KHUALBUK VENGTU ANG MAI KA NI

Hlaphuah thiam Rokunga’n ‘Khual­buk vengtu ang mai ka ni, Sualin min bawm reng e’ a ti a. Hla hi zawng hriat thiam a har ngang a ni ang e; mi ṭhen­khat chuan an helh viau thin tlat mai. Rome ram pumah chhiarpui an ko a; Josepha pawhin Mari hruaiin Bethlehem a pan ve a. Mikhual an lo tam hle mai a; riahna tur hmun an chang lo. Josepha leh Mari chauh lo pawh hi khualbuk chang lo an awm nual ang tih a ngaihruat theih a. Chutiang hunah chuan khualbuk vengtu chu mikhualin an chim nasa hle ang tih a chiang viau.

Khualbuk vengtu chu mikhualin chim nasa hlein, bawm reng mah se mikhual a ni ve lo. Khualbuk vengtu a ni reng tho. Hlaphuahtu hian, “khualbuk vengtu angin sualin min bawm reng e” a tih hian a sual ve tihna a ni lo va; khawvelah a la awm tlat si a, a chhehvelah sual hmuh mai tur an awm ve reng tih a sawi mai a ni. “Khualbuk vengtu ang mai ka ni, Sualin min bawm reng e,” tih helhtute hian a hla thu hi pawnlâng takin an ngaihtuah a, an buaiphah ta niin a lang. An sawisel dan nia lang chu, ‘khualbuk vengtu kha misual a ni lo’ tihte hi a ni a. Kan tarlan tak anga hlaphuahtuin a phuah dan an ngaihtuah thlen loh vang a ni ang. 

He khawvela kan awm chhung hian sualin min bawm reng dawn a. Sual nia kan ngaih, mi dangin suala an ngaih si lohte phei chu a va tam dawn tehreng em! Chung thilte chu engtin nge kan tlanbosan theih ang? Hmuh phak loha hnawh bo theih an ni lo va; kan hmuh phakah, kan ban phakah, a thawm kan hriat phakah an awm reng dawn a ni. Hmanlai ata tawh inlâk hran a, thianghlim chin nia inngaite chauh inkhunghran tum hi an awm tawh thin a; an hlawhtling ngai lo. Mizoramah pawh inla hrang a, a hlawma khawsak tum an awm thin. Mahse khawvel an chhuahsan tlat loh avangin khawvel thilin a tlansan bik lo reng reng a ni. 

He hla, Khualbuk vengtu ang mai ka ni, sualin min bawm reng e tih hian ringtute dinhmun chauh a tarlang a ni lo, mihring leh khawvel dinhmun dik tak min hrilh a ni. Ngaihdan inang lo pui pui, hawi duh lam inang lo tak tak kan ni a. Keimahni ṭheuh hi tehfung bul leh a tawp kan ni a; chu tehfung chu keimahnia a tawp chuan inngeih takin kan khawsa tlâng thei a; mi dang chunga lek kan ching tlat mai hi kan buaina bul pakhat a ni fo. Keimahnia tehfung awm chu mahni intehna atan hmang lovin mi dang teh nan kan hmang a; kan inrel neuh neuh a; a rûkin kan inkâwk a; kan buai ṭhin. He khawvelah hian kan ngaihdan ang ngaihdan nei lo hi an awm kumkhua dawn tih hriat a ṭha.  Sual chuan min chiah piah reng a; min chiah piah reng dawn bawk a ni. 

Sual chu eng nge? He zawhna kan chhan dan hi a inang thei lo. Pathian thupek bawhchhiat hi sual a ni tih theih a ni a; mahse a chiang chuang lo. Joshua khan khawngaihna leh lainatna avangin Pathian Thupek zawm duh lovin Ai khuate kha zuah ta se, “Joshua chu misual” a ni mai ang. Vaiho zingah firfiak tak, bawngsa ei apiang vuakhlum tlak emaw ti pawl an awm a; hnam hnuaihnung leh sakhaw dang biain an tuar zauh zauh. Sakhaw behchhana mi zawng zawng chunga dan thuhmun lek kan tum hian kan buai ṭhin a ni. Sakhua hi mimal zalennaa innghat tur a nih chuan mi mal thil anga a kal a ngai a; huho thila innghat a nih chuan mimal zalenna nen hmehrem thiam a har hle a ni ngei ang; kan buai phah fona chhan hi mimal thil anga kan ngaih loh vang a ni fo thin. Hei hi Mizoramah pawh, kan khawtlang inenkawlnaah hian hmuh tur kan nei thei mai awm e. 

Mihring hi amah chauhin a awm hrang thei lo. A ngaihdan anga ngaih­dan nei ve lo te, a ngaihdan anga nung lo ten en an khawsaho lo thei lo va. Inang si lo awm khawm chu hrut rual kan ngai a. Kan inhrut rual dan erawh chu a tam ber duh dan a ni tur tihna a ni lo. Mahni chauha ngaihdan hrang nei pawh, a khawsak danin mi dang a tihbuai loh chuan zalenna pek a ngai a. Chutianga kan khawsakho theihna tura min phuar khawmtu chu dan ṭha tak chauh a ni. Dan reng reng chuan mi tin ang khata a huam a, ang khatin a tin tur a ni. A tam ber lalna ram leh a tam tam inhrosak theihna ram hi ram nuam a vang hle. 

Khawmpuina leh rorelna hmuna a phar thlu thei zawk nih avanga mi tin huap lo dan hi a ṭha ber kher lo va; zawhna inzawh kual aṭanga statistics duan chhuah a, chumi ṭanfung hmanga dan nawr thluk hi a him lo fo bawk. Mi mal hian mi mal a nihna a hum theihna tur, amah ni chunga a damchung a hman theihna tur ngaihtuah chunga dan siam hi khuareiah a lo ṭha ber zel a ni. Krismas leh kumthar a lo hnai a; hetiang hunah hian mi tam tak chu sualin min bawm zual ngei ang a; ram leh khawtlangin sual do pawl kan mamawhna a zual hle bawk ang. Hetiang hunah hian, sual kan tih leh sual kan do chhan hi ngaihtuah nawn a tha hle awm e. Mi hlimna kan itsik vang te, an tih ang kan tih ve theih loh vang mai mai te ni lo se a tha hle awm e. 

- Dr Lalchhuanawma Tochhawng