Office inkal chhawk timing leh zan police duty
Aizawla traffic jam nasat ṭhin avanga lirtheiin oil a hmanral tam lutuk tihziaawm nana ni 21.5.2026 aṭanga sawrkarin office inkalchhawk hun a siam hi a fuh chiah lo deuh em? A kal hma tur ho zing dar 8.30 a kal ho leh sikul naupang kal hun inrual avang hian traffic a jam nasat phah zawk tlatin kei chuan ka hria a ni. Hmun dangah a nih ve leh ve loh chu ka hre chiah lo nà a, kan naute sikul kalna lam Aizawl south lamah chuan a dikin ka hre tlat a ni. Tun hma zawng aiin he ruahmanna awm hnu hian naupang sikul kal hruai a buaithlak zawk ta tlatin a hriat a ni. Traffic police-ten an hrechiang ngeiin a rinawm a. A dik a nih chuan sawrkar hian ennawn lehin ruahmanna dang ṭha tak han siam leh teh se. (He ka thil sawi hi chanchinbua a lo chhuah hun meuh chuan sawrkarin a lo tidanglam leh tawh maithei bawk.)
Ni 23.5.2026 zan lama tlaivar deuhthawa Aizawla traffic police an han duty thut mai kha chu a va han ṭha tehlul em ve le. Chhiatna rapthlak leh runthlak tak tak thlen hnua an tih chauh, Se bo hnua se kawng khar ang deuh ni mah se, an vawi khat an han tih ringawt pawh khan ni dang leh zan dang zel atan pawh a ṭha zawngin nghawng nasa tak a nei ngei ang tih a rinawm e. Mahse, an chhunzawm loh erawh chuan Aizawl zanlam boruak chu a ngai bawk a ni leh ang.
Sualna chi tin reng, dan bawhchhiatna hrang hrangte, nun sual leh nun khawlohna hun, Setana hnathawhna hun ṭha, Setana nuam tih hun chu zan thim hi a ni. Setana hnathawh sualna leh pawikhawihna hrang hrangte hi um bo vek emaw, dan beh vek emaw chu theih ni lo mah se, eng emaw zat hi chu ven leh dan beh theih a awm ve a ni.
Sualna leh pawikhawihna hrang hrang veng tur leh titlem tur chuan sawrkar dik leh chak, dan bawhchhiate na taka hrem zat zat ngam neih a ngai a. Police-ten ruahmanna leh chet lak dan tur fing tak an neih a ngai bawk a ni. Nimahsela, eng ang ruahmanna ṭha pawh awm mah se la, a taka bawhzuitu a mihring kha kan fin thiam leh kan taimak a ngai em em thung a ni. Tih tak takna thinlung neih a ngai bawk a ni.
Sual zalen hun hi zan lam a nih deuh bik ṭhin avang hian, Aizawlah hian zan lama sualna ti tur leh dan bawhchhe tur mi chi hrang hrang hi eng zat tak veivak ṭhin tak ang maw. Mi diklo Aizawla awmsa hote hi thil tiru tur leh dan bawhchhe turin zan tir lam leh zan lai, zing lam thlenga che chhuak ṭhin an awm reng ngei ang a. Chu'ng bak mi chi hrang hrang, dan lova thil tih tum leh dan bawhchhiatna lam thil rawn kenglut hi zing khawvar hma deuh leh khawvar tirh velte hian eng zat tak awm zan tin ṭhin tak ang maw. Eng emaw changa zan lam leh zing lam thlenga veivah a ṭul changte hian rinhlelhawm tur tak tak hmuh tur an awm fo ṭhin hi. Zan lama Aizawla veivah hi chu a nuam chiah lo ṭhin zawng a nih hi.
Kan ram hi tun aia ram ralmuang leh ram nuam, kan ram khawpui Aizawl hi khawpui ralmuang leh nuam, mi tin zalen tak leh him taka kan khawsak theihna hmuna siam tur chuan, Aizawlah hian zan tin traffic police mai ni lo, police dang pawh hmun hran hran, point hran hrana duty leh veivak tlaivar ṭhak an awm hi thil ṭul tak chu a ni e. Sawrkar lamin a ti thei lo a nih pawhin, kan rama sual haw pawl leh sual do pawl talte hi zan lamahte hian tlaivar ṭhakte hian taima takin han duty thei ṭhin se, tihte hi ka lo suangtuah ve fo ṭhin a ni.
Khitiang thilte khi tun dinhmunah chuan a zawnga zaa thil tih theih ni hrih lo mah se, zan lama pawisak nei lo, zak thei lo lutuk leh mi chimawm tak takte bakah, hlauhawm tak tak leh ninawm tak taka lirthei khalh ṭhinte tal hi chu tihziaawm an nih theih nan leh, an inkiltawih ve deuh nan tal hi chuan zan tin traffic police te hi han duty tlaivar thei hram ṭhin se ka ti hle mai. Mi ram tihdan a ni emaw, ni lo emaw, a ti hmasa ber model state kha han ni leh mai ila, min fak leh luai luaiin min entawn leh mai lo'ng maw.
Nimahsela, thil engpawh kan sawi ṭhin zawng zawngte hi tihlawhtling tur hi chuan, ram leh mipui tana inpekna tak tak leh tih tak takna tel lo sawrkar emaw, deparment emaw leh, eng pawl leh eng mihring emaw pawh tan chuan chhuanlam remchang lutuk leh ṭha lutuk tur chu, 'Mihring kan indaih lo alawm' tih hi a ni leh ṭhin tho ang chu. Amaherawhchu, tuna kan sawrkar hi chu tih tak takna nei sawrkar ni khan an lang deuh bawk a, beiseina ṭha tak lo nei leh phawt mai ila. Thil eng emaw tak, a ṭha lam zawnga danglam tak kan hmu leh maithei asin.
Aw le, thil pakhat - Traffic police-te zan tin in duty thei lo a nih pawhin, sawi lawk miah lovin a khát máwi tàwk tal chuan han duty thei ṭhin ula chuan, hmuh theihin Aizawl zan lam boruak hi chu a nuam lehzual ngei ang. Tin, in duty hun leh in duty dan leh a hmun pawh tidanglam fo bawk ula, dan pawisa lo hoten hun remchang an zawn phèt loh nan taima tak leh ṭhahnemngai takin han duty tlaivar thei ṭhin ula chuan, mipui chuan, 'Kan Aizawl khawpui zan lam boruak pawh Mizoram police-te avangin tunah chuan a lo nuam leh ta hle mai' kan ti ngei ang le.
- K. Hmingthankaia