Sawiselna hnehtu thawhrimna

Kumin April ni 21-a Aizawl Municipal Corporation (AMC) inthlanna neih hma lawk khan "Tu nge Aizawl khawpui enkawl tura kan duh" tih hmangin article ka ziak ve a.Aizawl khawpuia chengte chu mi changkang zawkte leh kawng engkima zokhaw lam entawn an nih avangin inthlanna entawntlak (model election) lantirna hun atan hman rawtna te ka ziak a.Kha inthlan kha entawntlak inthlanna a ni em tih chu ngaihdan hrang hrang a awm thei awm e. Rorel lai party apiangin an thawhpui theih tur, an party candidate thlang tura an campaign laiin, opposition lamin AMC chu inrelbawlna hrang nei an nih avangin ruling party kher thlan a ṭul loh thu an aupui ṭhin thute kan ziak bawk a. Khatiang ngaihdan insual karah khan mi changkang tamna , Aizawl mipuite kutah thutlukna a awm thu ka ziak ve a nih kha.

CAMPAIGN LAI BORUAK:-Kumin ang reng renga AMC inthlan Campaigna Partyte an ṭan hi a la awm ngai lo hial awm e.Intina luta campaign bakah kawtlai hmun hrang hranga campaign hriat tur a tam hle a nih kha. Hei hian chhan pawimawh tak a nei ni a politics ngaihventu mi ṭhenkhat sawi hi a dik thui hle awm e. ZPM party hi Dampa bial bye- electionah leh Lai Autonomous District Council inthlan neih takah khan an tling zo lova, AMC inthlana an tlin loh leh zel chuan kum 2028 MLA inthlan a nghawng theih dawn avangin ZPM tan ṭan a ngai nasa zual niin an sawi. A pahnihnaah chuan ZPM sawrkar hian AMC kal ta MNF kaihhruai kha an duhkhawp lo hle tih an campaign auhla aṭangin a hriat theih a ni. Heng zinga mipui rilru luahtu zingah chuan AMC Play ground, Bawngkawna hnathawh leh pawisa sanction inmil lo ni a sawite, Tuirial Airfield bula bawlhhlawh sawngbawlna mumal lo te, bawlhhlawh paihna motor engemaw zat lei thar, a kum leh maia man tlawm taka hralh leh te hi a ni awm e . Heng bakah hian ZPM chuan ṭha taka an thawhpui theih tur an party candidate te ngei thlan a ṭul tiin ṭan an la nasa hle a ni. Pol.party dangte pawhin hnehna chan ngei tumin Street campaign thlengin ṭan an la ve bawk a, Bjp tih loh kha chuan theihtawp an chhuah tlang vek a nih kha.

SOCIAL MEDIA LEH MI DEPDE TE:- Social media hi a ṭha zawnga hman chuan thil ṭangkai tak leh awlsamna min siamtu a ni a.Hetih lai hian mi ṭhenkhatin thu lawilo mai mai, dawt thu hmanga an huat zawngte diriamnan te an lo hmang ve bawka, a zialo ngawt mai.Hetiang mite hi tu dang ni lovin, kan mizo nihpuite leh kan kristian puite tho an ni lehnghal a, ṭhenkhatte phei chu mithiam leh zir sang tak takte pawh an ni awm e.Mizote hi han insawichhe tham leh midang va sawichhe tur khawpa mifel tumah kan awm lo tih hi i hre thar teh ang u. Midang va sawichhe ngat ngat ṭhinte hi chu tute pawh ni se mi rilru piangsual, mi depde leh kan biblein, lawmna chang hre lote a tih hi an ni awm e. Politics thil pawh ni se thudik hmangin kan insawisel thei a, ram rorelna atana ṭangkaina awm hauh lo, mimal nun thlenga va sawichhiat hi chu kan sim hmasak ber ni thei se a duhawm takzet ta e. Street campaign laia Minister Dr Vanlalthlana thusawi ,TV-a ka lo ngaihthlak hi mi depde tihchiannan i lo tar lang teh ang . Social media hmangin tute emawin Dr Mathlana hi a department chana hna pek chungchangah dik lo taka a duhsak zawngte hna pe-ah puhin an vawrhdarh chiam mai a.Dr Mathlana chuan dan anga hmalak tumin ukilte pawh a biak fel vek thu a sawi a, mahse thu dik lo hmanga puhtute chuan Dr Mathlana hmalak tum thu an hriat vang ni ngei tur a ni, an thu post zawng zawng an paih (delete) leh vek a, a umzui zel tak loh thu a sawi a ni. Hei hi mi depdeten social media an hman dan kawng khat a ni a, a bak pawh tam tak a awm a kan hre tlang vek awm e. Mi tlemte te avang hian kan hnam hi a hmingchhiain a hmingṭha thei tih kan hriat reng a ṭul hle a ni.

