Ex-CM Hawla tel lova kal ngaihna hre lo Mizoram Congress

Mizoram political history kan thlir lêt a nih chuan party hlun leh rinrawl ber ni ṭhin, ram lo hruai hrep tawh leh experience ngah tawh inti êm êm Congress party hi kan hmu hmasa ber ṭhin. Kum tam tak chhûng Mizoram politics-a 'king' lo ni tawh, sorkar siam dan leh ram kalpui dân hria inti ber party an ni a. Mahse, vawiin hian an dinhmun a chhe ta hle mai. An hruaitu hlun leh an party khai dingtu pawimawh ber, Ex-CM Pu Lal Thanhawla’n a chawlhsan hnu hian an hmelhmang a danglam tawh hle a; hruaitu mumal nei lo ang maiin an nawi tial tial a ni.

Tun hnai an chet phung leh sorkar an beihna hmanruate kan thlir hian thil pakhat a chiang hle. Policy thar leh hmasawnna kawng fiah tak mipui hmaa chhawp chhuah aiin thuthang satliah, ‘hriat thawi' leh 'rin thu' hmanga sorkar beih hi an thupui berah a lo chang ta zawk a. Hetiang political party hlun, ram lo hruai tawh ṭhinin rin thu leh hriat thawi satliah ringa politics an khel ta mai hi a tlawmthlakin, an beidawnna thûk tak lan chhuahna a ni.

Congress hruaitute hian politics khelh dan phung thar leh rintlak an chhawp chhuak thei lo a nih chuan, an nihna ang hian reh zui hmak mai se, an tan a mualphothlak loh zawk ang. Political bankruptcy nena hmingchhiatna thupui vawrh chunga an kal zel a nih chuan, mipuite lakah zahawmna leh rinna an hmu tawh ngai dawn lo a ni. An party hlunna leh zahawm tak kha hetianga nawi hian tawp lo se a duhawm hle mai; mahse, tuna an hmelhmang hi chu beidawng au râwl a ni tawh si a ni.

Central leh Delhi: Congress beidawnna leh leadership gap

Central politics-ah pawh Congress hian hruaitu mumal leh rintlak an neih loh avangin mipui hmaa policy thar zawrh aiin sorkar lai beih nan thuthang lawi lo leh thu dik tawk lo (fake narrative) vawrh chhuah hi hmanraw berah an hmang fo tawh a. He 'leadership gap' lian tak hian sorkar hmalakna dik tak sawisel aiin, Prime Minister leh hruaitu dangte mimal taka beihna chauh a hring chhuak a, chu chuan neutral voter-te rilru a hlattir hle a ni.

Delhi-ah kum 15 zet sorkar tawh mah se, tun hnuah Assembly seat khat pawh la zo lo khawpin an tlahniam a; hei hian an party identity leh inrintâwkna an hloh tawhzia a tarlang chiang hle. Mizoramah pawh he 'Central style' bumna hmang hian mipuite hruai kawi an tum ve mek a. Mahse, tualchhung mipuite hian thu dik leh fiahna tel lo politics chu an lo hre chiang ve tawh si a. An hruaitu hlunte mimal nungchang vanga an 'legacy' chhe mek hi chhan chhuah a harsa tawh hle ang.

- Thangtea Thawmte