ILP hian CAB lakah Min chhanhim zo ang em?

Tun hnai ni 5.10.2019-a Union Home Minister, Amit Shah lo kal tur chungchangah NGO co-ordination Committee in Pawndum nena hmuah an lo tum hnua an ṭhulh leh hnuah ILP hi CAB laka kan inhumhim theihna tur ang ziazangin thu an lo chhuah ta mai hian ngaih­tuahna a ti pelhe deuh a, han chhuizau lawk ila. 

Inner Line Permit (ILP) kan tih hi India khua leh tui tán, India ram chhung State ṭhenkhat venhim bik, Protected Area chhunga luhphalna a ni a. British rorelna hnuaia India a kûn lai khan Bengal Eastern Frontier Regulation, 1873 hi lo duang chhuakin he Regulation hnuaiah hian ILP hi tun thlengin kenkawh a lo ni chho ta a ni. He dan siamna chhan tak chu Crown Colony hun laia ‘British Subject’ bik tea, oil leh elephant trade te khauh taka khuahkhirh kha a ni. A tirah chuan he dan hi British-in an sumdawnna hamṭhatna atan an siam a ni a, a hnuah erawh North-East India-a Tribal culture venhimna atan hman chhoh a lo ni. ILP han bihchiang lawk ila: 

Temporary ILP: Temporary ILP hi ni 15 a dam a, ni 15 dang extend dil leh theih a ni. Sumdawnna atan hman theih a ni dawn lo a, zin veivahna atan chauh a ni ang. Temporary ILP hi India ram chhunga Mizoram House kan neih hrang hrang Silchar, Kolkata, New Delhi, Shillong leh Gauhati aṭangin pek chhuah theih a ni a, hei bakah Lengpui Airport-a Dy. Superintendent of Police, SDO(C), Ngopa leh Vairengte, ADC, Bairabi, Officer-in-charge, Kanhmun P.S., Post Commander, BPO New Kawnpui/ Saiphai/ Phaisen lamin an pechhuak thei bawk a ni. Temporay Permit thih dawnah Mizoram a châm hun dil belh theih a ni ang. 

Regular ILP: Hei hi thla 6 chhung a nung ang a, vawi hnih bak pawhsei theih a ni lo bawk. Kuthnathawk (labour) tan mimala siam theih a ni, sumdawnna atan hman theih a ni lo. Two years ILP: Hei hi sorkar hnathawk nghet leh nghet lo, State páwn miin amah leh a chhungkaw member te tan a dil thei a, Mizoram chhunga an hnathawh hun chhûng rei zawng ang zela pawhsei theih a ni. Hei bakah hian two years ILP hi trading licence nei te leh Mizoram hma­sawnna mamawhna vànga private leh Public Sector Company-a thawkten an dîl thei bawk. Sipai Canteen neitu leh hnathawkten an dîl thei bawk.

ILP hi han bihchian chuan India ram mi ni sa te, India ram state protected area, he'ng Mizoram, Nagaland leh Arunachal Pradesh-a an lo luhna tura permit chauh a ni. Foreigner lam a kawk lo. CAB, 16 lo pianchhuahna: CAB hi chu foreigner issue daih a ni. ILP nen chuan huang khata khung chi a ni lo. Foreigner-te hian ILP an hmang ve thei lo a, passport zawk a ni an mamawh chu. Chuvangin, ILP leh CAB, foreigner issue hi chhim leh hmar anga inpersan a ni. 

CAB hlauhawm chhan zawk chu dated 31st December, 2014 hma lama India rama lo awm tawh te, Hindu, Sikh, Jain, Christian, Bhuddist te, sakhua vanga an chenna ram Bangladesh, Pakistan leh Afghanistan aṭanga lo lutten citizenship an neihna kawng zawk a ni. CAB kalkawng hi lo thlir ila:

The Passport (Entry to India) Amendment Rules, 2015: Central sorkar hian CAB a lo chhawpchhuah hma hian foreigner-te tan kawng a lo hawnsak fel diam tawh zawk a. The Passport (Entry to India) Amendment Rules, 2015 chu dated 7th September, 2015 khan Notification vide (F. No. 25022/50/20 15-F.I) The Gazette Of India: Extraordinary Part II-Sec. 3(I) a lo chhuah tawh a. Hetah hian Rules 4 (I) (ha) ah chuan heti hian a inziak:-

"(ha) persons belonging to minority communities in Bangladesh and Pakistan, namely, Hindus, Sikhs, Buddhists, Jains, Parsis and Christians who were compelled to seek shelter in India due to religious persecution or fear of religious persecution and entered into India on or before the 31 st December, 2014-

ii)    without valid documents including passport or other travel documents; or

ii)    with valid documents including passport or other travel document and the validity of any of such documents has expired:

Provided that provision of this clause shall take effect from the date of publication of this notification in the Official Gazette."

