Mamata Banerjee sawrkar tlak chhan Vote rûksak nia sawi hi a dik em?

India state pali leh UT pakhat assembly election result puan (4/5/26) kha liam thui deuh tawh mah se, West Bengal -a Mamata Banerjee kaihhruai TMC sawrkar hneh theih tura ngaih loh kha hnehin an awm a; election result BJP–207, TMC–80, INC–2, AJUP–2, CPI(M)–1 hian a nem nghet. TMC chu BJP lakah an chak zo ta lo a, hnehin an awm ta. Bengali ho hian rorelna chelhtute ṭha nia an hriat chuan sawrkarna chelhtu hnê hluah hluah leh ninna (anti-incumbency factor) an nei lo, CPI(M) pawh term 7 chhung a zawnin an sawrkar mai. Mamata Banerjee kaihhruai TMC hian kum 2026 inthlanah chak theihna sang tak an neih thu leh hneh an harsat tur thu kha inthlan hmain ka ziak tawh a. Inthlan vote thlak a zo a, mipuite hnenah tu nge an vote tih lak khawm aṭanga tu nge sawrkarna siam ang tih exit poll result chu a hma lama opinion poll aṭang a danglam ta tlat a, exit poll tam zawkin BJP an sawrkar an ring ta tlat mai. Result a lo chhuak a, tlawm tura ngaih loh TMC chu an tlawm a, an tlawmna pawh an pawm thiam hleithei ta lo reng a. Love letter ziah thui tur hre lo thukhawchang ang deuhin, "Tawk lo chungin tawk mai rawh se," an tih a ngai ta a ni. TMC kum 15 chhung sawrkar rorum tak hneha an awmna chhan hi national media hrang hrangin election result puan tuk aṭang khan an ziak nasa a, Kolkata Bengali youtuber-te chuan TMC tlak chhan mawhphurtu leh mawhpuh tur an hre hlawm kher mai.

Mamata Banerjee hian mipui vote hmanga hnâwl leh tlaah a inngai hleithei lo a; a tlak chhan ber chu Election Commission of India-in Special Intensive Revision (SIR) of electoral roll a kalpui avangin mi nuai 90 vêl vote nei thei lo (defranchised) turin Roll aṭanga paih an nih chu a hla thunawn sak tawp theih ngai loh tur a ni. State hrang hrang aṭangin TMC tlak chhan bera ri ring leh thawm nei lian ber chu SIR vang niin a phawvuakah kan lo ring deuh tlangpui hlawm a. Mahse, W Bengal chhung, a hmun ngeia cheng mipui tam zawk chu TMC rorel kum 15 chhung hian lawmna aiin sawrkar laka lungawi lohna leh an chunga rorel zel tura an duh tawh lohna leh, thlak duhna ten a bûk rit zawk a ni tih an lantir a ni tih loh chi a ni ang em?

Mamata Banerjee hian kum 2011 election-ah seat 294 awm aṭangin 184 lain CPI(M) kum 34 sawrkarna a titawp a, 2016 election-ah seat 211 leh 2021-ah seat 216 lain sawrkar nghet a din. Kum 2021 hnu lamah TMC sawrkar chu a hrohrâng na sâwt hle a, hemi hma lamah pawh minister zingah sum leh pai chungchanga himdam zaih lo leh scandal a awm tak fo avang leh, TMC chu family party rawng a kai nasat tak avangin Mamata bân ding lam an tih hial, a minister zinga mi ngei Suvendu Adhikari aiin a vahpa Abhishek Banerjee chu party chhunga thuneihna a neih len tak tial tial avangin Suvendu Adhikari chuan TMC chhuahsanin BJP a zawm a. Napoleon ropuia tlawmna kha Eton school-ah a inṭan, tih ang deuhin Mamata tlawmna hi Suvendu Adhikari-a’n TMC a chhuahsan khan a inṭan, ti ila a sual thui kher lo ang. Mamata hi Suvendu hian kum 2021 inthlan khan Nandigram constituency-ah vote 1,956-in a hneh a, MLA ni loin CM atan lak luh a ni a, a hnuah Bhabanipur bialah by-election-ah vote 58,832-in MLA atan a tling leh chauh a ni. Kum 2026 election-ah hian Bhabanipur-ah bawk ding lehin, BJP hotupa Suvendu lakah vote 15,105-in a chak zo lo. Suvendu hi BJP tih zen zen ngai loh takin bial pahnih, a hmaa a tlinna bial Nandigram leh Bhabanipur a chuh a, a tling ve ve.

