Charge a la ta chu a ni a

ZPM pa pakhat hian ZPM President Pu Lalliansawta chu taksa chak lohna avangin a chawlh a lo ngai ta a, CM Pu Duha'n charge a la ta tih min lo hrilh ve tlat mai a. Min rawn hrilhtu hi zing ṭawngṭaina aṭanga inhmelhriat kan ni. Kei pek chuan, Vice President in nei reng a, charge te chu la ve mai se la, ka lo ti a. A thil rawn sawi zui ti hian la mar ila: Kan zah em em, CM hmasa Pu Chhunga (L) leh Pu Ṭhena (L) te khan CM leh party president nih kawp an duh lo va, Pu Hawla kha ṭum nga lai CM leh party president a ni kawp a, Pu Rama kha ṭum thum CM leh party president a ni kawp bawk a, rawn ti a ni. Chutah keiin, CM leh party president chelh kawp ka lo thlir dan chu, 'Hâwp bawk, chawm bawk' an tih ang dinhmun duhna kha a ni mai, ka lo ti a.

ZPM hi 'One man, one post' ti party kha an ni a. Vice president nei reng a, ṭul leh buai tak CM charge an laktir hi chu a mak ang reng. Opposition-te’n, 'An sawi loh ang zelin an awm,' an tih hian an ti mai mai a ni, an sawi ang chuan an awm alawm, ka lo ti deuh ṭhin a. Mahse, tunah tak chuan CM-in party president hna a kawp ta chu a nia; a kawp rei lo turah ngai phawt ila, an kawp reitir phian thei bawk.

Nihna chelh kawp thu sawi takah chuan, kan India ram hruaitute thung hi chu an ropui ka ti; keini zaa za Kristiana inngaite hian kan tluk loin, politics leh ram hruainaah chuan ringlo mite lakah hian zir tur kan la ngah hle niin a lang. Ka hriat sual loh chuan, India ramah hian PM leh party president ni kawp an awm lo zel a, tuna kan PM Modi pawh hi a ni; party dangte pawh chutiang zel chu an ni. India ram meuh hi chu a lo lian bawk nen, a âwm viau.

Chutihlaia keini Mizoram zim têa party ‘One man, one post’ titu berte’n hetia CM leh party president an chelh kawptir hi chu ti rei lo se la, Mizote’n 'Ar talh dan dang' kan tih hi hmang ṭangkai chhunzawmin, president leh leader an neih kha chhunzawm leh thuai se.

Kan sawi ta sa sa, han thunawi zui ta ila. ‘Hâwp bawk, chawm bawk’ tih ṭawngkam lo chhuah ṭanna hi ka lo hriat dan chuan, kan Aizawl khawpuia pa hausa tak aṭanga lo lâr ta niin an sawi. Ani kha a hauhsak tehreng nen, tûk khat an chaw ei kha, an awmpui tlangval khan dâl (Mizo chuan dailuah kan ti bawk) kha a chawm a, chuti chung chuan a hâwp bawk ni tur a ni. Chutah a pu chuan, " Khatia i chawm a, i hâwp bawk chuan kan rethei hma ngawt ang, " a ti e, an ti. Chumi aṭang chuan ni maw, he ṭawngkam hi a lo lar a, kan hmang ta zel chu a nih hi.

Ṭawng hi ṭawng duh mi chuan nuam kan ti a, tumah, nang hi lo ṭawng ve suh in tih chi lah ni bawk silo. Chutihlaiin, mi ropui leh hotu langsarte ṭawng erawh chu mi dangte kan ṭawng ve ngawt ang hi a nih ve loh avangin a pawimawh a; mite’n an hria a, an lo chhinchhiah ṭhin a ni. CM-in thusawi a uar lutuk pawh hi a lo ṭha lem lo. Kei hi ka sual a ni ang, hotu tute emaw ṭawngte hi ka lo dawngsawng fuh lo ṭhin deuh a ni ang. A rei ta hle, hmanah kan Assembly Speaker pakhat khan ‘Alpha leh omega’ a inti a, ṭha ka ti lo hle a. ‘Lalpa, kan pu hi a va ropui ta deuh ve,’ tiin ka ṭawngṭai a. Amah leh an party kha ro an rel zui lo rei khawpin ka hria. Chumi hnu feah kan CM pakhat khan, ‘Pastor-te chu ram thil leh politics-ah ṭawng ve vak suh se, pulpita Pathian thu an sawi hi a tawk,’ ti lam deuh khan a sawi bawk a, a dik viau mai.

Amaherawhchu, inkhap titih ang zawnga sawi hi chu ṭha ka ti lo leh deuh va. ‘Lalpa, a thusawi dan hi i hria e,’ ti lam deuhin ka ṭawngṭai leh a, chumi aṭang chuan an sawrkar zui lo rei leh ta khawp mai. He thu ka sawi avang hian pastor-te hian party politics an sawi ve ṭhin tur a ni, ka tihna chu a ni lem lo; sawi tur nei leh vei te chuan an sawi ve thiang, tihna lam a ni.

Ringtute kan ni a, kan Pathian thu pawh hian ṭawng tam hi min zirtir lutuk lo; ṭawngtu aiin ngaithlatu ni turin min zirtir zawk mah a nih kha (Jacoba 1: 19). Chutih tho laiin, Pathian thu hril tura tih kan nia, ram hruaitu, politician hlawhtling ni tur chuan thusawi thiam nih tel a ngai bawk si. A tâwk hriat a ṭul a nih tak ber mai chu. Ka’n chawh pawlh ta deuh nuai e.

- Rev. Lalbiaksanga Chinzah