Sikul naupanga pawisa khawn
Mizorama private english medium school intelkhawm Muzoram Independent School Association (MISA) chuan tun hnai khan an pawl sum (fund) atan naupang pakhat zelah Rs. 20 aia tlem lo thawh turin school-ah circular chhuahin pawisa an khawn mek.
Mizorama english medium school-te hi naupang zirna atan chuan sorkar school ai chuan a ṭha a, naupang pawhin an bawh nasa hle. Hetihlai hian, private school neitute hian sumdawnna leh sum siamna atan naupangte an hmang nasa hle tih chu tu pawhin kan hre awm e.
Heng school zingah hian naupang enkawl ṭha leh zirtirtu hlawh pawh pe ṭha fe fe an awm a; chung zingah chuan Gospel Centenary School, Mission Venga din, tuna Durtlanga changtlung taka kalpui mek te, Khatla venga Lalmalsawma Memorial School (LMS) te hi zirtirtu enkawl ṭhat kawnga sawi hlawh zinga mi an ni ngei ang.
School tam zawk chuan an zirtirtu rawihte hlawh an pe tlem hle tih pawh sawi a awm a, zirtirna kawngah ṭhahnemngai turin an beisei leh si a, an hlawh pek nena inmil lo school hi a tam hle ang.
A thuhrimah, heng english medium school-te hian naupang lamah fee an la sang far far vek a ni. Naupang admit tur an tam tih vanga ti em ema fee lak san hi state dangah a awm ve tho mah se, a tam em em loin a rinawm.
Sorkar pawh hian heng private school-te hi uluk zawkin enkawl se, monthly fee an lak dan aṭanga zirtirna an pek dan te, an hmunhma a him leh him loh te, naupangte zawk chettlat nan a rem ṭha em tihte hi enfiah fo a ṭha khawp mai.
Tunah school intel khawm Mizoram Independent School Association-te’n an pawl sum atana naupang pakhat zelah Rs 20 aia tlem lo an han khawn hi chu thil tih âwm lo tak a ni.
An pawlin sum an mamawh a nih chuan eng vanga naupang thawh khawmtir nge an nih? An tih loh tawp tur an ti niin a lang. Pawlin sum a mamawh chuan school neitute’n an thawh khawm mai tur a ni.
He thil hi sorkar, a bikin School Education department hian chhui vat a ṭha khawp mai. MZP pawh a rang lama chet a ṭul dawn a nih hi a. Pawl sum atan naupang pawisa thawh khawmtir ngawt mai hi a dik lo hrim hrim a ni.
- Lal Rinmawia