SPECIAL INTENSIVE REVISION

EC -in nikum 2025 khan kum 2026-a Assembly inthlang tur state-te chu electoral roll-a chuang zawng zawng a bul aṭanga enṭhat a, siam thar vek turin a ti a, W Bengal pawh a tel. ECI-in SIR neih ṭul a tih chhan chu–khawpuia pêm luh nasat vang (rapid urbanization), thi tawh (unreported death) Roll aṭanga paih, ram dang mi dan loa India rama rawn lutte Roll aṭanga paih, vote nei tura kum tlingte thun luh te a ni.

W Bengal SIR chu

Kum 2021 assembly inthlanah khan W Bengal-ah vote nei mi vbc 7.34 an awm a, SIR tih hnu kum 2026-ah vote nei vbc 6.38 an awm. SIR hmanga voter paih zat nuai 90 dâwn an ni a, chung zinga voter nuai 27.16 ten Roll aṭanga paih loh an dilna chu Supreme Court-in Tribunal ngaihtuah turin a ti. Roll aṭanga paihte hi illegal Bangladeshi immigrant-te ni tak maw?

Huat leh dodal hlawh SIR

EC a-in inthlang tur state-ah vote nei theite fîr taka enṭhatna SIR a kalpui chu opposition party lamin an sawisel nasa hle ṭhin. Rahul Gandhi, Lok Sabha Leader of Opposition chuan ‘vote rûksak’ (vote chor) tiin hmun tam takah a duh loh thu a sawi. W Bengal anga SIR sawiselna nasa hi an ruala inthleng ve dang state-ah chuan a ni lo. Mamata Banerjee chuan, "ECI hian MLA 100 chuang min rûksak a ni, hnehin kan awm lo," a tih bakah, SIR duh lohna thu leh ECI chu BJP tlin theihna hmanrua a nih thu, thu dêngkhâwng tam tak a sawi a ni.

SIR tih dawn aṭang khan Mamata hi a ṭêk nghal hle a, a theihtawpin a do a, Calcutta High Court leh Supreme Court-ah te a thlen. ECI erawh a dinna ngaiah nghet takin a ding a, India rama dan loa lut ruhoin Aadhaar card, PAN card, etc an nei a, a tawpah voter ID an nei tih a hria. Hengho hian ram himna (national security) an tiderthawng a, an document lem hmangin ram khua leh tui dik takte chanvo ang an chan ve a rem lo, tih chu sawrkar laipui duh dan a ni.

SIR hmanga vote paih

W Bengal-a SIR hmanga vote paih (delete) tamna Assembly constituency panga dinhmun hetiang a ni:

Sujapur –vote nuai 1.50

Raghunathganj W – vote nuai 1.30

Samserganj – vote nuai 1.25

Ratua – vote nuai 1.23

Suti – vote nuai 1.20

Heng bial 5-ah hian tun W Bengal inthlanah khan TMC candidate-te an tling vek a ni.

Muslim ho vote dan

Muslim tamna district 3-a vote nei 50% chung lam Muslim awmnaah hian kum 2021 leh 2026 inthlana TMC leh BJP vote hmuh dan en hian, Muslim hian TMC an vote huk ṭhin kha a ni tawh lo deuh tih a ti lang. A hnuaia mi hi en ila, bracket chhunga mi hi BJP MLA neih zat a ni.

District 2021 2026

Murshidabad 20 (2) 9 (8)

Malda 8 (4) 6 (6)

Durgapur 7 (2) 5 (4)

Heng bialah hian TMC-in 2021 inthlanah MLA 35 neiin, 2026-ah 20 an nei a; BJP-in 2021-ah seat 5 changin, 2026-ah 18 an chang daih thung. Hei hi SIR vanga vote paih hi a chhan a ni ang em?

SIR vanga vote punna bial

SIR hian khua leh tui zinga vote nei thei tura kum tling tharte thun chu a tum zinga pawimawh a ni a. W. Bengal-ah hian SIR tih hnua voter pun tamna bialte chu Sujapur – nuai 1.14, Raninagar – 76,000, Harischandrapur – 74,000, Chanchal – 72,000.

Vote paih tlemna

SIR hmanga vote paih tlemna bial 5-ah vote 8,000–9,000 inkar paih a ni a; heng bial–Sabang, Khajuri, Bhaghahanpur, Raipur, Katulpur bialahte hian BJP candidate an tling vek. Vote nei thar tamna bial 5-ah pawh BJP candidate an tling. SIR data aṭanga lang chiang chu–SIR hi BJP-in an hlawkpui ber tih hi a ni.

