MPSC-in assistant professor an lâk kha

Mizoram Public Service Commission (MPSC) in Mizoram chhung college hrang hrang a thawk tur Assistant Professor an lak na result chu ni 1 April, 2026 ah a ti chhuak a. Group A chin hnalak rau rau ah Assistant Professor hna lak hi a khat a. Hetiang lam a kal te tan chuan thil lawmawm tak a ni ngei ang. An lawmpuiawm hle. Sorkar pawh hian mipui nena inhnim hnai reng zirtirtu (primary aṭanga college) leh medical lama thawk tur hi post hming phuachhawp deuh deuh a la ṭhin lo hian, a nghet hian la zing in, la thei zawk zel ta se kan state chhung a zirna leh hriselna lam hian a ṭha zawng in nghawng a neih a rinawm tlat a ni. Casual leh Centrally Sponsored Scheme (CSS) hnuaia thawk ṭauh ṭauh te avang chauh pawh hian kan ram zirna leh hriselna lam te hi a tlusawp lo mai mai ni te hian a lang. Dik tak maw?

Tun hnai a MPSC in college a thawk tur a lak ah hian a hlawm in subject hrang hrang 13 a post 31 (subject tinin post an neih zat a in ang lo a) atan interview turin mi 225 a ko a. Interview tur hian UGC Regulations 2018 dan zulzuiin hna dil te thlitfimna (screening) neih hmasak a ni a. Screening ah hian Academic Performance Index (API) hman a ni a. API hman a nih hian BA mark, MA mark, MPhil/Phd, NET/NET(JRF), Work Experience, Book/Journal Publication, State/National Award ten mark an keng vek a. Hetah ringawt pawh hian kal dan hlui Bachelor degree yearly (kumtawp a mark za exam tawp) a pass chhuak leh semester system hnuaia pass chhuak, university mark renna aṭanga chhuak leh chhuak lo te mark hmuh a inthlau thei viau mai a. Hei pawh hi en zui ngai tak a ni.

Tin, mi ṭhenkhat in competitive exam anga written exam tello a college a thawk tur Assistant Professor lak hi an sawisel fo ṭhin a. Chutih rualin UGC Regulations 2018 chuan written exam neih hi a phut kher lo a. India ram pum huap college/univeristies a thawk tura exam paltlang ngei ngei ngai All India level exam National Eligibility Test (NET) miin a paltlang chuan college/universities a thawk tur a tling tawk leh exam paltlang sa a ngaih an ni a. Phd degree nei chu NET nei lo pawh ni se, college/universities a thawk tura qualified a ngaih tho an ni thung. Amaherawhchu, NET pass hi college a thawk tur a qualification hniam ber a la ni chauh zawk a. Tunlai inelna sang tawh tak ah hian Doctor of Philosophy (PhD) te, Book/Journal Publication ṭha neih reng te, chawl lo a academic activities (seminar, research paper writing, project work, etc.) neih reng te hi college leh univeristies a thawk tur chuan thil pawimawh em em a ni mek zel a. Mizo zingah pawh India ram pum huap universities leh institute ṭha a thawk pha chu academic huanga taima tak an ni deuh zel awm e. Competitive exam ang a kum hnih/thum beih vaka inziah tling ang hi ni lo deuh in, chawl lo a kum tam tak taihmak chhuah leh beih fan fan a ngai a. Chuvang chuan miin an lo beih ve fan fan tawh na ti thlawn lo turin hnalak dan pawh uluk leh dik theih tawp a tih a ṭul ta ṭhin a ni.

Tun ṭum hnalakna ah hian interview hmang chauhin final result siam a ni awm a. Academic Performance Index (API) kan tih mai te hi Academician te thawhrimna, thiamna leh tunhma aṭanga beih hram hram peihna (consistency) atana tehna ṭha leh rintlak tak a nih teh lul nen. Candidate te API en tel lem lo a, interview hun minute 40 bawr vel aṭanga thutlukna siam mai hian nakin zel atan pawh Assistant Professor hna lak dan system ṭha lo, induhsakna thil awm thei a hring chhuak thei mai angem? tih te hi zawhna awm thei a ni awm e. Candidate te interview hi audio leh visual record a awm lem lo ni a sawi a ni a. Ti ṭha in ti viau pawh an tling lo thei a. Complain turin finfiahna (proof) a awm thei tawh si lo a. Buaithlak ru ve tak chu a ni! Post Doctorate degree nei, PhD degree, work experience, publication nei ṭeuh hnawl in, MA (NET) nei lak nawlh kha a theih ve tlat a ni.

