Mizo Kristian zingah BJP policy sawichhiat hawtu!

Tunlaia WhatsApp titi ngaihnawm ve mai mai chu, “Citizenship Ammendment Act kan sawisel a, Mizo­rama ruling party an lo thinrim em em,” tih hi a ni a; ka tel vena WhatsApp Group hrang hrang leh Facebook Group dangah pawh hei hi a thleng dikin a lang ta. 

Chuvangin, BJP policy CAA sawichhiat hi MNF sawichhiatna anga kan ngai tawh a nih chuan kan inen let a ngai tawh takzet a ni. BJP leh MNF an thawkho tihte leh MNF chu NEDA-ah an tel tih te, MNF chu NDA an ni tihte kha rei tak chu zep deuh roh khan a kal a, mahse MNF President ber khan Lok Sabha inthlan hma khan a pha lova, a rawn sawi chhuak ta a. Chuti chung chuan MNF hian BJP lam ṭang nih hi chu an la hreh ngang ngangin chumi nena sawi zawm pawh chu an duh lo. Mizo Hnam Pary ber mai Vaiah pawh Hindu ram din tumtu party nena inzawm chu inhmeh an inti lova, neutral pawhin inhmehin an hre thei lo a ni. 

Citizenship Ammendment Bill put luh a hun dawn ta a, MNF tan chuan ṭan hmun tur a rem lo tawlh tawlh a. A chhan chu MP campaign laia thu lian ber pawl pakhat chu CAB kha a ni a, candidate ṭhenkhat kha chuan, “Politics lam mi ka ni lova, mahse MP inthlana BJP leh BJP lam ṭangin hnehna an chan lohna turin Mizorama MP vote awm chhun hi Hindutva lo lam vote-tu a nih ngei theihna turin ka pen chhuak a ni,” te an ti ta siah siah a. Candidate ṭhenkhat phei chian, “CAB hi an titlang a nih chuan keini lam chuan Right to Secession Bill kan pu lut ve ang,” tiin BJP leh an thil tum chu huaisen mangkhengin an rawn do ta kha a ni a. Kan MNF MP candidate pawhin CAB an duh bik loh thu leh a do thu te, CAB hi Parliament-ah an bûk a nih chuan a vote loh tur thu sawi mai duhtawk lovin a do zawnga a vote tur thute a ziak ta a ni. 

CAB-in a huam tur a tih zim tak avang chuan kan MP chuan BJP laka lawmthu sawina atan CAB chu a vote ta rup mai a, mipui kan lungawi lovin kan rilru a na a, kan ṭhalaite an na ngawih ngawih a ni. Mizo zinga kan mi chhuanvawr ve siin BJP policy Hindutva tihhlawhtlinna hman­rua CAA a vote pui ta mai kha mipui rilru a na a ni. Tunah chuan CAA vote leh vote loh leh kan MP lam kha lo dah ṭha ta ila. Mipui nawlpui zingah Synod pawhin a duh loh em em CAA sawi chhiat apianga party pakhatin an lo sawifiah a, an lo ṭan tlat hi a ni ka hriatthiam loh chu ni. MNF martar kan tihte kha India (Vaiho) dotu an ni a, Hindu sakhaw ṭantu BJP phei chu an thawhpui duh a rinawm si lova, tuna CAA sawisela MNF-in an lo chhan ta zel mai hi an rilru a nat a rinawm. 

- MS Dawngliana