EIRÛK DO NGAM STATE SORKAR

Thil mak deuh pakhat chu mimal kan/an hausa em em a, in leh lo man to tak tak, mahni thawh chhuah phû lo lutuk nei an tam em em hi a ni ṭhin. Hei hi hnamdang pawhin mak min tihna a ni.

Eirûkna a hluar hlê tih tlang hriat ni mah se, kan inhmai zah tawn avangin inen liam mai mai pawh kan tam ta bawk. Kan ṭhanmawhbâwk chu 'corruption' tih kan hria a, mahse a do ngaihna kan hre meuh lo.

Chief Minister hlui meuh pawhin, "unaute pawisa kawl," tiin cheng nuai za tam a kawlna state kan ni miau! Hemi dona kawnga tun sorkarin huaisen taka ke a pén ta hi thil lawmawm tak a ni. Ṭhang leh thar lo la awm zél tur te tân entawntlak hnutchhiah a pawimawh em em a ni.

Lokayukta:

India ramah chuan state bîkin 'independent body', sorkar leh a hnathawkte; eirukna, hlemhlêtna leh thuneihna hmansual kawnga mipui zualkona tur leh hmalatu tur a neih chu Lokayukta hi a ni a. Tun sorkarah Lokayukta Act, 2014 chu siamṭhat a ni a. Deputy Superintendent te, Inquiry Officer leh Chief Enquiry Officer te chu Inquiry Wing thuam chak nan pek belh an ni.

Hetianga state sorkarin Lokayukta a thuam chak hi a lawmawm tak zet a ni. Eirukna thilah 'complain' tur kan neih chuan kan thehluhna ber tur a ni a, anni kut leh ke 'agency' chu Anti Corruption Bureau (ACB) hi an ni a. Anni hian an theih phâk baka awm chu CBI lamah an thlen leh ang.

State ACB chuan eng nge an chhui:

Mizoram ACB hian kum 2023 December thlaa sorkar laipuiin a rawn tihtawp tâk Chaltlang to Durtlang Ropeway leh Sakawrhmuituaitlang Skywalk chu an chhui mêk a, a kaihhnawihah hian a siam hnathawktu JV NEIP, New Delhi neitu Satish Panthanya chu September, 2025 khan Mizoramah man a ni tawh nghe nghe.

Project 2 atana sum pek chhuah tawh hi ₹ nuai 4,953.10 a nih laiin, contractor 2 te JV NEIP, New Delhi leh civil hna thawktu Lushai Engineers te dawn zat chu Ropeway atan ₹ nuai 1,317.80 a ni a, Skywalk atan ₹ nuai 302.89 chauh a ni thung. (Vanglaini, 29.9.2025)

Hetah hian thil fel lo leh eirûkna lian tham tak a awm ngêi niin hriat a ni a, he Ropeway leh Skywalk thubuai hian Ministry kal tawh pahnih; Congress leh MNF hun hnuhnung ve ve kha a huam tel dawn a ni. ACB hian case tam tak an neih zîngah tuna mi hi a lian tham ber pakhat a tling mêk bawk.

TLIPNA:

Hetianga a taka eirukna do ngam hi a ni law'm ni kan awh em em ṭhin kha? Kan hnam hian thil kan chhûtin kan chîk viau lo ni te hian hriat châng a awm. ACB te hian a takin hna an thawk mêk tih te hi hre nawn leh zel ang u. Kan hmelma lian ber chu eirukna mawlh hi a ni e, hlawh phu lo in leh lo, huan nei kan ṭhathnemzia te hi kan hmu vek awm e. Hmasawnna atan eirukna i do zêl ang u.

~ Zoa Tlau, Buannel Cabin