hi an thinlung takin "a awm ve bawk a lawm le, he khawvel ah hian ram an nei ve lova. An din khawchhuah ve nan an hnam leh sakhaw tan Mizoram aṭanga ram sualchhuah an tum ve hi an tihtur dik tak a ni", an ti thlap thei tihna tlukah kei ka ngai. 

- PC Lalnghinglova, Chhingchhip, Camp : Delhi