MPSC assistant professor lak dan sawi zui hlawh kha

13th May, 2026 Vanglaini article pakhat John Lalsiammawia ziah kha ka lo chhiar ve a, thil ni thei leh awm thei a rawn thur chhuak nual mai a, ngaihtuah zui ngaiin ka hria a. Tichuan, Facebook leh social media dang vela MPSC assistant professor hna lak miin an sawi leh comment zui dante ka en kual nghal a, chu bakah, a interview leh he lama kal mi ka hriat deuhte ka theih ang ang ka zawt kual a. He article hi han thai ve ka duh ta a ni.

Kan hriat ṭheuh ang leh, John Lalsiammawia pawhin a lo ziah tawh ang khan, MPSC hian India ram university leh state college ten zirtirtu an lak dan criteria angte chu zawmin notification an chhuah a. Post 31 lak tur (subject hrang hranga a ruah dan erawh a inang lo) atan mi 225 interview tura koh an ni. He interview tura an kohte hi chu Academic Performance Index (API) score an tih fo hmanga teh an ni awm a. Chu chu Ph.D/M.Phil, Net/JRF, research publications in peer reviewed journals, teaching experience leh academic background BA level chin aṭanga teh ni te pawhin a hriat.

Chutianga an mi thlan chhuah bik mi 225-te chu MPSC member pakhat a chawlh chiah avangin member 2-te room hrangah insemin, expert 2 MZU leh MCTA (college professor) aiawh pakhat ve ve bakah, observer atan MZU lam mi professor pakhat awm telin, an vaiin room tinah member 4 vel zel ang ṭhuin interview an conduct a ni awm e. Tun ṭum hi Mizoram college aiawh professor-te hetianga interview-a official taka an koh vawi khatna a ni hial mai thei, MCTA hmalakna ni ngei pawhin a rinawm. MZU lam erawh a tlangpuiin Mizo professor vek an ṭhuin a rinawm a, hnam dang an ṭhut hriat a ni lo.

Interview ni tur department azirin ni záwnin an ko zung a nih hmel a, kha erawh kawng awm chhun a ni miau a. Tichuan, chuta interview-te chu a tlangpuiin minute 30-40 bawr interview room lamah lo hrual niin, chuta ṭang chuan an result siam tawp a nih hmel a; an API score khan awmzia a nei zui tawh lo a nih hmel bawk. Hei hi Mizoram lama kan hman vawi khatna a ni hial mai thei. API score tel loa interview hlanga MPSC-in assisstant professor a lak ṭum khatna a nih hmel a nih chu. A ziaktu hmasa kan sawi khi chuan hei pawh hi ennawn ṭul a ti viau bawkin a lang. Chung interview turte chu practice teaching minute 5 bawr ṭheuh an nei a ni awm a, an topic duh zawng lecture an pek hnuah zawhna hrang hrang an dawng ta ṭhin a ni.

An sawiselna hrang hrang en hian, an sawi pakhatnaah chuan expert-te hi Mizoram pawn mi, interviewer zinga an zirlai chhuak emaw, paper ziahpui tawh leh hriat nei sa nei lo ni se tih hi an duhthusam lian ber leh John Lalsiammawia article kan sawi tak pawhin a tawp kharna kha a ni. A chhan an sawi tam berah chuan, Mizo chu kan la tlem a, inṭhenawm lêt lêt, kohhran khata lawi emaw, khaw khat leh mahni college chhuak mai bakah zirlai chhuak, a bikin PhD thlenga an lo supervised tawhte chu duhsak loh hreh em em kan nih hmel si hi a ni. Tun ṭum hna lakah pawh hian Johna thuziak ang bawk chuan MZU professor an ṭhu deuh vek a nih hmel a. Chuti a nih chuan MZU zirlai chhuak tan chance a ṭha vâwng nghal hlur a, nei leh nei loa phai lama lehkha lo zir ve te, thiam zawk avanga India ram university ṭha a lo zir chhuak ve te tan phei chuan a thanatthlak ṭhin thu an sawi a, chance an nei chhe thei viau a ni awm e. Tun ṭumah tak erawh mi complain an hre deuh nge, an chawhpawlh deuh e chu an ti bawk. Chuvangin, pakhatnaah chuan, expert hi Mizoram mi emaw, Mizo zirlaite nena inhnehnaivai ni lo se la a fair ber ang em tih hi interview hmachhawn tam zawkte sawi chu a ni.

A dawt lehah chuan, state college (MCTA) aiawha expert-a ṭhu vete pawh hi an mahni college chhuak duhsakna leh an naute hre zui a awm theih tho tih sawi a tam leh hle bawk. Mizoram college lian ve tak leh lar ve tak pakhata principal hmingṭha deuha an sawi pawh academician tam takin an ngaisang dêr lo! A chhan chu, a principal laiin a college-a guest faculty leh a alumni tan lo chuan chance a chhe lutuk tih chu an sawi nasat a ni. Interview a fair tawk lo an ti a nih ber chu.

Chutiang chuan MZU lam expert chauh ni lo, MCTA aiawh pawh chuan bias nasa tak a neih theih si avangin, expert hrim hrim hi chu Mizoram aṭang ni lo se, emaw, Mizo ngei hman tel duh pawhin college professor kher lo, MPSC member-te rinngam mai emaw, state danga thawk Mizote zinga mi emaw, kawng hrang hrang ṭha leh felfai zawk sorkrain a ngaihtuah a ṭul tak zet awm e.

