Krismas lo hmuah dan atana ṭha ka tih (A lanna tlang dang aṭangin) - R.Lalvenhima

Mi birthday kan lawm chuan hlim hmel pu lova awm kan hlau a, kan intihlim lui hram ṭhin. Mahse chhungril lamah a thawh loh chuan hlim tum ṭalh hi thil harsa tak a ni. Chutiang deuh chuan Krismas a lo thlen dawn hian hlim hmel put loh hlau si, hlim thiam tak tak si lo hian lai deuhvin a awm theih. Krismas hlutna tak kan hriat chian erawh chuan hlim vut anga lang si lo, hlim ru ang reng tak si hian a awm theih dawn a lo ni. Chutianga kan lo awm thiam theih nan tun ṭumah hian a tawi thei ang bera sawi lan ka tum a ni.

Pu R.L. Kamlala chuan tihian hla a lo phuah - "Aw min hrilh rawh thukna ropui, Ranthleng leh thing anchhe dawng leh Vana lallukhum a inzawm, Lei Eden leh Salem thar nen..." tiin.

He hlathua kan hmuh chu, Vana lallukhum hlawh turin Thing anchhedawng kal tlang a ngai. Thing anchhedawng thleng tur chuan Ranthlenga bul ṭan a ngai si. Chuvang chuan a ni, hetiang taka Bethlehem (Isua pianna hmun) pawh hian sawi a lo hlawh tak ni. Isua krista lo pian chhan chu thing anchhe dawng (kross) a thi turin a ni - chu chu Vana lallukhum kan hlawh theih nan a ni.

A hnuaia Bible chang tarlan
ṭhenkhatah te hian Isua krista lo pian chhan, December 25 kan lawm chhan, Krismas (krista ruai) lo awm chhan chu tarlanin a awm a ni. Boralte zawnga chhandam turin mihring fapa hi a lokal a ni reng a ni (Luk 19:10). Keizawng nun an neihnan tam taka an neih nan, lokal ka ni (John10:10). Pathianin khawvel a hmangaih em em a, chutichuan a fapa mal neih chhun a pe a,amah chu tupawh a ring apiang an boral loh va, chatuana nunna an neih zawk nan (Joh. 3:16). Pathian fapa lo lan chhan ber chu diabola hnathawhte a tihboral theih nan a ni (I Joh 3:8). Mitin ta tur chanchin?ha lawmawm em em ka rawn thlen che u a ni (Luk 2:10). En teh u, Pathian beramno khawvel sual kalpuitu tur saw (John 1:29). Awle , heng aṭang ringawt pawh hian Lal Isua lo pian chhan (lokal chhan) chu a hriat theih hle tawhin ka hria.

Tih tur (target) neiin a lokal a, chatuan nunna min pe turin. Mahse chu a target chu tihlawhtling turin mihring anga a lo pian ve kher kha a ngai si a (kan lo hriatthiam theih nan). Mari, nula thianghlim chu a thlang a, Josefa fa angin enkawl chhoh a lo ni ta a - thingrem siamtu fa angin. Khawvelah kum 33 leh a chanve vel hun rawn hmangin, chutah a subject ber Kross thihna chu a rawn hmachhawn ta le. Kan sualnate a thihpui ta vek a, chutah nithum niah thlan aṭangin kaihthawh a lo ni leh ta a. Vanah a pa ding lamah ṭhuttirin a lo awm leh ta. Tichuan, Vana ṭhu chungin a nun (Krista nun) chu keini hi pek kan lo ni ta a. Chu nun min pek chu chatuan nunna kan chan hi a lo ni ta a ni. A va ropui em!

Tichuan, chumi nunna neih hlutzia chu miin a hriat chian tawk loh chuan Krismas (Krista ruai) Isua krista lo pianna ni pawh chu a ngaihlu tak tak thei dawn lo tihna a nih chu. Amaherawhchu, he khawvela a lo pian chhan ber chu kan lo hriat chian tawh chuan hlim tum luih vak lam ni lovin, hlimna mak tak, ri hlut chuang si lo hian thinlungah a lo thleng ta mai zawk a ni. Chu chuan a ken tel leh behbawm- inkhawm, zaikhawm, kawn chei, Biakin chei, lamlian chei, thawmhnaw thar neih, Masi ruai, chhang kan, etc chu kan lo hmu thiamin kan lo ṭangkaipui thiam ta vek zawk dawn a ni.

A dik tak chuan Bethlehem dai mai ni lovin, ram tin a nghawr ta vek zawk a nih hi, a pian chhan hre ve miah lo thleng thlengin a nghawr a, eng eng emaw te pawh a nghawr ṭeuh ta ve ang. Mahni hun tawn dan a zir zelin. Kan piancham ve hi chu mi tlemte deuh chauhvin min hriatpui a (a nghawr tlem ve khawp mai). Chu pawh chu min lo la theihnghilh sak ziah zui! Krista lo piang (Dec 25) erawh hi zawng a ropui khawp mai; khawvel hi a nghawr nghing chiang hle a ni.

Lal Isua lo pian chhanah hian chiang ila, ngaihtuahna hmang ila. Chutiang a lo nih chuan mite angin ropui takin lawm thei kher lo mahila, Krista ruai (a taksa chu) thlarauvin kan ṭheh ngei dawn a nih chu. Lalpa ka lawm e. Min tlan turin mihring angin i lo pian ve kher a ṭul si a. Min chhandam turin, ka tan tan chaw pekna thleng, hmun tlawm tak i lo thlang a. Chibai ka buk a che... tiin. Mitinin, kan neih ṭha ber leh kan neih tlan vek, kan thlarau, rilru, taksa hi Lal Isua tan hlan ila, chibai i buk
ṭheuh ang u le. Chutichuan Krismas tak tak kan hmang thei dawn a ni. A men.