MIMAL INDIRIAM ṬHIN HI:- Politics a nih vanga mimal nun chhe lai ber, dawt leh thu phuahchawp thlenga indiriam ṭhin hi kan mizo zia a ni ngai lova, politics dik lovin eng hun lai emaw aṭanga a hrin niin a lang. Kan ram hruaitute thlenga an mimal nun kan diriam ṭhin hian kan hnam zahawmna pawh a nghawng phak tih hria ila, kan fimkhur a ṭul hle a ni. Politicsa thu inchuh kan neih pawhin mimal ni lovin, an thu kalpui dan kan duh loh zawka kha va sawisel mai ila a kawng tur a ni ang. Thianghlim takin politics hi a kalpui theih a, kristian zirtirna vawng tlat chung hian thil ṭha tih kawngah politiciante hi intlansiak se la kan ram a dam mai ang . Mimal va diriam vak vak ṭhintute hi tute nge tih hi social media hmang ṭhinte hi chuan an hai lo va, a commentna han en ila miin an ngaisang lo tlangpui ṭhin a ni. Mi kan va diriam ṭhin hian an rilru kan hliam a, inhnialna atthlak thlengin a chawk chhuak ṭhin a ni . Mi va sawichhiatna aṭanga rorelna chan tum ṭhinte hi ṭhangtharte rilruah a tla na lo tial tial a, an ngaisang lo tial tial ta hi thil lawmawm tak a ni e.

SAWISELNA HNEHTU-THAWHRIMNA:- Tun ṭum AMC inthlan result aṭanga lo lang chu, hnathawh ṭhatin awmzia a nei hi a ni. Insawichhiatna tam tak karah pawh tun kum hnih awrh chhunga ZPM sawrkar hnathawh avang hian AMC ah pawh an solid ṭep a tih theih awm e.Tun hma aṭang tawha rorel lai party thiltih apiang sawisel tur zawn kha opposition partyte tihdan a la ni reng mai.Tun ṭum AMC inthlan dawn pawh khan rorel lai party chu nasa taka sawisel an la ni tho a ni. Mahse chu sawiselna chuan awmzia a nei lutuk lo tih chu inthlan result aṭangin a chiang hle mai. Insawiselna hi thu dik a nih loh phei chuan a sawiseltute vaw lettu a ni thei a, a tlo lo fo ṭhin. ZPM party hian an sawrkar tirh aṭang khan theihtawp chhuahin hna an thawk a ni tih hi haider rual a ni lovang. Anmahni insawi dan ang deuhin sawrkar tirh aṭanga party manifesto kalpui nghal pol.party awm chhun intiin kut hnathawktute lam an hawi nghal vat a nih kha.Kum 2025 kum tawp lam aṭang khan tunhma lama la tih ngai loh angin Aizawl khawpui kawng chu Bituminous Concrete ( BC) hmangin hun rei lote chhunga an siam hi sawi nep chi a ni lo. Aizawla cheng mipuite hi a hmutu leh a chhawrtu an ni tlata, zoram pumpuiin an hai lova, inlawmpui mai tur a ni ang. Sawhthing leh thlai thlan bik te pawh an thiam ang angin lei khawm leh hralhna kawngah hma an han la nghal kha, a chhawrtute bakah mipui tam zawkin kan hriatpui a ni. Hemi kawng hnih aṭang ngawt pawh hian kuthnathawktute leh Aizawl khawpuia cheng, mi vengva leh changkang zawka ngaihte hian ZPM sawrkar hi an ring ngam niin a lang.Pol.party dang tan pawh hei hi inenfiahnan hman ni se a finthlak hle ang.

Political party mite chu lo insawiselin an thiltih ṭhatte inhmuhpui thin loh mahse, mipui nawlpui hi chuan an hnathawh (performance) hi AMC inthlana tehfunga an hmang ang hian hmang zel se la, Politiciante an ṭhangharh mai ang.Fak tlak chu fak mai ila, fuihna ṭha tak a ni nghal anga, kan ram tan vek a ni e.Awmze nei lova insawiselna hnehna ṭha ber chu dikna hmanga "Thawhrimna" hi a ni e.

- H. Lalchhuanliana