SIR leh sakhua

Sakhua ang zawngin, SIR hmanga vote paih dan hetiang hi a ni: Hindu – nuai 57.47 (63.42%), Muslim–nuai 32.1 (34.32%) (frontlinethehindu.com).

Mamata tlak chhan

Lokmat Times chuan, “Kum 15 chhung hneh theih loh a ni, hnehin a awm a ni mai lo, a tluchhia (collapse) a ni. Mamata leh BJP inbeihna a ni em? Ni lo. Mamata leh a sawrkar kal phung (system) inbeihna a ni, a system chu a tlawm ta a ni. A hma lama CPI(M) sawrkar kha nasa takin sum leh pai laka rinawm lohnaah te, mipui leh loneitu, zirlaite hamṭhatna ngaihthahin a puh a, heng a puhna zawng zawngah hian kum 15 chhung hian fihlim lo mai ni loin, thûk takin Mamata system hian a rawn zawh a, chu system zawk chu a tlu ta a ni," a ti.

Democracy sawrkar hi mipui siam, mipui ta a ni a. Sawrkar thuneitute’n mipui ta nia an inhriat loh a, mipui tana awm leh ding nia an inhriat loh chuan a thlangtu mipuiin inthlanah an hnawl mai ṭhin tih hi thu dik awm sa a ni.

TMC SAWRKAR LEH CORRUPTION

Teachers recruitment scam

W Bengal WBSSC-in zirtirtu 25,752 a lakna kaihhnawihah, Education minister Partha Chatterjee ṭanpuitu Arpita Mukherjee in dapnaah thamna pawisa tam tham tak man a ni. Hna pakhat aṭangin thamna cheng nuai 5-15 an la nia ngaih a ni a; Minister leh a thurualpuite official-te chu man niin, lung inah khung an ni. April 3, 2025 khan Supreme Court chuan heng hna lâk zawng zawng hi a cancel. Ṭhalai hna zawng mekte beidawngin, hmakhaw eng tak nei niin an inngai ang em?

Municipal recruitment scam

W. Bengal sawrkar hnuaia municipality–Dum Dum, Buranagar, etc hnuaia thawk tur clerk, driver, peon sweeper laknaah minister pahnih Sujit Bose leh Rathin Ghosh ten thamna sum vbc 3.45 an laa sawi a ni a, an in leh bungraw hlu tam tak hrensak an ni.

Hei bakah hian Ration/PDS scam leh corruption thubuai dangte a la awm nual, sawi vek lo mai ang.

W BENGAL A HNIAM TUAL TUAL

Mughal hun lai aṭanga India ram state hausa ber W. Bengal chu a hniam tial tial. India rama sum thawh chhuah zawng zawng (national GDP) MoSPI & State Economic Survey figure-in a tarlan danin, kum 1960 khan W. Bengal hian National GDP-ah 10.5% an thawh ang a ni a, kum 2025-26 ah chuan 5.6% chauh a ni. W. Bengal hi lehkhathiam tamna a nih avangin an dinhmun dik tak hi an hre lo hauh lo ang.

Hmasawnna lian

State ṭhenkhat–Telengana, Rajasthan, Tamil Nadu leh Bihar thlengin tun hma lama W. Bengal aia hmasawn lo zawk nia ngaihte chuan thil siam chhuahna lian tham leh infrastructure lian tham an neih belh mêk laiin W. Bengal erawhin sawi tham a neih belh lo.

TMC-in hmeichhe vote an hloh

Trinamool Congress hotunu Mamata Banerjee chakna thahrui pawimawh tak pakhat chu inthlan apianga hmeichhe vote tam zawk a chang ṭhin hi a ni. Kum 2021 inthlanah pawh khan TMC hian BJP aiin hmeichhe vote 13% laiin a hmu tam zawk. Mahse, TMC auhla pakhat, "Mamata hmusit chu hmeichhia zawng zawng hmuhsitna an ni," (Insult to Mamata was insult to all women) tih pawhin tunah chuan Bengali hmeichhiate ngêng a chhun pha ta meuh lo niin a lang. ECI data-ah chuan, 2026 election-ah hian TMC-in hmeichhe vote 40.8% an hmuh laiin, BJP-in 45.84% chang. 2021 inthlan aia TMC-in 2026-a hmeichhe vote an hmuh tlemna hi 19% lai a tling. Eng vangin nge hmeichhiate’n TMC an vote tak loh, tih hi zawhna a awm thei a; heng hi a chhan lian zualte a ni.

