Thil dik lo sawi mâmsak tih hi
Vanglaini May 25&25, 2026 chhuaka article ‘MPSC Asst. Professor Lak Dan Sawi Zui Hlawh Kha’ tih Rinsanga ziah tawp lamah hetiang thu hi a awm a: “MPSC chungchang chhui tura an ruat Pu Manzuala, IAS Retd kha MPSC Chairman a nih tawh vangin a bias hle emaw ni aw, MPSC tisual thei meuh loah a chhuah a, tunah lem MPSC lo nawizia hi a lang zel zawng a nih hi. Pu Michael Manzuala meuh pawhin a sawi mamsak ngam ka ring tawh lo a ni.”
Khami chungchanga ka Inquiry Report chu hei hi a ni. A tawi zawnga sawi chuan complaint thehluttute’n thil fel tawk lo awm anga an sawite kha belhchian dâwl a awm lo. Inquiry Report tihchhuah a nih hnu khan complaint thehluttute leh thil fel lo awm nia sawitu, candidate-te aṭangin engmah sawiselna a awm hriat a ni lo va. Chuti chunga chanchinbu meuha hetiang thuziak a lo lang hi a mak tih loh theih a ni lo.
Thu ziaktuin, Pu Manzuala IAS Rtd, Pu Michael Manzuala a tih hi kei, M. Lalmanzuala tia hming ziak ṭhin hi ka nih chuan, a sawi anga ‘Dik lo pawh dik’ ti ve mai ṭhin anga min sawi hi a dik lohzia ka’n sawi chiang deuh ang e.
Punjab-a kum 20 dawn lai ka awm chhung khan min hre chiangtute chuan ‘Dâwt sawi ngai lo,’ ‘Ni chu ni, ni lo chu ni lo’ ti ṭhin ka nih kha an hria a. Mizo an hriat chhun ka nih avang khan, ‘Mizote chu dâwt sawi ngai lo, ni chu ni, ni lo chu ni lo’ ti mai ṭhin ti tein an sawi ṭhin.
Governor Swaraj Kaushal khan Chief Secretary hna ka chhuahsan hnu lawk khan min han ‘phone’ a, “Nang kha chuan kan rawn sawi apiang kha tih theih chu i ti nghal mai a, tih theih loh chu a theih loh thu min han hrilh nghal mai a. I chhuah hnu hi chuan a theih dawn leh dawn loh pawh hre lovin kan awm ta fo mai,” a rawn ti a ni.
Thosi kâp (field worker) hnaa ṭan a , LDC hna thawk zui a, kum 41 hnua MPSC Chairman hna aṭanga ka pension thleng khan pawisa pakhat pawh eiru lo, thamna la ngai lo leh pe ngai lo, hleih neih zawnga engmah ti ngai lo, chutiang mi ka nih avanga ka hnuaia thawk dan kalha thil ti apiang chu an phu tâwk hremna pe zel ṭhin ka ni. Chief Secretary ka nih hlima Director, BDO, AO, storekeeper, cashier rual sawrkar pawisa cheng vaibelchhe 65 zet lo chheprelhtute pawh Govt. account-a dah luhtir vektu ka ni a, vawi khat mah office leh meeting kal tlai ngai lo ka ni bawk.
Dan kalha thil ti tura min titu ka tih duh loh vanga Chief Minister pathum leh Governor/Lt. Governor pahnihin ka hna aṭanga an transfer ṭhin ka ni a. Heng mite duh dan hian awm ila, anmahni nena inthuruala cheng vaibelchhe têl eiru thei dinhmunah ka ding ang tih pawh ka hria. Chutiang tih aia mahni chhia leh ṭha hriatna hmanga dik chu dik, dik lo chu dik lo, tih thupui a taka ka la nunpui zui thei hi a hahdamthlak ka tiin a lawmawm ka ti em em a. Khatiang thil ka lo tih loh vang khan inchhirna chhetê pawh ka nei lo.
