Chakai Farm leh Telhawng

Chakai Farm

MNF sawrkar laia Fisheries changtu Minister khan SEDP hnuaiah chakai farm siam nan cheng nuai 57 an hman thu a sawi a; chakai farm siamna atan hian dil pathum siam a ni. A hmunah pawh Fisheries department changtu Pu Rinliana bial lam Kolasib Dumlui hmunah a ni nghe nghe. Minister hian chakaiah pawh Mizote’n kan ei nasat Aifiar leh Ailam te khawi an tum tih a sawi.

March ni 4, 2021-a Assembly session-ah khatih laia MLA Pu C. Lalsawivunga zawhna chhannaah erawh chuan Minister hian cheng nuai 54.17 an dah thu leh nuai 16 an pek chhuah tawh thu an sawi thung. Engpawhnise, chakai farm atan hian nuai 50 chuang chu an dah ngei tih a chiang.

March 2020 aṭang khan DFDO Office leh ICAR, Kolasib Regional Center kaihhruaina hnuaiah chuan chakai farm bul ṭan a ni ngei a. Chakai chi 48,000 vel khawi theihna tur an siam niin an sawi. Kum 2020 kum tawp, December ni 19-a Minister Pu Rinliana'n a hmun a tlawh ṭum hi chuan chakai 2,000 vel khawi chhin a ni tih chu sawrkar thuchhuah tarlan dan a ni. A lo tlahniam ta duai a nih chu.

A hma kha chuan eizawnna atan pawh hman tlak a nih ngei tur leh hlawhtling chho se SEDP-ah pawh chakai farm atan zau zawka kalpui tum a ni ang, an tihte nen chuan inang ta lo hle. Hun a kal zel a, a hnu kum thum vel, 2023-ah ZPM ṭhalaite’n an zuk endik leh meuh chuan chakai an hmu zo lo va, Brocoli leh Dhania chînna atan te an lo hmang ta mai mai zawk a. Tichuan, cheng nuai 50 chuang khawhralna chakai farm chu MNF hun chhungin a hlamzuih hman dêr a ni.

Telhawng

Kum 2019-20 khan MNF sawrkar chuan SEDP hnuaiah telhâwng (elephant yam) chi lei nan cheng nuai 30 dah a ni tih Agriculture Minister Pu C. Lalrinsanga chuan a sawi.

Telhâwng hi khawvel ram dang tam tak hian ei ngai a ni tih pawh an hre lo hial awm e. Kan ṭhenawm hnai, vaiho phei chuan ei enah pawh an en lo. Khawvelin an uar leh ram tinin an ei, sawhthing pawh hralh thei lo khan mi ei ve ngai loh telhâwng an inchintir chu a hun lai pawh khan mipuiin an nuih deuh.

Telhâwng hi Sangau khuaa farmer 50 vel chintir an ni a; Sangau chhehvel Burma ram thlengin telhâwng chi kg-ah 500-a leiin, kg 6,000 lai an lei a ni awm e. Ram hectare 50-a zauah an ching.

Khatih laia Agriculture Minister khan kum hnih/thum hnuah a rah an seng an beisei thu leh, telhâwng chìn nuihzattute chu an la inchhîr dawn tih zawng deuh khan a sawi a. Kum 3 a ral a, MNF sawrkar pawh a ral hnu hian cheng nuai 30 sênga enchhinna telhâwng chu a thawm kan hre zui leh ta lo.

MNF sawrkar project hlamzuih a tam hle. A lâr ber leh an pu berin a âtchilh ber mau project a hranpain kan la thlir leh ang.

- Hruaia Kawlni