Hnam dang sumdawng lakah YMA

Central YMA Executive Meeting chuan ro tam tak a rel zingah dan loa hnam dang sumdawngte thlithlai turin branch tin a ngen. He ngenna hi chak taka bawhzui a ṭha ngawt ang.

Tunhnai hian hnamdang, mahnia bungraw rawn phur luta Mizo sumdawngte hnenah direct-a pe an pung nasa hle a, hengho hian sorkarah chhiah pawh chawi loin flying business an rawn bei nasa em em a ni. Heng hi min chimralna kawngka pui a la ni dawn.

Central YMA in branch tin hnena a ngenna hi branch tin ten tha takin bawhzui thei se, Dan loa sumdawngte hian min eichhe mek a, hei aia thuk zawka min eichhiat hma hian hmehmih vat a ngai a ni. An nawm an maka permit pawh nei loa heti sup supa dawr bungrua rawn phur luta sem kual chiam mai hi ngaihmawhawm tak an ni ta.

Kan dawrkai sumdawng ho lah hian phalna an neih loh hre duh map loin a tlawm tlawm an lo dawr zel mai bawk si a. Thingtlang kil thlengin dawr bungrua an phur kual nasa tawh hle. Heng hi branch YMA chuan lo danpin hmiah a /ha khawp mai.

Branch YMA pawhin Central YMA thuchhuak hi theihtawpin han bawhzui thei se a lawmawm ngawt ang. Sorkar tan ILP check reng a harsat a, Dan loa sumdawng check pawh a harsat ve thei a, kan hmanraw neih hlu ber YMA a chet chuan ram leh hnam kan la in chhanhim thei ber ang. YMA chetlak a ngai a ni.

A thuhrimah Mizote hian hnam kan hmangaih tak tak lo. Sum kan hmuhna anih phawt chuan kan hmingin hnamdangte dawr kan hawntir a, a bikin insakna bungrua cement, bricks, iron rod leh balu dawrte hi Mizo hminga siam ni si, hnamdang hminga an account-a pawisa lut vek si hi a dik thei lo. Hengho pawh hi enfiah a ngai hle mai.

Falkland Veng, Aizawl by-pass road ah va kal teh u. Dawr leh a bulah kudam muk pui pui a lo tlar thluah ang. Insakna bungraw hrang hrang va lei ula pawisa gpay ta chiah ula, in pawisa chu vai account ah a lut ngei ngei ang. Dawr erawh Mizo hming a ni lawisi ang.

Hetiangah tak hian Mizo kan fimkhur lo a, sum tlem kan hmuhna tur anih phawt chuan kan hming an hawh ta zel a nih hi. Hei tak hi a huamchhung Branch YMA chuan tharum tenau nen pawh hmalak mai chi a ni. Min chimralna remchang kan chhutchah a hun tawh.

Khawpui chhung dawr lian deuh deuh karah a sirah pan dukan kan hmu fur bawk ang. Heng pawh hi enfiah a, hnamdang sumdawn nan hman kan phal tur a ni lo. A neitute nen pawh han in ep rap rap a ngaih pawn Branch YMA-in a chingfel thei turah ngai ang.

Vairengtea Taxation te, Commerce & Industries leh Police chackgate pawh thuamchak lehzual ila, phala engmah nei loa motor te zawka bungraw phurhluh phal lose, a bikin bungraw phurhna tur a siam pawh ni lo, mihring phurhna tura lirthei ni si, dawr bungraw phur an tam tawh zia hi en uluk a ngai. Tharum deuh pawh ka sawi tawh ang Khan hman a hun tawh viau a ni.

Central YMA in hetianga rawtna neia hmalak a ni tur hi a lawmawm em em a, Branch tin pawn bawhzui hram hram a /ha khawp ang. Vaihoin min chimral mai ang tih a hlauhawm ta a ni e.

- Lal Rinmawia