Home Department hmalakna chhinchhiah tlak (8.12.2023 aṭanga July 2025 chhûng)

Sorkarna chelh hlim December 12, 2023 aṭanga July 2025 chhûnga tun sorkar Home Department hmalakna hi i bih ang. Law & order lama hmasawnna te, kuhva rah tawlhrutute tawmim dan te, drugs beihpui thlak a nih dan te chu tlâng hriat a ni ang.

Chîk zawka en chuan, thla 18 chhung lek hian danglamna nasa tak a awm a, Home changtu Pu K. Sapdanga hi mi thil chîk leh ti mai mai lo a ni. MJA President a nih lai pawha Mizoram district hrang hranga journalist pawl hrang ṭheuha awmte hmun khat (MJA)-a phuar khawmtu a ni.

Mizoram Police Service atan officer thar 8, ASI (Ministerial) 20 leh constable 259 lak an ni tawh a. SI (UB) 25 lakna tur a kal mek bawk.

Ruihhlo tam tak man a ni tawh a, local market rate-in cheng vbc 318.19 hu a ni. Hemi kaihhnawihah hian case 517 ziah luh a ni a, mi 573 man an ni bawk.

Ralthuam eng emaw zat man a ni tawh a, a vaiin 54 niin, a mu 28,005 man tel a ni. Hemi kaihhnawihah hian case 46 ziah luh a ni a, mi 59 man an ni a, man zingah foreigner 10 an tel.

Kuhva rah kg 19,78,338 man a ni tawh a, hei hi market-ah Rs 35,02,53,150 hu vel a ni. Kuhva tawlhruk kaihhnawihah case pakhat ziah luh a ni a, mi 231 man an ni. Case ziah luh loh ho zawng zawng hi Customs Preventive Force leh Deputy Commissioner te hnenah hlan chhawn a ni.

Expansion and Modernisation of Fire Services in the States scheme hnuaiah 15th Finance Commission aṭangin grant-in-aid vbc 40 hmuh a ni. Sum dawn tur hi central sorkarin 90% a tum dawn a, first instalment 30% hmuh a ni tawh. Scheme atang hian kâng thelhna bungrua leh fixed asset chi hrang hrang hmangin Fire Department thuam chak mek a ni.

In sa turte’n Fire NOC an lak ṭhin chu September 1, 2024 aṭang khan online hmanga dil theiha kalpui a ni.

Central Jail leh district jail dang pasarih sak ṭhatna turin cheng vbc 55 SASCI aṭanga hmuh a ni a, PWD-ah hlan chhawn a ni.

Subject Committee, Legislative Assembly-in January 2025-a Central Jail an tlawh ṭuma an rawtte tihhlawhtlin zel a ni a. Laboratory technician 1 leh staff nurse 2 rawih thar te chu chhinchhiah tlak zual a ni.

Home Guard volunteer-te ration April 2023 aṭanga tihtawp tawh chu July 2024 aṭang khan thla tin Rs 850 ṭheuh pek leh a ni. Home Guard volunteer-te hi bank, DC Office, kudam leh hmun hrang hrang 85-ah duty-tir an ni a, ṭangkai taka hman an ni.

Forensic Science Laboratory case hrang hrang 2,055-ah sample 15,662 endik tawh a ni a. Hei mai bakah hian misual man leh thiam loh chantir te 'fingerprint' 10,265 chhinchhiah a ni. FSL-a thawk tur hian LDC pahnih, Forensic assistant pathum leh group D pahnih lak thar a ni.

Mizoram FSL hi India ramah Integrated Criminal Justice System hmang tluantling hmasa ber a ni a; engkim hi paper tel hauh lovin digital file-a kalpui vek a ni. MHA sum pek hmangin mobile forensic vehicle 10 lei thar a ni a, 100% central fund a ni.

Tlipna

Ziah lan kher ngai lo, a taka kalpui mêk pawimawh deuh chu – ‘pute in sak tihbo' hi a ni. Hun hmasa lama pute in saa hna thawka police chhawr ṭhin chu a thâwm a awm ngai ta lo. Heti taka hun rei lo te chhûnga Home department-in hmasawnna a nei chho ta hi thil chhinchhiah tlak a tling.

- Zoa Tlau, Buannel Cabin