Hetiang hi ka nihna a nih laia MPSC thil ti dik lo anga puhtute’n an puhna chu thil belhchian dawl lo a ni tih chiang taka ka hmuh a, ka report, a puhtute pawhin engmah sawi zui tur an neih loh laia MPSC thil tih dik lo sawi mâm ang hrima min han sawi hi chu ngawihbopui turah ka ngai lo va, chhiartute’n thu dik an hriat nan heng thute hi ka sawi a ni. Min tihminghliau zawnga thu ziaktu hi khin ka tum lo va, thu dik a lan chhuah zel hi ka duh dan a ni e.
Inquiry Report
Mizo Zirlai Pawlte’n MPSC-in Mizoram Civil Services (Combined Competitive) Examination, 2023 an kalpui danah thil fel tawk lo awm anga an sawite:
(i) “Combined Competitive Examinations kalpui danah thil fel tawk lo leh chhui chian ngai thil a awm ngeiin a hria a.” (MZP Press Release dt. 27/03/2024)
(ii) “MPSC Civil Service Combined Examination hna lak hnuhnung berah thil fel lo tam tak a awm ngeiin a hria a, exam paper ṭhenkhatah correcting fluid-te hman niin, mark pek tawh sa thaichhiatna leh mark tihdanglamna hnuhma ṭhahnem tak a awmin a hria a.” (MZP Press Release dt.03/04/2023)
(iii) “Combined Competitive Examination kalpui hnuhnung berah thil dik tawk loa hmalakna a awm ngeiin MZP chuan a hria a, a ngai thutak hle a. Mains Exam paper ṭhenkhatah correcting fluid te hman niin, mark pek tawh sa thaichhiatna leh mark tihdanglamna hnuhma ṭhahnem tak a awm a.”
“Answer paper-te hi tun hma zawnga RTI Act hmanga dil chhuah an remtih laiin, kuminah chuan an remti ta lo thut a. A hnuah certified copy pe chhuak loin ‘Inspection without photograph’ an phal leh a. Nawrna avangin a hnuah phone-a thla lak an phal leh chauh a ni.” (MZP Press Release dt.10/04/2024)
(iv) “MPSC hnuaia Combined Competitive Examination lak hnuhnung berah answer paper leh mark tabulation-ah mark ṭhenkhat thaichhiat leh correcting fluid nasa taka hman a ni.”
“Junior Grade of Mizoram Forest Service (Assistant Conservator of Forests) post 3 lak turah examination neih vek tawh a ni a. Chutihlaiin, ni 10 April, 2024-a MPSC thuchhuah chuan an qualification department-in a pawm loh chhuanlamin answer paper an endik dawn loh thu a tarlang leh si a.” (MZP Press Release dt. Nil)
(v) “ACF mi 3 lak turah examination neih vek tawh chu MPSC hian answer paper an endik loh tur thu ni 10/4/2024 khan thuchhuah an siam a. Environment, Forests & Climate Change (EF&CC) Department Service Rules leh Advertisement anga exam neih tawh chu endik ngei turin MZP chuan MPSC a phut nghal bawk a ni.” (MZP Press Release dt.15/04/2024Nil)
MPSC-in MCS Combined Competitive Examinations, 2023 an kalpui dana dik lo nia MZP-in an sawi ber chu, answer paper-a mark pek tawh sa thaichhiat leh correcting fluid hmanga thup bakah, mark pek tawhna thaichhiatna leh mark tihdanglamna hnuhma ṭhahnem tak a awm tih hi a ni. Hemi chungchang endik tur hian MPSC-in MCS Combined Competitive Examinations, 2023 a buatsaih ṭuma candidate top 50-a langte answer script endik a ni.
