Manifesto-ah kalkawng tha min tiam ru

Rual awh a va na ve. Bihar Chief Minister Nitish Kumar hmalak nasatzia ralkhatah kan hre ṭhin, a hmun ngeia zuk hmuh takah chuan, rual awh a na lehzual.

CM a nih aṭangin, an rama Gunda hote nen inremna nasa tak a siampui a, chu bak thil langsar tak chu, a kalkawng siam mawlh mai khu a ni. Patna khawpui ka cham chhungin ka vak kual hman nual, a kawng siam reng reng, cement concrete-in a siam hnuah a chungah alkatra-in a luan leh thlap a; khawpui chhung mai ni lo, thingtlang kawng thlengin, cement concrete a hmang hmiah mai. Chu mai a la ni lo, Japan mi thiam ruaiin, khawpui chhungah a tam thei ang ber flyover mawi tak tak a siam reh ruah mai bawk.

Kan ram tlang ram aia laih hautak, Pune leh Mumbai inkarah khuan, lung chang lutuk, kham chhengchhe tak maiah 6 lines kawng an sial ruah mai bawk. Tum chuan kawng a lo awm ngei chu a ni.

Kan phai zin chu lei lamah kan lo haw chho a, kumin April thla a Silchar - Aizawl kawng mam ṭha tak kha, tunah chuan a lo khuar dek duk tawh mai nia mawle! Tin, kawng vei lam deuh vek a chhe bawk. Hemiin a entir chu, kan ram aṭang hian thawn chhuah nei lovin kan lak luh lam a rit hle ṭhin tihna a ni. Chu chu thukhat ni se, road divider rawng hnawih pawh a dâk hmaa kan insawh nghal boh boh mai hi zawng, a tlo lo lulai em a ni.

Kan ram kawng hi, lung a hnip avangin a chhe hma lutuk. Cement nena charh khawng loh chuan, kum khat bak a daih lo, cement nena ka charh khawng loh avangin, a khawk tawh hlek chuan, lung chang ṭha kan hmang ve si lova, a khuar nghal duk duk lo thei lo.

Bawngkawm - Ṭhuampui road tawite cement concrete kan hmang ve a, tun thlengin a la ṭha, kan concrete loh chin chu khuar hlirin a khat phei leh tawh.

Patna khawpui chhung chauha an kawng siam khu, Mizoram pum kawng nen a inchen vel ang, khawpui pawn highway chu sawilan chi pawh a ni lo. Maharashtra state-ah chuan Natianal highway ai mahin state highway an nei tlo zawk. Kan ram national highway tal hi chu cement concrete nen chhung chhuak ve ila, a va duhawm tak em.

Ni e, kan chhuanlam dawrawm tak, motor engzat in nge nitin zawh, sum sen milin kan chhawr ṭangkai em tih hi technical leh engeneer ho zawhna a ni fo. Chuvangin, kawng ṭha leh zau kan duh chuan mihring kan tam a ṭul a, nitin motor veivak a tam a ṭul. Chutiang tur chuan Mizo hi kan pun thur thur a ngai a ni ber mai, tia kan ṭan tlat chuan, khaw var kan nghak chhuak mai lo ang.

Kan ram chu tlangram a ni a, kan lung a chang ṭha ve tawk lo, chuvangin cement concrete a ngai, tia thupuia kan neih phawt chuan, ministry leh state sum nen, kum khat daih lek ni lo kawngpui
ṭha hi chu kan neih a hun ve tawh a ni.

Kawngpui ṭha hi kan ram mamawh a ni in tih phawt chuan, hei aia kawng
ṭha hi min phah chhuahsak theih, kei mi mawl hian ka ring fan a ni.

Kawng ṭha kan neih phawt chuan, development zuang tur in tih kha, a takin a thleng zawk lo’ng maw?

- Lalrinliana Colney