PUAN BIH

Mizo hmeichhiate hian puan an bih ṭhin a, Mizo mipate chuan puan an veng ṭhin thung. Tunlai hian kan hmeichhia ṭhenkhatte zingah, puan ka bih ti loin "Puan ka veng," ti an awm ta fo mai. He ṭawngkam hi kan pi leh pute khan an hman ngai loh, ṭawng dik lo a ni awm e. Mizo hmeichhiate u, puan hi veng loin, bih zel ang che u.

Hmânlai angin in tan puan bih reng chu a harsa tawh hle mai thei a, nimahsela, puan bihna tur hun leh hmunte fel taka ruatin, puan inbih zel dawn nia. Tunah pawh, biak inah leh khawhar ina in kal changtea puan in bih ṭhin hi a mawi hle. Hmeichhiate’n puan in bih hian Mizo mipate mitah chuan in lang nû a, in lang hmeichhia hnap bik a; puan inb ih hi mawi an ti hle a ni. Mizo mipate hian puipun nikhuaa kalpuiah leh hnam dang hmuhah pawh puan bih chung hian an zahpui lo che u a, an chhuang zawk che u a ni.

Mizo hmeichhiate’n puan in bih hian kan hnam incheina in chhawm nung zel tihna a ni a, kan hnam tan in thawk ropui tak zet. Khawvela hnam tam takte hi an hnam incheina chhawm nung zeltu chu an hmeichhiate an ni. Mizo hmeichhiate pawh hian kan hnam incheina chhawm nungtu in ni tih hriain puan bih zel ang che u.

Hnam changkang hmasate’n an hnam inchei dan hlui bânsanin an inchei dan an tichangkang zel a. Chutiang bawkin Mizo hmeichhiate pawhin kan pi leh pute hun lai aṭanga kan hnam incheina puan bih chu chhawm nung zelin, tunlai mil zelin, an puan bih tur an cheiin an tichangkang thei zel. Puan mawi tak tak an tah thiam zelte hi an themthiamzia tilangtu a van ni em.

Hnam ṭhenkhat hian an hmeichhiate hi an hnute bu lang tluah tluahin leh, an malpui thui tak taka langin an incheitir ṭhin a. Heng hnam mipate hian an hmeichhiate hi an tithangtlawm hle tih an hre lo ni tur a ni; mipate tan hmeichhiate zuamawmin an awmtir tihna ni si. Pathianin hmeichhia leh mipa inkara inît tawnna a siamah hian, hmeichhia an taksa a lan thui lutuk chuan mipate tan tisa châkna sualah a hruai lut thei a, pawngsul duhna a puttir fo a ni. Chuvangin, kan inchei dan hian mi dangte tan nghawng ṭha lo tak a then thei tih hriain, kan fimkhur a ngai hle. Kan hmeichhiate’n puan an bih hian an mahni a tizahawm hle a ni.

Pi leh pute aṭangin Mizo hmeichhiate’n puan an bih a, tunlai thlengin puan mawi leh changkang ṭha tak tak an la tah a, puan an la bih zel mai hi lawmawm tak a ni. Hetihlai hian, hmânlai Mizo mipate angin tunlai Mizo mipate’n puan an veng chhunzawm tawh lo a, Sapho inchei dan la chhawngin an inchei daih mai hi i ngaihtuah ngai em? Eng vang nge ni ang le? A chhan ni thei âwma ka rin chu, kan hnam mipa incheina puan ven hi tunlaiah chuan incheina mawi tak a ni lo a, mi a tihnawkin a tibuarchuar theihna chin a awm tlat a, mipa an ni nachung hian ṭhut fimkhur a ti ngai hle. Chu lo rêngah pawh, tunlai khawvel changkang zelah hian zahpuiawmna chin pawh a awm hial awm e.

Chuvangin, Mizo mipate hian puan ven hi bànsan ta mai ni tur an ni. Heti hi a nih tak siah chuan, kan hnam incheina vawng nung zel turin kan hmeichhiate hian mawi leh nalh takin puan hi bih zel mai rawh se.

- Hausanga Hauzel