RUANG THAWN LEH KAN MLA-TE

Kan MLA-te hlawh chu zir chian a ennawn chhoh mek a ni a. A zir chiang tura ruatten an zo thawkhatin session hunah an thlirho dawn ni awm tak a ni. Inthlan hma lam thil leh an campaign au hlate ngaihtuah let chuan kan MLA te zingah hian hlawh tih pun duh lo awm awm tak an ni a; mah se, kan sawi leh ṭha kan tih anga awm hi a lo har a ni ang, MLA-te zingah lirthei thar man la duh lo an awm awm pawh kan hriat leh tak loh hi. 

Inthlan dawn hnaiha kan biak phak tawka in phah hniam hmante pawh kha MLA an han nih takah chuan ngaihtuah tur an lo ngah ta em em a; min be hman zen zen ta lo. Amaherawhchu, anmahni lam hman lo viau mah se kan aiawh tura kan thlante kha an nih miau si avangin biak ngei ngei ṭul chang a awm a; dawhthei leh inhre thiam taka kan inngaihchan tawn a ṭul a ni.

Intodelh chuang lova ramin hma a sawn hret hret rualin mipui lam pawhin hmanraw changkang neih lamah hma kan sawn ve zel a. Thingtlang mipui, damloh nikhuaa ṭhenawmte ngeih ang hmawm mai mai ṭhinte pawhin mahni sub-centre thlawh khumin khawpui lam kan pan ve ta zel a. Pawisa neih sa nei lo chung pawhin kan natna ten a ur thluk takah chuan loh theih lohva khawpui lam damdawi in pan a ngai a; rinna chak lo te pawhin Pathian thiltihtheihna beisei leh Amahah rinna nghat chungin a rem rem kan puk mai a ni. 

Inthlahrung tak chungin Aizawlah laina hnai kan dap a, private damdawi in tlin lote pawhin Civil leh Zoram damdawi in lam kan pan tawk tawk a, kan duh ber damna lah chu kan thu a ni der si lo. Khatia kan vauchher ber Health Care private damdawi in lama hman theih a nih tak lohah khan mi harsa zawkte chu kan chan a chau rak rak hle mai a; thawk chhuaktu ber tan phei chuan damloh ngam pawh a ni meuh lo ve. Civil leh Falkawn damdawi in lam pan vek a rem bik si lo va, huphurh chung chungin private damdawi inah kan inenkawl a ngai a, damna lam ai mah mahin inkhul chhuah dan tur lamin kan rilru a luah hneh a. Dam duh siin damdawi ina awm rei mawlh kan hlau va, in lamah a inenkawl chhunzawm theih tawh mai ang kan ti kan ti mai a ni. 

Kan sawrkhar thar au hla pakhat - health care ṭha mi, private damdawi in lamah pawh October thla aṭanga hman theih tur an tih kha nghak­hlel takin kan thlir reng a ni. Hmanni khan Pachhunga College lama ka zirpui ṭhin MLA pakhat nen kan titi a, kum khat em pawh a la MLA hmain a bial chhungah ruang 31 a thawn chho tawh a, cheng nuai thum chuang zan a insenso tawh thu min hrilh. Ruang thawn nana MLA kan pur leh beisei ṭhin hi mi tam tak duh dan a ni lo va, an sawisel fo. A sawiseltute sawiselna hi a dik lo ve pawng tih ngawt theih a ni lo va, chutih rualin mamawhtute mamawhna hi hriatthiampui a ṭul ve tho mai. 

Kan MLA-a ber hian a bial chhung mite dinhmun chu a lo hre chiang ngang mai a. Inenkawl buai vak lem lova thi te chu ni se mahni thisen zawmpui leh lainate ruang hawnna sum nei lo an awm kher lo vang. Mahse, a tlangpuiin an neih zawng zawng bakah puk chawpa lo inenkawl tawh an nih ṭhin avangin chhung leh khat han pur tur chuang an nei tawh lo va, sum khawrh chhuahna tur an hre tawh bawk si lo va, ka tih mai a ngai ṭhin a ni a ti. Ṭanpui zel a tum dan leh ruang thawnna tur motor a neih tak hial thu a sawi chuan ka hnuk a ti ulh teuh mai a ni. 

He MLA hian thingtlang mipuite dinhmun a hre chiang hle a, fak leh chawimawi a phu hlein ka hria. A bial chhung khuate chu km 230 zet a hla te an ni a. Keini Aizawl aṭanga khawchhak lam km 45 leka hlaa awmte pawh hi ruang phurh haw dan turah kan buai fo a, kan MLA/ VC te kan pur chang a tam mai a ni. Kan MLA/ VC ten min tihsak chang chuan lawmthu sawina hi kan uar thiam khawp thung a, a titu tan pawha inchhirawm lo tak turin kan sawi uar 

ṭhin. Hetiang kan nih mek lai hian chhungkaw khawsak pangngai ve tak, chhung leh khat ruang hawnna tur nei zo awm tak tak ten MLA/ VC te an phut erawh chuan hnung lamah kan sawi zui ve tho ṭhin a nia. 

Hetia MLA ṭhenkhatten an bial mipuite harsatzia thinlung taka an hriatthiampui vanga an tih tura ruat pawh ni lo an tih lai hian ṭhenkhat chuan lawm vak lo chungin, phun chungin, hnar ngam loh vangin an ti ve mai thei bawk. Ruang thawn hautakzia leh a beiseituten an beisei tlat si avanga tih loh chi ni si lo ang chite pawh hi kan inhraitthiampui tawn vek ang chu. 

Engpawh nise, mihring kan nih chhung chuan chhiatna vawrtawp kan tawrh laia min ṭanpuitu chu tute pawh ni se kan theihnghilh tawh ngai lo a nia. Kan MLA-te pawh hian an bial chhung mipuite tana theih leh phak tawka ruang thawnna an ngaihtuahsak hram hram hi malsawmna an dawn thleng pakhat chu a ni ve ngei ang le. 

- R.Lalfakawma, Seling