MPSC hian kalphung an neih chu hetiang hi a ni
i) MPSC Answer Booklet hian candidate-te roll no. chuanna leh unique code ziahna bakah, 1st, 2nd, 3rd leh scrutiniser ten mark an ziahna tur table awm slip (dedicated mark tabulation slip) a keng tel.
ii) Written exam zawh a nih hnuah answer script hi MPSC Confidential Section-ah thehluh a ni a. Coding tih a nih hnuah candidate-te roll no. (unique code lang tel) lanna slip chu pawh thlak a ni a, Strong Room-ah dah a ni.
iii) Answer script hi 1st Evaluator hnenah pek a ni. 1st Evaluator hian a hna a zawh hnuah MPSC Office-ah a submit leh ṭhin (Evaluator-te hi an appointment letter-ah answer phekah mark pek loh tur tih instruction pek tel an ni). 1st Evaluator, mahni mark ziahna tur table (dedicated mark tabulation slip) bakah answer script-ah mark pe palh an awm ṭhin a, hei hi MPSC chuan an thaichhia/hnawih vâr ta a ni.
iv) 1st Evaluator mark pekna slip chu pawh thlak a nih hnuah 2nd Evaluator hnenah pek leh a ni.
v) 2nd Evaluator hian a hna a zawh hnuah MPSC-ah a thehlut leh ṭhin.
vi) 1st leh 2nd evaluator mark pekna chu Answer Booklet-ah chilh tel a nih leh hnuah scrutiniser chu a hna thawk turin MPSC Office-ah koh an ni.
vii) Scrutiniser hian 1st leh 2nd evaluator-te mark pek hmu chungin answer script an endik leh ṭhin. Scrutiniser hian 1st, 2nd evaluator-te mark pek hi candidate-te answer nen inphû loa a hriat chuan a siam danglam thei a; 1st leh 2nd evaluator-te mark pek hi 30% aia tama a inthlauh phei chuan independent evaluation a kalpui leh tur a ni.
Scrutiniser hian chung mi hrang hrangte mark pek aṭang chuan average lain, final mark a siam a, scrutiniser mark ziahna tur table-ah a ziak lang ṭhin a ni.
Hmuh dan
Answer Booklet-a mark thaichhiat/hnawih var te hi uluk taka light hnuaia en chuan a mark kha a lang thei a, hei hi 1st/2nd evaluator mark pekna slip nena enmil a ni a, a inmil vek tih hmuhchhuah a ni a, mark tihdanglam emaw vang a ni lo tih a chiang.
‘Final mark slip-ah correcting fluid hman hnuah mark ziah ṭhat a ni a,’ tih lai pawh hi chhui let theih vek a ni. 1st leh 2nd evaluator-te mark pek aṭanga average laa final mark hi siam a nih avangin enfiah an nih hnuah thil fel lo a awm lo tih hmuh a ni bawk.
Scrutiniser-te hian average an laknaah tihsual/ziah dik loh an neih avanga siamṭhat/tihdik lehna mai a ni tih hmuh a ni. Mark pek tawh sa thaichhiat a, mark dang pek leh tih pawh hi scrutiniser-te’n zalenna an neih chu hmang ṭangkaiin, evaluator-te mark pek chu candidate-te chhanna nen inmil tâwk lo deuha an hriat, mark an pek ṭhat a ni.
Tlipna
MPSC hian candidate-te mark hmuh tawh sa tihchingpen/siamṭhat an nei lo.
ACF chungchang
EF&CC Department hian ACF hna lakna atana an Recruitment Rules (RR) hman hi kum 1999-a mi a ni. He RR hian qualification a phûtah heng subject–(i) Botany (ii) Chemistry (iii) Forestry (iv) Geology (v) Mathematics (vi) Physics (vii) Statistics (viii) Zoology (ix) Agriculture (x) Engineering tih te a ni a. An RR-ah hian, “or possess a qualification which has been recognised by the State Government for the purpose of admission to the examination,” tih a awm bawk.
MPSC hian 2023 kum bula ACF lakna atan advertisement a tichhuak a; diltu zingah an RR-in a sawi lan ve loh subject late an awm avangin 28/04/2023-ah EF&CC Department-ah an zawtfiah a, chhanna an dawng lo. 06/06/2023-ah EF&CC-ah lehkha an ziak leh a, chutah chuan Science discipline-a degree nei, RR-a subject tarlan lohte chu ACF Exam-ah pawm theih an ni em tih an zawt leh a, chhanna an dawng lo.
