RUIHHLO–DO
Ṭhian duh tak te u, tunlai kan ram dinhmun leh kan ṭhalaite khawsak danin kan khawtlang nun a tihṭawphnawkzia hi ngun takin in dáwn ve ṭhin em le? Kristian ram kan ni si a, hmun tinah Pathian biak in lian tak tak a ding ṭo lawt fer fur a, khawpui daifemah gospel camping centre a awm thluah bawk a. TV leh Youtube channel hrang hrangah sermon ṭha leh nung tak tak ngaihtlak tur a tam hle bawk.
Mahse, kan khawtlang nun erawh chu ruihhlo ngaite’n kawtthler lûn laiah zahpah nei lêk lovin, khûp dul hniang hnuangin, ar pûl tur ang maia meng diar duar chungin an in-sehmur tuau tuau reng mai si a. Zu rui ṭawp tak tak kal ṭha thei lo lah chu an tam narawh e. Eng vang nge ni le?
Kumsûl tam a vei ta e; sawrkarin theihtawp chhuahin Excice force te, Police force te, YMA, VDP, JAC, kohhran leh NGO-te nen beihpui an thlak chung pawhin phûng velh an sawi ang maiin an pung hluai zawk zel mai si a. A rui mekte leh ruih tur zawng mekte an insûlpêl zut zutna khawpui hi Kristian ram za zelah, kum 2011 data-ah chuan 87.16% awmna khawpui lian ber a ni lawi si. Ram dang kan vei a, missionary kan tirh chhuah mup mup lai hian, kan ram riang tê hi chhungkua leh khawtlang huapa ruihhloin a awpbeh mek kan ni lawi si. Tu nge mawhphurtu chu ni ta ber ang le?
Ruihhlo ngaite ṭawngkam ngei ka hriat chu, “A tirah hetiang ruihhlo hlauhawm tak hi kan khawih thut bik lo a, kan naupan laiin in chhung khurah nu leh pate meizial, kuhva, sahdah, etc. an adict hmasa a, an tih dan chu a rukin kan lo copy ve zel a. Kan ṭhiante nen khawlaiah kan ti ru chho zel a, kan lo ti rei tulh tulh a, kan inrin loh karin drug addict-te bulah Setana’n min lo hruai lut reng mai a lo ni a. Addict hote lah chuan thiam takin min han thlêm a, ‘Ti ve chin mah teh, a nuam lutuk, Paradise-ah i thlâwk lut delh delh dawn nia,’ tiin min thlêm a. Mahse, Paradise a lo ni aw zawng lo, Hremhmunah min luhpui ta zawk a, kan tâl chhuak thei tawh si lo a ni,” tiin min hrilh.
Kristian thurin innghahna Bible-ah chuan, dan bawhchhiat vanga mihring suala a tluk hnuah Pathianin khawvel zawng zawnga a thutak puang chhuak tura a missionary tura a thlan hmasak ber chu Jakoba chhungte, Israela thlahte kha an ni (Exudus 19:5).
A hnam thlante hnenah chuan, mi zawng zawng zawm tur, a tel loa ni khat lek pawh kan awm theih loh, dan ṭha famkim–Thupek 10 a rawn pe a. Pathian kut ngeia ziakin, a aw ropui leh ṭihbaiawm takin a chham chhuah vek hnuah lungphek pahniha ziakin Mosia kutah a hlan ta a ni.
Lungphek pakhat zawka dan 4-te hi Pathian hnenah chauh a hman thei avangin, engkim siamtu (creator of universe) worship-na tur bik liau liau a duan an ni a, kan mihringpuite lakah hman theih a ni lo. Tin, dan dang parukte hi chu Pathian hmangaihna nunpui chungin kan mihringpuite laka hman tur an ni ve thung a ni.
- Lalṭhachungnunga Tlau, Ph. 9774410287