Him loin an inhria

Mamata Banerjee kaihhruai W. Bengal sawrkar flagship program pakhat chu Lakshmir Bandar a ni a, kum 2021 aṭangin kalpui a ni tawh. Hmeithai kum 25-60 inkar, chhungkhat hotu hmeichhiate hnenah thla tin tribal hnenah Rs 1,200 leh general category hnenah Rs 1,000 pek an ni a; sawrkar hnathawk leh Income Tax pete a huam lo. Kum 2024 report-ah chuan, Lakshmir Bandar hamṭhatna hi hmeichhia nuai 216 velin an dawng. Hmeichhiate hamṭhatna siam mah se, him lo nia an inhriatna chu sum hmanga thleng chi a ni lo tih chu TMC an hnar chhana ngaih a ni.

Durgapur gang rape

Durgapur-a private medical college-ah Odisha mi MBBS zirlai hmeichhia kum 23 mi chu October 10, 2025 zan dar 8-9 inkarah college campus pawna mamawh lama a kal chu pawngsual rawn a ni. He thil thleng hian mipui a tihthinrim tawh nâk alaiin Chief Minister Mamata chuan, "The girls should not be allowed to go outside (college) at night. They have to protect themselves also," a ti a (Hmeichhiate hi zanah pawnah (college) an chhuak tur a ni lo. Anmahni an inveng him tur a ni). Pawngsual rawntute man chhuah a, hrem an nih tur sawi zui mah se, a hma lama a thusawi hi hmeichhiate thin khei zawng tak a ni.

RG Kar Med College rape-murder

August 4, 2024 khan Kolkata-a RG Kar Medical College & Hospital-a post graduate zirlai hmeichhe kum 31 mi chu college seminar room-ah thia hmuh a ni a, pawngsual hnua thah nia hriat a ni. He pawngsual thubuai chhuinaah hian W. Bengal Police-te ṭuan a fûmin an chhui muang hlea hriat a ni a, hei hian Bengali mipui thin a tirim hle. Mamata kaihhruai sawrkar chu hmeichhiate himna ngaihthah leh politics leh thil danga a sangawi zawnpuite thlavang hauh leh hum nasa lutukah an ngai lo thei lo.

RG Kar Medical College & Hospital-a PG doctor zirlai nu Ratna Debnath chu a fanu chunga thil thleng leh W Bengal sawrkarin a um zui danah a lawm lo hle. Amah hi lehkhathiam lo, ziak leh chhiar pawh thiam lo a ni chungin eng tin emaw tala hmeichhiate himna chungchang sawi theih a duh a, BJP-ah a inpe a; Panihat constituency-ah MLA candidate a ni a, vote 89,977 (50.28%) hmuin thlan tlin zui a ni.

North 24 Parganas district-a Sandeskhali khuaa tualchhung TMC hruaitu leh a thurualpui misual ralthuam neite’n hmeithai ram an chhuhsak leh rîkrâpna thleng avanga duh lohna lantir te, an chhuhsak rama ar vulhna, sangha dil, etc an siamte chu mipui thinrimin an tihchhiatsak chungchang Calcutta High Court-in thubuai khingtu awm ngai loa suo motu cognizance a siamah khan, tualchhung inenkawlna leh thil sual titute chu dan anga hrem turin state sawrkar a hriattir a ni.

All India service officer an lawm lo

Mamata kaihhruai TMC sawrkar hnuaiah hian W. Bengal state cadre officer IAS, IPS te chu danin phal a ni chungin Central Government deputation-a kal phalsak an ni lo (The Hindu 12/12/2020); hei vang hian W Bengal sawrkar lakah an lungawi lo hlea sawi a ni.

HEI VE THUNG HI

ECI ruahmannain Mizoram pawhin SIR 2026 kan hmachhawn ṭan mek a. Mizoram UT nih hnua Mizoram khawtlang lam Kanhmun aṭanga chhim tawp thlengin Bangladesh khua leh tui vote bank atan Mizoram Electoral Roll-a thun, mihring tam tak an awm thu hi Assembly House leh political platform hrang hrangah mi chi hrang hrangin an sawi ṭhin. Hengho hi electoral roll aṭanga paih (delete) tur hian ‘Zawhte chu tu nge ṭhî awrhtir ang’ le? Nge, vote rûksak (vote chor) kan ti ve zawk dawn?

Source:

NDTV May 9, 2026

The Hindu 13/12/2026

India Today 6/5/2026

The Diplomat 15/5/26

Lokmat Times

eci.gov.in

- Huna Kawlvawm