TUTE NGE CHUNG PIK A?

Kan Party nilo ten sorkharna an chânin, Pathian ruata ngai thei miah lo, kan Politician-te hian, Youtube lama Thawnthu chhiar ṭhin hote tluk zetin kan Pathian thu Bible hi chhiar ve se zawng, dawta inbeihna hi a reh deuh dual tûr asin le. Kan party lo sorkarin mipui lawm zawng hna an thawhin kan lo hahpui hlauh a, an hmalakna ṭha lo se la, an thutiamah ding lo se, tiin, a mawng pawpna lai kan lo zawng ngar ngar a. Aw, tu hriatpui loh hian kan chung a va pik tak em. Cancer natna vei ang maiin party office-ah kan lut chhuak zut a, Zemabawk Hospital kan hnaih ruak ruak awm asin le.

Kan sorkhar lai kha chuan, ipte a ruak hman meuh lo va, a chhan chu sem policy kalpui ta fam chuan chan tawk a bo bik lo ve. Tunah zawng, mahni thawh chhuah ngei lo chu sem a awm tawh si lo va, thawk peih lo chuan sum vân thu kan sawi luai luai a, puhmawh tûr kan dapin kan zawng a, a zawnga zawng ta ngar ngar chuan sawisel tur ting chu kan hmu ngê ngê a. Mahse, a sawiseltu pawh kan lung a dam zo chuang lo va, pawisa hian kê leh thla a nei lo va, kan run chhungah a rawn pen lut ngawt dawn lo va, a rawn thlawk lut dawn hek lo. Malsâwmna hi a rawn saihlum tlak tawp lo va, a thawha thawh hlawh a ni, tihte hi kan hre lo emaw ni. Ruling-te hnathawh en dik reng rengin camera nên ni tin thawh chhuah ai chuan, mi ekin laih a hlawk zawk a, Zion street chhuk thla vela kawnghren leh sim card nungsa zawrh pawh a hlawk daih asin.

Hringnun inthlak reng karah hian kan khawsak phung pawh kan thlak a, kan her rem thiam a ngai. Mi dang sawisel tur kan hriat theih viau hi chuan keini pawh miten sawisel tur min hre ve ṭeuh ang, kan dik ber lo va. Kan tling berin kan fel ber thei hek lo, chu chu vân hnuai sakhming chhiar zingah mimal nun ṭheuh a ni. Tu mah mifel tak reng an awm lo, pakhat te mah an awm hauh lo, tih ziak a nih angin mi dang thil tihah lo buai viau lo phawt teh ang u. Mahni duh dan pawha kan nun kan hman theih loh laiin kan duh angin mite awmtir kan tum a, kan chung a pik mai mai a ni. Zofate hian fanghmir tih dan kan zir a hun ta. Thlantui far lova sum neih ṭeuh kan duhna hian dikna leh rinawmna kan hnawt bo mek a nih hi. Benga kan hriat hi a tam lutuk a, kan nunpui zo tawh lo va, chuti chung chuan, hriat belh zel kan tum a. Thu dik leh dik lo pawh fiah hmasa lovin Social Media lama post hmasatu nih duhin kan hmanhlelh a, a vuak let kan dawng a, mahni chauhin kan zak chem chem a, kan sim thei chuang si lo. Kan chung a pik leh ṭhin.

Kan tunlai khawvel hun tawng mekte thlirin, kan hmangaih kan ram neih chhun, Chhulkhat kual zofate tual lênna ramah hian, dawt hmanga Politic inbeih nan zawng i hmang tawh lo vang u. Lal duhna vanga mite huat thu sawi reng nân zawng hringnun hi a rei lo em mai. Pathian rin lohna leh sualna mak tak tak, ram hrang hrang sorkar ten ralthuam hlauhawm pui pui an inneih ṭhatsiak mek a, an inngur kual chhur chhur reng tawh mai bawk si. Ram leh Hnam humhalhna kawngah CYMA pawhin kan Politician-te kan veng thawng lo thei si lo che u a, hmangaih takin he kan ram zim teah hian Kristian hnam kan nih angin, thu dik chauh beh chhanin Politict hi kalpui tawh ang u.

US & Israel, Iran inkar buaina ringawt pawh hian Nuclear hmanga Indo pui an chawh chhuah maite pawh a hlauhawm ta. Bible-in hun hnuhnunga thil lo thleng tur a sawi lawkte chu an intawk khawm mek zel a nih hi. Nova hun lai ang khan khawvel hian chhiatrupna hi chu kan la tawk ngei dawn niin a lang.

Nuclear bomb leh Chemical hmanga Indopui hi a lo chhuah palh ṭhulhah tiin Sorkar hrang hrangten leihnuai puk an siam sup sup a, America chuan an President chenna In (White House) hnuaiah hian rikrum thila inhumhimna tur puk lian tak (bunker) chu indopui II-na lai khan an lo siam tawh a. Kum 2010-a an chei ṭhat khan US Dollar vaibelchhe 3.4 (India tangkain tluklehdingawn 2.9 chuang) lai an seng niin an sawi. Chutiang chuan Khawvel lal tên an himna tur ngaihtuahin sum tam tak an seng ṭhin a ni.

Keini Sorkar mi pawimawh leh Lal ni ve phak lote tân chuan kan himna chu lei leh Vâna Lalber Isua Krista hi a ni a. Eng pawh lo thleng se la, a hnênah innghat mai tura min sawmtu Lal Isua Kristaah i innghat ngam ang u.

Ka chhandam tu'n min vengin a hnai reng, Thil eng pawh lo thleng se ka him a ni; Thlipui leh ruahpuia'n min thukru a, A kutphah ropui chhûngah," tih hla satute kan ni si a.

Matthaia 11:28

"Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u."

Chawlhna dik lova, chawl a, mihring ban tha chakna innghattute nun hi a ni, Chungpik ṭhin ni.

- Zothansanga, Chhiahtlang Kawnveng. 9612333536