Kan inlawmpui chiam ṭhin hi
Tun hnaiah kum 2026–2028 chhunga Mizoram Synod Choir member turte puan a ni. Chumi hma chuan veng leh pastor bial bil piah lam deuh huap zaipawl ṭhenkhata tel turte ruat thar a ni a; pastor bial eng emaw zatah bial zaipawl member inruat thar hun lai a ni bawk.
Synod Choir leh zaipawl dang dang, standing choir kan tih ang chia ruat tharte chu an awmna kohhran ṭhalai pawl branch-te'n lawmpuina thlalak (graphic) an siam a, an thehdarh a, status-ah an hmang suau suau a; tun hnaiah hmuh tur a tam hle.
Hetianga zaipawl huap zau deuh leh thlan bika tel theih hi a hlu viau mai. Mahse, ka rilrua lo awm ve daih chu, inlawmpui chiam chi em maw ni le, tih hi. Graphic siam a, social media-ah thehdarh chum chuma inlawmpui chiam chi-ah ka ngai lo deuh a, inlawmpui loin, duhsakna hlan mai a ṭha tâwk viau lo'm ni, ka ti. Chuvangin, kei chuan lawmpui loin, chanvo leh mawhphurhna sang a nih avangin a/an hlen chhuah theih nan duhsakna ka hlan ṭhin.
Kohhran upa atana thlan tlinte pawh hi an inlawmpui leh chiam ṭhin. Inlawmpui tur chi a ni rêng em? Mi hi kohhran leh pawlah chanvo pek an nih hian an lawm viau ṭhin em ni aw? Kohhran upate hi a tlangpuiah chuan an châk leh nih an duh pawh ni loa thlan an ni a, thlan tlina te tan a lawmawm kher lo mai thei. Ṭhenkhat chu an lawm lo zawk thei a, pawm loh ngam si loh vangin an pawm mai pawh a ni thei. Lawm lêm lo na nâ nâ, lawmpui ṭâlh chi a ni lo. Pastor/pro.pastor te hi chu nih duha dil an ni a, an tan a lawmawm em em a, mi dangte pawhin kan lawmpui tur a ni. Pathian thuah pawh, 'Lawmte chu lawmpui ula, ṭapte chu ṭahpui rawh u,' (Rom 12:15) tih a nih kha.
Chuvangin, mahni duh thlan ni miah loa thlante leh ruatte lawmpui chiam hi a fuh lo thei; a mawi lo deuh thei bawk. Mi fel leh ṭha, tlawmngai leh ṭhahnemngai, kohhran upa ni se ka tih em em a tling hlauh a nih chuan, amah lawmpui loin, keimah ka lawm thu hrilh ta ila, duhsakna hlan bawk ila, hei hi thil nih dan tur âwm tak a ni. Chutiang zelin kohhran leh khawtlanga pawl eng eng emawa chanvo chungchangah pawh a ni.
Hetihlai hian, kohhran upa nih duh leh châk em em, KṬP, ṬKP, etc. hruaitu nih châk em em, YMA, MHIP, MUP, etc hruaitu nih chak êm êm an awm thei a; kohhran upa leh pawla hruaitu nih tum ru ngar ngar an awm thei ve tho. Chung mite chu he ka thil sawi hian a huam lêm lo.
Kohhran upa atana thlan te, KṬP, etc. hruaitu atana thlan te, eng standing choir emawa tel tura ruatte hi lawmpui chiam loin, an rawngbawlna leh mawhphurhna te ṭha taka an hlen theih nan duhsakna hlan mai hi a mawi zawk âwm asin.
Tunlaiah khawl lam thiamna a sang a, social media a chak tawh a; awlsam takin phone aṭang ringawt pawhin thil a tih zung zung theih tawh. He remchanna leh awlsamna ṭha tak hi hman ṭangkai tur a ni a, mahse, hman ṭangkai tum lutuk vanga hmanna tur zawn ruai kher erawh a ṭha kher lo. Thil hi a hmanna tur kan zawn lutuk chuan, chêtsual leh mualpho a awl! Tih âwm leh mawi a ni em, tih ngaihtuah chungin, a thu ziah dan pawh fimkhur a ṭha e.
- Zoramchhana