FAK PHU SAWRKAR HNATHAWKTE

Mi tinte hian zalen taka awm leh khawsak hi kan duh ṭheuh mai a, min thununtu an awm chuan kan ning mai ṭhin a nih hi. Nimahsela, zalen taka awm hi erawh chu kan thiam lo fo niin a lang a, kan zalenna kan hmang sual duh tlangpui ṭhin a ni.

Mizoramah pawh hian sawrkar hnathawkte hi dan leh hrai kengkawh mumal thei lo sawrkarna hnuaiah hun rei tak an lo khawsa tawh a. Hengte avang hian a ni mai thei a ni, mi tam takin aikal lak theih emaw an ti hial ni? Aikal lak hi dan lo a ni tih pawh an hre lo hial awm e. Office kal danah te pawh, ṭan hun leh bân hunbi pawh awm mumal loin an lo thawk nawk nawk mai a, hun vawn dik ṭulna pawh an hre lo hial mai thei a ni. Hemi avang hian mi tam takin sawrkar hnathawkte awm dan an sawisel nasa em em a. A chhan ber nia lang chu, thununtu mumal an neih loh vang vek a ni.

He kan ram zim têah hian ram rorelna a kairual lo em em mai lah tak a; a huai huai an zalen a, sawrkar hnathawk zingah pawh a thei fate’n an duhna hmun hmunah an thawk thei emaw tih mai turin a awm a. Heng ang tehnuai hnuaiah hian kan rama sawrkar hnathawkte tan chuan ṭhahnem ngaih a har ve bawk em a ni. Anmahni sawrkar hnathawkte thiam loh pawh ni loin, kan ramah dan leh hrai kengkawh zo sawrkar kan neih loh vang vek a ni.

Tunah chuan kohhran leh mi ṭhahnemngaite ṭawngṭaina rah ni ngeia lang chu kan ramah a lo thleng ta a; ram rorelnaa Pathian ram thlentir tumtu sawrkar kan lo nei ta a ni. Chu sawrkar chuan sawrkar hnathawkte chu hun vawng dik tura beiseiin, aikal lakte an titawp ta tih chu kan hre vek awm e. Hun rei tak zalen taka lo awm ṭhin sawrkar hnathawkte chuan zingah kal hma a ngai ta a, tlaiah bân har a ngai ta bawk si a. Aikal laa duh duh ti theite khan aikal la thei tawh loin, anmahni ngeiin rim taka an thawh a ngai ta a ni. Hei hi eptu party-te’n hmanruaah hman tumin sawrkar hnathawkte chu fuihpawrh an lo tum ve reng bawk a, "Sawrkar hnatawkte an zalen lo" tiin an lo sawi ve reng bawk a ni.

Nimahsela, sawrkar hnathawkte hi kan ram ṭhatna tur duhtu an lo tam em em mai a. Sawrkar thupek, an tana phurrit zawk nia lang thei chu thuawih takin an han zâwm duak mai a nih hi; an fakawm tak zet a ni. Duh ni se chu sawrkar hnathawkte hi inthurualin kan rama rorel mektute hi vote hmangin an duh lohzia lantir thei an ni. Nimahsela, kumin 2026 Aizawl Municipal Corporation (AMC) inthlanah khan sawrkar hnathawkte chuan kan sawrkar hrawn mek hi an support zia an vote hmangin an tilang ta a ni. Aizawl khawpui hi sawrkar hnathawk tamna a ni a, sawrkar hnathawkte hian an chhungte ṭheuh hminin, an duh loh lam tan chuan chet harsa tak tur a ni. Nimahsela, sawrkar hnathawkte hian anmahni thununtu sawrkar ZPM party chu duhsak takin an vote a ni tih a chiang hle a a ni; hneh tak maia ZPM party an tlin danah hian.

Chuvangin, Mizorama sawrkar hnathawkte hian kan ram hi an lo hmangaih mang e. Kan ram ṭhatna tur chuan hrehawm pawh an lo pawisa reng reng lo a; ka chhuang tak zet che u a ni.

Nangni sawrkar hnathawk zawng zawngte u, kan ram leh hnam hmangaihtu dik tak chu politician-te ni loin nangni hi in ni tih hi a chiang hle mai. Zalen taka in awm phal lo a, thunun tlattu che u sawrkar hi in tana phurrit zawng niin an lang a. Nimahsela, kan ram tana ṭha zawk tur an ni tih hriain, hel rilru pu miah loin, ṭha takin inthawhpui mai a. In va fakawm tak em. Hei hi Kristiante awm dan tur dik tak chu a ni e. In rilru a ṭhain in ropui tak zet a ni. In zarah he ram hian hma lam panin a kal zel dawn a nih hi. Huai takin, Pathian rinchhanin, mahni hrehawm pawisa loin kal zel u la, India rama state nuam leh changkang ber min thlenpui ngei ang che u aw. In tel lo chuan kan ram hian hmasawnna kawng a zawh thei si lo. Kan ram changkanna hi nangmahni ko-ah a innghat a, in kutah kan hnam damna hi a awm a ni. Kan ram leh hnam in hmangaih avangin ka chhuangin ka fak tak zet che u a ni.

- Hausanga Hauzel