A hria te sawi hmangin, tun hna lakah hian MPSC member pahnih Chairman na hnuaiah Interview Board pahnih din a ni a. Subject tin atana interview neih apiangin subject expert atan Professor senior deuh chin board ah hian an ṭhu ni a sawi a ni bawk a. Hetiang hi college leh universities hnalak a an tih dan phung a ni hrim hrim a ni awm a. College leh university ṭha apiangah subject expert a ṭhu tur hi an duh uluk in, dik leh thlei bik neilo tura an ngaih te ṭhut tir ṭhin an ni. Subject expert a ṭhu leh candidate kha inhne hnai reng, subject expert student leh a hnuaia zirbingna (research) lo ti tawh, expert in kawng hrang hrang a alo chhawr viau ṭhin tawh a ni thei a. Chumi avanga induhsak bik na a awm loh nan State Public Commission leh institute ṭhenkhat chuan state/institue pawn lam mi, candidate te hre lem lo subject expert atan hian an hmang ṭhin ni a sawi a ni.

Tin, India ram pum huap ang pawh in zirtir hna ah hrim hrim hi chuan subject thiam ngai bik a hnalak a nih ṭhin avangin, expert te hian hnalak kawngah subject expert ni lem lo, interview board member dang te hi an hneh (influence) thei viau ṭhin nia sawi te a ni ṭhin a. Midang an influence theihna hi dik lo taka subject expert ten an hman hreh lem loh chuan Assistant Professor leh zirtir hna lak ah hrim hrim system chhe tak, mahni duhsak zawngte tih tlin theih na ah a chhuak thei hial awm e.

Tun MPSC hnalak ah hian Mizoram chhung ami Professor te vek subject expert atan hian hman ni a sawi a ni a. Tin, candidates te pawh a tam zawk chu an zir tir chhuah te an ni awm e. Professor chin chuan rinawmna vawng nungin, an duhsak zawng interview a mark han pek ṭhat uchuak te an tih ngam a rinawm loh a. Tin, an hnuaia research lo ti tawh leh anmahni bel bul tlat tu candidate te an duhsak bik a rinawm loh bawk a. Tlawn lungawi mai mai theih loh Professor, dik leh rinawm taka candidate te mark pe ngam interview board ah an ṭhu vek in a rinawm a. Chutih rualin mahni student duhsak zawng tih tlinna atana hmang duh tan chuan kawng zau tak a inhawng ve thei tho em? Chutiang chu tun hnalak ah hian a awm em? tih te pawh zawhna awm thei, a la tu thinlung chauhin a hriat si a ni awm e. Hetiang ti duh khawp tura professional lo Professor an awm lo turah beisei i la. College a thawk tur atana interview mi 225 chuang interview MPSC in tluang taka an han huaihawt thei te hi a lawmawm in, fak an phu hle.

Mizote hi kan la tlem a. Han insawi han insawi hi chuan kan lo inchhung emaw, khawkhat chhuak emaw, kan lo inhre leh ṭhum zel! Tin, kan bul hnaia tap peih deuh chawt leh kan duh hun hun a kan tirh kal theih te hi chu duhsakna kawngah kan rilru hian a lo hre reng ṭhin. Hetiang thil avanga induhsakna hi tun hnalakah a awm lo turah ngai i la. Amaherawchu, MPSC hian college a thawk tur Assistant Professor a lak leh dawn chuan state pawn lam mi ngei Professor, candidate te hre sa lem lo subject expert atan hian ko lut tawh se a va ṭha in, Assistant Professor hnalak hian duhthu a va sam dawn em!

- John Lalsiammawia