HAWIHHAWMNA

Mi hawihhawm han tih hian mi Polite tak, mi te tana inhawng tak, induh lo te ti ta ila, sawifiah zo lo deuh mah se; an bula awm chu a nuamin a lungawi thlak ṭhin. Kan pi leh pute chuan “Lampui chang khatah mi an be chhe ngai lo” te an lo ti a. Kan pi leh pu te khan mihring awmzia hi an lo chikin, an lo hre chiang mang e. 

Kan han bazar a, dawr nghaktuten nui sanga min lo chhawn chuan lei tum lo deuh pawh hian kan lei leh nge nge ṭhin. Dawr ṭhenkhat thungah chuan min lo en ṭha duh lo a, thil zawh lahin a rul tawk chauhin mi chhang a, ka lei tum ngei pawh ka lei loh chang a tam mai. Kan upaten “Ṭawng­kam ṭha-in sial a man” an lo ti daih tawh. Hawihhawmna hi mi te hneh tura ralthuam ṭha ber a lo ni e. Min hawtute huat duh ve tlat loh a, an chunga hawihhawmna lantirna tluka hnehna ropui te hi a awm chuang lo. 

Mi biak duh loh neih tlat te, huat neih tlat te hi mahni kan in ti hre awm a, kan in hrem mai mai a ni. Mi hriat lem loh hian kan hah ṭeuh zel. Mizote hian he mi kawngah hian zir tur kan ngah khawpin ka hria. Dinhmun ṭha deuhah kan han ding dek dek a, biak kan har nghal mai a, hriat duh loh kan ngah ta hle mai ṭhin hi, thil ropui tak chu a ni lem lo. Mi an ropui a, an tlawm poh leh an zahawm zawk ṭhin a lo ni. 

Mi thiamna sang leh mi ropui tak pawh ni se, a inlak Vakul viau chuan mi ngei a hlawh mai mai a ni. Pu J.Thanghuama Politics-a a hlawhtilnna em em chhan chu a hawihhawmna kha ni. Ropuina leh thuneihna hmanga mipuite laka in lek ṭhin te hi chuan rei an daih ngai lo. Hitlera te, Idi Amina te, Gadaffi a te etc. an hunlaiin miten an hlauh avangin ropui deuhin lang mah se la, an hun hnuhnunga dinhmun chu rapthlak tak a nih kha. Chu tih laiiin, Mahatma Gandhite, Mother Teressa etc. te hi chu mi thinlungah an thi thei lo, tun thlenga mi te ngaihsan leh ngainat an hlawh a ni. Midangte tana kan duhsakna kan lantir tam poh leh kan tan malsawmna a lo ni zel. 

Khasi ramah khuan NEICC Youth Assembly neiin vawi 3 lai ka kal ve tawh a. Min lo mikhual dan te khu hrilhfak a tlin, an hawihhawm kher mai. Chief Guest kan ni ta emaw tih awl tak a ni. An mikhualte tan hian chhiahhlawh ni mai awm tak hian an inphah hnuai thiam niin ka hria, an zahawm zawk. Mizo zingah hawih­hawm leh fel tak tak an awm tawh laiin, mi ṭhenkhat hi chu kan la ngawng viau. Kum 25 chuang vel kal ta a kan zinna vela kan khaw kal pelh ṭhin pakhat chu khaw ṭhang lo tak mai hi a ni. Vawikhat chu ka zawt ta a, ka motor chuanpui te “He khua hi ava ṭhang lo ve, kawngpui tlang dunga awm a ni ve si a” tiin. Anni chuan “He khua hi mak deuh an ni. Hman deuh phei kha chuan an khua hian mikhual hi an nei duh miah lova, an hnar ṭhin” tiin min chhang. 

Isua kha keimah­ni tan a inhmang ral a ni. Pathian hian mahni tan chauha nung turin min siam lo. Midangte tana thil kan ti ni a kan hriat hi a nihna takah chuan mahni tan vek a lawm lo ni. 

- Reuben Lalnunthara Hnamte