KA THIL VEI PAHNIH
Tunlaia ka thil vei pahnih ziah ka tum a, chu chu motor-a phone number dah vek tura thuchhuah chungchang leh chhang (bakery) fûnna stapler pin-a an chilh fo chungchang a ni.
Hman ni chu damdawi in pakhatah security duty leh thawktu ho an lo buai hle mai a. Mi pakhat hian a motor chu damdawi in compound-ah damlo dah zawk tura insawiin an tlan luhtir a, a insawi anga awm ta lo chuan a motor chu tlan chhuak leh mai lovin, dah phal lohna hmunah hun rei tak a lo dah a. Motor-ah phone number a dah loh avangin security duty leh thawktu ṭhenkhatte chu an lo buai hle mai a. Hetiang hi an tawng zeuh zeuh niin an sawi.
Motor-a phone number dah chung-changa hi sawrkar hotute aṭangin tih vek tur tiin thuchhuah hi awm se, hmun tam taka kan buaina hi kan pumpelh ngeiin ka ring. Mi motor dahnaa motor dah chut chut, han phone mai dawna motor-a phone number dah si lo, mi ṭhenkhatte tana buaina tling hi a awm fo mai. Tin, motor an dahna hmuna hna thawh ngai si, motor an dah tlat si, a neitute’n an phone number an dah loh avanga hnathawktute buai pawh hi an awm fo.
Tin, kohhran inkhawmpui nikhua te, inneih leh mitthi vuinaah te hian mi ṭhenkhatte’n an motor-a an phone number an dah lo hian min tibuai fo bawk. Mi eng emaw zatin an motor-ah an phone number an dah a, chutihlaiin, dah nachang hre lo hi an la tam hle. Kan sawrkar hotute hian hei hi ngai pawimawh se, motor nei apiangte’n mahni motor-ah mahni phone number dah vek tur, tih hi thuchhuah nei vat teh se.
Chhang (bakery) fûnna stapler pin-a an chilh ṭhin chungchang hi han sawi leh ila. Mizote hi kan changkang chho zel a, kan chhang ei te pawh a tuiin a changkang chho zel a ni. Chutihlaiin, kan chhang ei ṭhin, bakery chhang ṭhenkhat hi stapler pin-in an chilh fo mai a, hei hi a ṭha lovin a him lo hle. Naupangte tan phei chuan a him lo lehzual a ni.
Hman ni khan mi pakhatin stapler pin a ei tel ṭêp thu min hrilh a, thil pawi a thlen hmain a hmu chhuak hlauh a. Hmu lo palh se chu thil pawi zawk thleng thei a ni. Kan ei tur tuamna stapler pin-a an chilh fo hi a him lo a, a changkang lo bawk a ni. Hei vang hian chhang siam ṭhinte’n chhang fûnna chilh nan stapler pin an hmang fo hi an sim a ṭul. Kan sawrkar hotute pawhin mipui himna an ngaihtuah a, thuchhuah siama an control a ṭul hle a ni.
Heng thil pahnih hi tunlaia ka vei ve em em a ni a. Mimal leh a kaihhnawih mite’n an bawhzui theih a awm laiin, sawrkar hotute’n an bawhzui ngai a ni ber. Chanchinbu kaltlang hian kan sawrkar hotute ka ngen a, hma an lak thuai pawh ka beisei a ni.
- B. Lalhmingmawia