Kalphung thar sorkarah SDO tihchak a ni

Tun hma aṭang tawhin Sub Division-a sorkar aiawh enkawltu SDO (Civil) te hi an nihna tur ang ai hian chhawr ṭangkai an ni lutuk lo ṭhin. Chu thil chu Land Revenue & Settlement Minister hian hmu fuhin kalphung thar sorkarah chuan revenue administration tihchakna atan SDO (C) office hi hman tum a lo ni ta a.

Tun aṭang chuan SDO(C) te hian Asst. Commissioner of Revenue (a hmaa S.O. kan tih mai, Revenue Settlement Officer kha nikum December aṭangin a hming an thlak tawh) leh, Sub Registrar Officer (SRO) hna a keng tel tawh dawn. Amaherawhchu hei hi SDO (C) zawng zawngah ni nghal lovin, a pilot project atan Thenzawl leh Vairengte SDO (C) ah te tih a ni phawt ang.

Hetiang taka function tur erawh hi chuan naktuk mai aṭanga ṭan thut theih a ni lo va, Revenue lam staff tur te dah belh an ngai dawn a. Office hmunhmate pawh thawm ṭhat a ngaih dawn vangin sorkar chuan SASCI aṭangin cheng nuai 250 ve ve Thenzawl leh Vairengte SDO(C) tan hian a pe tawh nghe nghe.

SDO(C) office te hi a core function-ah revenue awmin SRO angin a function tawh dawn tihna a ni.

District Head-quarters-ah kal zel lovin heng Sub Town Thenzawl/Vairengte te hi anmahni SDO (C) ah revenue chungchang thui tak mipuiin an dawr thei tawh dawn a, hetiang anga department thuam chak kawnga ngaihtuahna hmangtu Minister hi a fakawm hle a ni.

SDO (C) office hian Revenue lama ki pawimawh a thawh turte chu:

1. Revenue officer tak tak, land settlement tak tak ti thei tura function,

2. Stamp & Registration hna pawimawh ti thei,

3. Revenue court mumal tak neih te a ni.

Ram lei leh hralh chungchangah pawh Sub Registrar Office (SRO), Stamp Sct leh Registration Act kengkawhtu SDO (Civil) cum Asst. Commissioner a nih tawh dawn avangin ram hralhah pawh 'sale deed' te a kutah dan angin a awm ang a. Chutiang an tih theihna turin nimin 23rd Jan, 2026 khan Revenue Minister leh Department lamin Thenzawlah hian workshop te neiin; Minister hian khawl, mit naute scanna turte leh kutzia (finger print) lakna turte a hlân nghal nghe nghe.

He pilot project hi a hlawhtling turah beisei ila, naktuk maiah function nghal thei mai lo mah se, hetianga officer fit tak tak an theihnain a tlin reng, duh anga sorkarin a hmang ṭangkai tawk lo ṭhin hi a uiawm a, mipui tana ṭangkai leh awlsamna, thil ṭha tak ni bawk si sorkar administration tichak zawnga kan ram hruaituten ngaihtuahna an hmang hi a lawmawm. Hun kal zelah tuna Sub Division pahnih chauh a enchhinna maiah hian tawp lovin; SDO (C) dang zawng zawngah te pawh hian tih chhoh theih ni se la, a duhawm hle.

- Hruaia Kawlni