Immanuela

Krismas a hnai a, kan sermon pawhin 'Immanuela' a tinzawn lehfur tawh ang (Thuthlung Hluiah Immanuel/Hebrew - Immanuel, Thu­thlung Tharah Emmanuel/Greek - Emmanouel). Imma­nuela tih chu 'Kan hnena Pathian awm' tihna a ni tih hi kan sawi fo ṭhin a, mipui nawlpui pawh hian a awmzia kan hre viau tawh ang.

Isaia bung 7-ah hian  Israel lal Peka leh Suria lal Rezina ten Juda lal Ahaza bei tura an inthurual tak avanga Juda mipuite manganzia kan hmu a. Israel leh Suria hian Juda ramte nena inthuruala Assuria sorkar do an tum a, mahse Juda lal hi an inthurualnaah a tel ve tak loh avangin an thin a rim a, beih an tum ta a. 2 Lalte 16-ah leh 2 Chronicles 28-a kan hmuh angin Juda te chu an han bei ta a, Jerusalem chu an lut thei lo a nih hmel. Lalte buah hian Suria lamte hian Elath khua an lak thu kan hmu a, Chronicles buah chuan an che na hle tih kan hmu bawk a, Ahaza fapa Maaseia an thah thu pawh kan hmu (2 Chro. 28:7).

Ahaza mai bakah Juda mipuite an mang a ang a, lalṭhuthleng luahtu tura an ngaih ber (ni âwm tak), Maaseia hial an thah avangin Davida lalṭhuthleng pawh chu nghingah an ngai a. Isaia bua kan hmuh ang hian Israel leh Suria te hian an lal paihthlak a, a aiah Tabeela fapa lala ṭhuttir an tum thu an han hriat phei hi chuan an mang a ang nasa zual a, 'ramhnuai thingte thliin a tinghing suau suau ang hian tih­nghinin a lo awm ta a' a ti hial.

Ahaza fapa thah a nih a, Ahaza ngei paihthlak tumna awm chu Juda mipuite tan chuan a manganthlak ngei mai. Vawi tam tak Pathianin a lo sawi tawh 'David lalṭhut­thleng tihngheh' a tumna chu Pathian hian a sût leh ta mai em ni aw tih an ngaihtuah a. An hnam chu paihthlak leh ngaihthahin an awm ta niin an ngai hial ta ve ang. Chu mai bakah Ahaza aiawh tur anga an ngaih ngei mai thah a ni ta bawk nen.

Hei mai bakah hian an bul hnaia chêng, unau anga an ngaih Israel leh an hmelma lian tak Suria inthurual chuan an do a, paihthlak a, tihchhiat an duh a ni tih an hriatna chu manganna belhchhahtu lian tak a ni. A chhiahhlawh Davida hnena Pathian thutiam kha hetiang boruakah hi chuan rin ngam a har tawh ang a, Davida lalṭhuthleng tundin leh Juda lalram din ngheh zel pawh ngaihtuah a, suangtuah zui ngam a harsa tawh ang. Hetiang thlaphânna leh manganna hian Judate chu a tuam vel a ni.

Mahse Pathian chuan a thutiam hi lalram pahnih khat vel mai mai vanga tihnghin a, tlawlhtir a tum lo reng reng. Ahaza thlaktu tur an awm tawh lo mai ang a, tih hlauhthawnna chu hlauhthawnna awmze nei lo a nihzia tichiang turin fapa pêk a tiam a, chu chuan Pathian chu a thutiama a dinnghehzia a lantir a ni.

Zawlnei Isaia kaltlangin, 'Lo lungngai reng reng suh u. Davida lalṭhuthleng luahtu tur hi chu in hmai lo vang. Nakinah hmeichhe pakhat a la rai a, fapa a hring ang a, lalṭhuthlengah hian a la ṭhu dawn alawm. Israel leh Suria te lo hlau reng reng s'u' tiin a puang chhuak ta a ni. Ahaza chu an paihthla lo a; a lalṭhuthleng rawn luahtu tur pawh Pathianin a pe leh ngei a, Hezekia chuan a rawn thlak ta a ni. 

Pathian thutiam ṭhulhtir a, Davida lalṭhuthlenga Davida thisen kai ni miah lo ṭhuttir an tum avangin, Pathianin a awmpuizia lantir nan leh Davida lalṭhuthlenga ṭhu tur hi an awm reng dawn a ni tih lantir a, tichiang turin Pathian awmpuina leh a tiam 'Immanuela' hi an mamawh a ni. Kan thinlung leh kan ramah ngei pawh hian Pathian duh dan paihthla a, Kaisara laltir tumna a awm a, sual hian Davida thlah ni lo lal dang laltir a tum fo ṭhin. Chuvang chu a ni, Pathian hian 'Immanuela' hi kan hnenah a rawn tirh ni!

'Immanuela' tih awmzia chu 'Kan hnena Pathian awm tihna a ni' kan tih ringawt hi a ni mai lo. Immanuela tih chu Pathian miten tihduhdah an tawrh a, rahbeh leh nêkchêp an nih lai pawh awmpui a, tichak a, chhanchhuaktu tura Pathian awmpuina a ni. Thil ṭha paihthla a, dikna rahbeha a awm lai pawh thil ṭha leh dikna tungding tura Pathian awmpuina a ni. Beidawnna leh manganna kan tawh lai pawha beiseina min pe a, manganna ata min la chhuaktu tur, min awmpuitu a ni. Chu Immanuela chu Krista hi a ni.

Pathian chuan a mite chhan­chhuah leh chhandamna siamsak a tum êm a, chumi tur chuan zawlneite hmangin thu a lo sawi lawk a. Sual chuan Pathian thil tum dodalin, Davida chhungkua tihchimih tumin, Lalnu Athali leh mi tu tu emawte hmangin thah chimih tum mah se, chhandamna kan neih theih nan Pathian ruahmanna chu a chak êm a, min hmangaihna a nasat êm avangin zawlneite hrilhlawk chu a takin a lo thleng ta a ni. 

- Rochungnunga, College Veng