Education deptt. leh sorkar

Tun hnaiah School education department-in sawi a hlawh leh ta hat mai. Tun MNF ministry hma pawhin School education deparment hi a len em vang nge, a bawlhhlawh vang zawk ka hre lo a, sawi hlawh department a ni fo mai. 

Tunah Minister tharin School edu­cation department a enkawl a, zirtirtu hna lak a nih dawn aṭangin mipui sawi a hlawh tawh. Tunah zirtirtu an la fel a, sawi zui a la hlawh reng tho mai. He deparment hi a pawimawh dan leh kan enkawl dan nena khaikhin chuan Mizoram hian pawi lian tak kan khawih niin a lang. 

World class edu­cation kan beisei mek laiin Mizoram education department hian hma sawn lam aiin chhiat lam a pan zel zawk tlatin a lang. Tunlai chhanah ram tichhe tur hian atomic bomb leh missile ṭha tak tak kan mamawh lo a, zirna ṭha lo leh zirtirtu lak dan fel lote hi kan ram tichhetu tur chu a ni. Hmanah India-in min bomb kan ti a, vui hmui kan tichhah a. Mahni khua leh tuite laka khatiang taka an che duh kha a mak reng a ni. Mahse hman aiin tun, kan zalen viau hnu hian kan ram hi a chhe zawk hial em? A bikin zirna lamah phei chuan central service pawh kan nei tlem tawh zawk daih. Hetiang taka kan tlakhniam chhan chu kan department pawimawh ber School Education department kan sawp chhiat lutuk vang niah ka ngai. 

Engineer te in sak leh lung rem ṭha lo vangin chhiatna tam tak kan tawk tawh a, Lei pawh a chim fo. Sorkar hnathawk mi corrupt ten mipui sum tam tak an chheprelh a. Contractor hlemhlete leh contractor lemte vangin hna chhe pui pui kan hmu fo. Heng zawng zawng aia pawi zawk chu education depart­ment leh zirna kan sawp chhiat lutuk tawh vanga Mizoram zirna in a tlakchhiat phah hi a thinrimthlak. Internet kan neih ṭhat hma, engkim a harsat zawk lai, kan nu leh pa te hun pawh tluk loa ṭhalai thluak ṭha zawkte dinhmun hniam taka kan awm hi a pawi ber chu a ni. Hmarchhaka hnam hnuai­hnung zawkte pawh kan tluk tawh lo e. Zirna a ṭhat loh chuan ram a tluchhe dawn si a. 

- Vohbika pa