Zalenna hmang sual su

Kan ngahhlelh Krismas kan hnaih ta hle mai. Krismas hunlai hi tleirawlten thil sual an tih ṭanna a ni ṭhin a, damdawi inah lah lirtheia chetsualna emaw, insual buaina avanga lut an tam hunlai tak a ni. Hetiang thil a thlen a, sualna kawnga kan luhna bul inṭanna a nihna chhan chu kan zalenna kan hman dik loh vang a ni.

Krismas lai hian nu leh paten kan fate hi zalenna kan pe viau a, ṭhianho an len te kan phal ṭhin. Tleirawl leh naupangte pawh hun dang ai chuan an len chhuah kan phalsak viau a, hetianga zalênna kan pek nasat lai tak hi kanwg sual an dai ṭanna a nih avangin nu leh pate pawh kan fimkhur a ngai hle.

Nula leh tlangval tam tak hian he hun hi kawppui leh ngaih-zawngte nen ngeia hman an tum tlangpui a, hun thawl kan pek lutukna lamah thil dik lo a awm phah fo a, kan fimkhur tlan a ngai. Nu leh pate hian kan fate hi zalênna ka pe duh a nih pawhin pek dan tawk kan thiam a ngai hle. Hetiang hunlaia miten an fate a thlahthlam avanga thlahthlam a, anmahni tlat tlata tlattir hian nakkinah inchhirna min thlen duh viau. Chuvangin kan fimkhur tlan a ngai khawp mai.

Ṭhalaite pawh hian zalênna kan neih hi hman dan tawk kan thiam loh chuan lungngaihna leh rilru hrehawmnain min hmuak thuai dawn tih ngaihtuah nachang hriat tur. Hun danga zalen ngai reng reng lo anga a nuam thei ang bera hman kan tumna hian ruihhlo bawihah min luhtir a, inpawlna aṭanga natna hlauhawm kai theih min kaitir ṭhin. Mahni inven kan thiam lo a nih chuan chhuah thui loh mai a ṭha. Insum theihna tlachham tan chuan chhungte bulah hmang ila, inchhirna a awm lo ber.

Hunpui kan tih fo ṭhin hi sualna lama kan hunpuiah kan chantir lek lek ta mai hi a lungngaihthlak hle. Nawmchenna tur kan zawng nasa lutuk hian hrehawmna mi tam takah a thlen tawh a, kan zalênna kan hman sual chuan a la thleng zel dawn.

Lirtheia kal chhuakte pawhin tlân chak lamah chin tâwk neihte hi a ṭha. Mahni nuam tihzawng a nih avanga midang tana hlauhawm leh ri bengchheng kan thlen kher ṭhin hi a ṭha lo. Veng tam tak phei chuan an duh lo a, bike ri ring chi phei chu an tiding hman lo a nih pawha sairawkherh leh thil dang hmanga um zui an tum. Tun Krismasah hian kan zalênna hi hmang sual lo turin ṭan la ila, midang zalênna ngaih pawimawhsakin, an himna tur i ngaihtuah tlang teh ang u.

- Lalkhawliana Hualngo