A dawt lehah chuan, Mizote zingah pawh pu chuam leh nau chuam hi vai ho ang maiin a tam ṭan hlein an sawi. Academician chhungah politics a lo tam ve theih thoziate an sawi nasa. Paper inziah ṭâwm ṭhang deuh te, PhD lama lo in supervised tawh te, master kal lai aṭanga pu/pi te hnung lo zui peih leh in volunteer taimate duhsak hlawh an nih dan sawi a tam hle. Work experience a pawimawh si a, chu experience nei tur chuan college emaw, university-ah an duhsak zawng guest faculty-ah an la a, chung mite chu PhD leh iloah seat an chang zui a. Hna nghet lak hunah ni se an pi/pute interview board-ah expert an nih zui chuan an lut leh mai bawk a. Phu taka tling nia kan inngaihna phênah hian rim taka lo inchhawr tawhna leh intlawn lungawi tawhnate a lo tam thei hle a ni awm e. Professor bias leh tirhlek neih nuam ti tak tak Mizo zingah an tam ve tawhziate an sawi nasa a. Heng ho kianga an ui khawi anga tâp chawt ho hian hna an hmu zui zel bawk ṭhin nia an sawi avang hian, Mizo ni kher lo expert atan a ṭul chho viau mai thei.

MPSC member-te chu Chairman-in interview lamah mark ken nei tam ber mah se, expert-te thu an hnial tak tak ngai loh thu an sawi nasa hle a. Expert-te ngei pawhin an ṭhut ve china an recommend an la tlin loh ngai loh thute sawi an awm zauh bawk ni tur a ni. MPSC member-te chu MCS leh IAS retd te an ni nuk a, anmahni insitna emaw avangin expert-te kutah an pe pumhlûm ṭhin nia sawi awm bawk hi a fuh lo mai thei, expert kha a duh chuan a corrupt thei tlat a nih chu.

Written exam-te hi sawi a tam ta viau a, MPSC hian India ram state tam zawk tih ve loh, state pali vel bawr lekin an tih chhoh state service laknaa optional paper tihbo pawh kan ti ngam tho a, state dang tih dan ang kher ni loa fair zawka assistant professor lak dan ruahman hi MPSC hian ngam leh se a ṭha hle ang.

Tun ṭum hna lakah pawh hian a thiam leh fel te chu tling tam zawk turah ka ngai a. Mahse, science (a subject mal chuan sawi lo ila) lamah te pawh screening paltlang aṭang tawh khan RTI Act hmangtea ringhlel taka zawhna a lo awm tawh ni ten an sawi a. Tun ṭumah pawh hian final result-a tlingte leh an department expert-a ṭhute hian inzawmna eng emaw sawi zawm tur nei lo hram se ka ti hle a; chu erawh a interview-a ten an hre turah ngai ila. MPSC a lo insiam ṭhat leh zawk nan hengte hi thai lan ngei a ṭul ka ti ve tlat a ni.

MZU leh PUC hna lak pawh mipui nawlpuiin kan ngaihven phak loh avangin sawisep a tam duh hle ṭhin, tun hma phei chuan an ti ve tlat a. Assembly hna lak lah kan hriat ve meuh chuan chhungkaw bil office a lo ni ngawt tawh bawk. Heng zirtirtu ho, hlawh tam si, lehkha zir rei ngai bawk site hi fair lo taka nau chuamte an pu chuamte’n an lakna mai mai a nih chuan ṭhalaite beidawngin kan siam mai ang tih a hlauhawm e.

A bik takin tun hnaiah MPSC a che chhe em em a, member-te hi tun generation changkang tawh tak siah chuan an la nawi ber ṭum a ni hial ang em? Heti taka hmingchhiatna thla tin deuhthawa an nei chung hian Chairman pawhin bânna a thehlut mai lo hi mak ka ti a. An hna lak pawh a fair ang emaw chu tih zawhna kan nei rum rum hial thei nia. Inthlahdah taka khawsa tur inhlawh sang tak tak an la lo asin maw le. Controller of Exam leh Secretary thlengin an demawm ṭhin viau ka lo ti a, an in siam ṭhat a ngai. Sorkar pawhin hma la se la a ṭha khawp mai. MPSC chungchang chhui tura an ruat Pu Manzuala, IAS retd kha MPSC Chairman a nih tawh avangin a bias hle emaw ni aw? MPSC tisual thei meuh loah a chhuah a, hei, tunah lem MPSC lo nawizia hi a lang zel zawng a nih hi. Pu Michael Manzuala meuh pawhin a sawi mâmsak ngam ka ring tawh lo a ni.

Chuvangin, kan ram ṭhalaite hian sorkar hna kan beisei nasa em em a, chung latu atana kan rin ber leh a dang pawh awm chuang lo MPSC hi a insiam ṭhat a ngai a, mipuite rin ngam a nih leh a ngai. Sorkar lam pawhin assistant professor lak dan hi ennawn leh se la, hei aia fair leh rintlak zawka interview conduct dan te ngaihtuah se la, tehkhawng rintlak zawk hmangin hna hi lak ngei ni tawh rawh se.

- Rinsanga