Tichuan, recruitment process hi schedule awm sa tawh a nih avangin an schedule angin an kal a, Physical Efficiency Test (PET) neihna atana measurement laknaah pawh a subject 11 -
(1) B.Sc. (Advanced Zoology & Biotechnology)
(2) B.Sc. (Biochemistry)
(3) B.Sc. (Biotechnology)
(4) B.Sc. (Chemical Technology)
(5) B.Sc. (Computer Science)
(6) B.Sc. (Electronics)
(7) B.Sc. (Environmental Science)
(8) B.Sc. (Horticulture)
(9) B.Sc. (Life Sciences)
(10) B.Sc. (Microbiology)
(11) B.Sc. (Plant Biology & Plant Biotechnology)
Henga degree neite chu measurement laktir an ni a, an bachelor’s degree hi sawrkarin a pawm leh pawm lohah a innghat ang tih a ni.
Written exam hun 16-22/08/2023 thleng hian MPSC-in a chunga sawite chungchang thuah EF&CC Department lam aṭangin chhanna an hmuh loh avangin an exam-tir ta ni. 25/08/2023-ah MPSC lam hian EF&CC Department-ah Reminder an thawn leh a, chhanna an dawng leh ta mai lo. Written exam zawh vek tawh hnu 01/09/2023-ah EF&CC Department lam hian MPSC-ah lehkha thawnin, a hmaa sawi subject latute chu pawm theih an nih loh thu leh, ACF RR anga kalpui tur a nih thu an thlen a ni.
Hemi hnuah hian MPSC chuan EF&CC Department-ah hian lehkha an ziak leh a, thla 4 chhung ngawt an zawhnate chhan a nih loh avang leh, exam an zawh tawh hnuah pawm leh loh thu hriattir an nih an hriatthiam loh thu sawiin, ngaihtuah ṭha leh turin an thlen a. Chutih chhung chuan recruitment process hi tihtawp hrih a nih thu an thlen a ni.
EF&CC Department hian 10/02/2024-ah MPSC hi ACF hna lak tur chungchangah an RR anga kalpui turin thu an thlen leh a. MPSC hian ni 10/04/2024 khan ACF RR-in a sawi subject tarlantea bachelor’s degree neite tih loh chu an answer script endik a nih loh tur thu an chhuah a; hei hi Department lamin an qualification chu a pawm loh vanga ni tiin thuchhuah an siam.
Tlipna
MPSC hian candidate-te tan ṭhahnem an ngai a, chuvangin, EF&CC Department-in ACF RR-a provision an neih, “or possess a qualification which has been recognised by the State Government for the purpose of admission to the examination,” tih chhungah heng a hnuai subject-te hi a telh ve theih em tih an zawhna hi EF&CC Department lam hian an ngaihthah avangin exam thei loa langte’n exam an hmachhawn ve a ni ber.
MPSC lam aṭanga information dawn angin candidate-te answer script evaluate loh turte chu hengte hi an ni, subject leh candidate zat nen:
1. Biochemistry–1
2. Biotechnology–1
3. Chemical Technology–1
4. Environmental Science–1
5. Horticulture–8
6. Plant Biology and Plant Biotechnology–1
Total–13
Office kal ru anga sawi chungchang
Kimchang takin Inquiry Report-ah MPSC staff ni 16/04/2024-a office kalte statement tarlan a ni. Mi tam tak lo hriat dan chu MPSC staff-te chu tlai lam tawh taka kal anga ngaih an ni a; amaherawhchu, anmahni thusawi aṭang te, Police duty-te thusawi aṭangte leh an office Whatsapp group aṭangtein chawhnu dar 2 pelh hret, MZP duty-te an awm loh hnua kal an ni. Office kalte thlalak darh ta hi dar 4:46-ah, hna an thawh zawh hnu, an haw dawna post a ni a, mi tam zawkin zana kal nia an hriat kha a ni lo.
An kal chhan hi a tuk ni 17 leh 18-a interview awm tur meeting kohna leh agenda paper siam tura kal an ni a. Meeting kohna pawh hi an siam ngei a, Deputy Controller of Examinations, MINECO quarters-a awm chu sign tirin, Commis-sion member-te pawh kohna hi pek an ni.
- M Lalmanzuala, Inquiry Officer, MPSC