A ṭul phawt chuan thing kih hreh loh tur

Assam Rifles-te'n Aizawl lailia an awmna ṭhin an chhuahsan hnuah ram âwlte hman ṭangkai dan tur ngaihtuahtute thutlukna angin sawrkarin kumin March thla khan hma a la ṭan a. Kawngpui zauh a nih dawn avangin thing ṭhenkhat chu kih tura tih niin, tlem azawng kih tawh a ni. Thing kih a ni chu duh lovin tun April thla khan CESJ inti mi tlemtête'n hna thawktute an tibuai a ni.

CESJ hmalakna hi mi ṭhenkhatin an thlawp a, chutihrualin, thlawp lotu, kawngpui zauh duhtu leh sawrkar hmalakna thlâwptu an tam zawk fê tih a hmuh theih, social media hrang hranga sawi zuinaah chuan. Thing kuah lai thlalak pawh a lar hle nghe nghe a nih kha.

TV leh Youtube aṭangin CESJ hruaitute thil sawite ka lo hmu ve a. An thil sawiah ṭha tih ka nei ve tho nâin, a tam zawk erawh chu ka pawmpui ve lem lo; ṭhenkhatah phei chuan, 'An va â mai mai tak,' ka lo ti rilru nghe nghe.

AR hmun hlui hmanga kawngpui zauhin awmzia a nei dawn lo anga an sawi phei kha chu a mâwlthlak hi ka lo ti khawp a. A chhan chu, Aizawla lirthei che vel enkawlnaa ni khat pawh la che chhuak lo leh tawnhriat la nei lova ka rinte an nih avangin, khatia huai taka an han sawi piap mai kha chu 'mâwlthlak' ka ti a ni. Traffic police-te nen chuan an ngaihdan a inpersan viau âwm e.

Aizawl khawpui tlangdung kawngpui ber (main spine) kan tihah hian khawi lai pawh hi zauh ni se, traffic jam chungchangah awmzia a nei ang. Traffic jam tihtawp hmak hi chu thil theih a ni lo, khawpui lian zawk, kawngpui zau ṭha em emah pawh nasa takin traffic a jam ṭhin. Aizawl pawh hi traffic jam awm lohna khawpuia siam chu thil theih loh tluk a ni tawh ang.

Mahse, traffic jam hi tihzawm theih erawh a ni ngei ang a, chumi atan chuan kawngpui zauh hi thil pawimawh ber pakhat a nih a rinawm. AR chhuahsan ram hmang hian kawngpui zauh ila, engtin emaw tal chuan traffic jam a ziaawm phah ngei ang. Chuvangin, AR chhuahsan ram hmanga kawngpui zauh hi duhtu an tam zawkin a lang a, tihpuitlin ngei ni rawh se. Huaisen takin sawrkar kal zel se; khawpui leh a chhunga chengte ṭhatna tur a nih a, a ṭul a nih phawt chuan thing pawh kit ṭhen hreh suh se.

CESJ ho hi mi tlemtê an ni a, pawl din awlsam tak takte an ni, an ti. Mipui aiawh an ni lo a, AR ram chungchanga an hmalakna pawh hi (social media-a mi comment en chuan), thlâwptu aiin thlâwp lotu an tam fê zawk tih a lang. An hmalaknate mipuiin an thlâwp angin sawi zel tawh lo se a ṭha hle ang. Anmahni lansarhna tur leh khawi emaw aṭanga hlâwkna an hmuhna tura che chhuak bâk an nih hi ka ring lo a ni, kei misual hian.

Mizoram leh Aizawl hmangaih an inti viau mai thei a, mahse, hmangaih bertu an ni bik lo; hmangaih bertu tehna a awm lo. Ram leh hnam, Aizawl an hmangaih lo e, ka ti lo, an hmangaih pawhin ka ring. Mahse, mi dang, an ngaihdan ang ni lo ngaihdan nei, kawngpui zauh duh leh, chumi tura thing kih ṭhen a ṭul a ni tih ngaihdan neite pawh hi anni ang tho emaw, anni aia nasa mah emawa ram leh hnam leh Aizawl hmangaihtu an ni ve bawk e.

- Lalthlengliana