The Foreigners (Amendment) Order, 2015: Hemi ni vêk hian the Foreigners (Amendment) Order, 2015 pawh enforce theih tura order chhuah nghal a ni. He order vide (F. No. 25022/50/2015-F.I) hian foreigner-te tan kawng a lo hawn zau sak zual sauh a. Hetah hian paragraph 3 hnuaiah paragraph 3A belh a lo ni leh ta a. Hetiang in:- 

"3A. Exemption of certain class of foreigners:- (I) Persons belonging to minority communities in Bangladesh and Pakistan, namely, Hindus, Sikhs, Buddhists, Jains, Parsis and Christians who were compelled to seek shelter in India due to religious persecution or fear of religious persecution and entered into India on or before the 31st December, 2014-

a)    without valid documents including passport or other travel documents and who have been exempted under rule 4 from the provisions of rule 3 of the Passport (Entry into India) Rules, 1950, made under Section 3 of the Passport (Entry to India) Act, 1920; or

b)    with valid documents including passport or other travel document and the validity of any of such documents has expired, are hereby granted exemption from the application of provisions of the Foreigners Act, 1946 and the orders made thereunder in respect of their stay in India without such documents or after the expiry of those documents, as the case may be, from the date of publication of this order in the Official Gazette.” 

Tichuan he laia Bangladesh leh Pakistan aṭang chauha lo lutte hi duhtawk lovin dated 18th July, 2016-ah chuan Notification dang a chhuah leh a; Bangladesh leh Pakistan mai bakah Afghanistan chu an lo belh leh ta a ni. Heta ṭang hian central sorkara BJP hma lo lak tawh dan chu a takin kan hmu thei ang. 

Citizenship Amendmend Bill, 2016 (CAB 16): He’ng ram pathum, Bangladesh, Pakistan leh Afghanistan aṭanga lo lutte hian awlsam zawka India khua leh tui an lo nih theihna tura kawng siamsak tumin Citizenship Act, 1955 chu lo siam danglam an tum leh ta a. Hei hi Citizenship Amendmend Bill, 2016 (CAB 16) kan tih chu a lo ni ta ni. CAB passed tura condition pawimawh zawng zawng hi a chunga Notification tarlanah hian siamfel a lo ni tawh zawk a ni. CAB bulthûm ber chu han bihchiang ila: 

a)    The Bill seeks to amend the Citizenship Act, 1955 to make illegal migrants who have entered into India on or before 31st December, 2014 such as Hindus, Sikhs, Buddhists, Jains, Parsis and Christians from Afghanistan, Bangladesh and Pakistan, eligible for applying for citizenship. 

b)    Under the Principal Act, one of the require­ments for citizenship by naturalisation is that the applicant must have resided or served a Government in India for not less than 11 years. This Bill reduces this to not less than 6 years. 

A chunga kan hmuh ang hian CAB hi pass lo mah se, ram pathum kan sawi tak aṭang hian zalèn takin foreigner-te hian India ram hi an lo lut thei tawh tlat mai a. He’ng te hian India ram lo lut turin dânin a phût ang Passport leh document dang felfai tak an neih a ngai kher tawh lo tih kan hrethiam ang. 

Citizenship by Naturalisation: CAB hian a tum ber chu sakhuana vanga India rama lo lut te khua leh tui (citizenship) neihtir a ni a, chu mi tur chuan Citizenship Act, 1955 siamṭhat a ngai a ni. Kan dan ding lai mék Citizenship Act, 1955-ah hi chuan hna vang emaw, thildang pawimawh vanga Passport felfai tak nena India rama lo lut te, chhan leh vang ṭhatak vanga chámhlen ta te chuan kum 11 aia tlém lo India rama an awm tawh chuan by Naturalisation-in khua leh tui nihna hi an dîl thei chauh a ni. 

Amaherawhchu, CAB hi passed a nih chuan he’ng Hindus, Sikhs, Buddhists, Jains, Parsis and Christians te hian sâkhua vanga tihduhdah an tawrh vanga Afghanistan, Bangladesh leh Pakistan aṭanga India ram 31st December, 2014 hma lama lo lut te chuan valid document an nei emaw, nei lo emaw pawh nise citizenship hi an dîl nghal thei a, hei bakah he mi hnu lama lo lut te pawh kum 6 an awm tlin tawh chuan Citizenship hi an dil thei tawh dawn a ni. 

CAB leh ILP danglamna: CAB hi chu Foreigner chungchang bik, India rama Citizen­ship an lo neihna tura Indian Citizenship Act, 1955 siamṭhatna (Amendment) na tur a ni. Foreigner te hian India rama lo lut tura an ma­mawh chu ILP ni lovin Passport zawk a ni. 

CAB hi chuan ram dang kan sawi taka mi te, sakhua vanga tihduhdah tuarten document an neih kher a phut tawh lo a, lo luh phalna an Passport valid lo mah se a phalsak tawh dawn a ni. 

ILP erawh chu India mi ni sa rengten hmar­chhak protected state pathum Mizoram, Arunachal Pradesh leh Nagaland-a an lo luh theihna tura Permit ngai mai a ni. ILP hi chu foreigner-in an hmang ve lo a, Indian Citizenship nei saten an hmang zawk. 

Chuvangin, CAB laka kan inven theihna ang mai leh CAB-a telh vanga ILP hi kan himna tur anga chantir hi a subject kan man pha lo deuh em? Passport leh ILP hman theihna hi ngaihfin chi a ni lo a, mipui nawlpui te hi thu dik hrula bâwlzan chi kan ni chiah em? Kan ram neihchhun hi chu thutak leh huaisenna hmangin kan sah hual ve dawn lawm ni Zofate hian. 

- Lalnunmawia Pachuau