In sakah geologist rawih

Mizoram hi lei min duhna hmun leh lirnghin duhna hmun a ni a, chuvang chuan kan in sakte pawh uluk a ngai hle.

Hun eng emaw ti aṭang khan in sak pawimawhzia kan hre ta a, kan in sakte pawh kan uluk hlawm ta hle. Laipuitlanga lei a min vak ṭum pawh khan kan in sak fuh lo se chuan kha ai khan kan tuar na ngeiin ka ring a, concrete in pakhat phei chuan a hnuaia tla thla zel tur a lo dan theih mai bakah, tluin, a chhawng pakhat erawh a sâwp chauh a nih kha.

In kan sakin engi-neer râwn nachang kan hre ta a, kan in sak pawh a ṭha tain a rinawm ta hle. Mahse engineer te hian leilung nihphung tak tak erawh an zir thûk em em loin a lang a, chuvang chuan Geologist te kan râwn tel a ṭul ta hle.

Tunhnai aṭang khan AMC pawhin in sak leh in sak tur ruahman chungchangah geolo-gist te a thawhpui ta a, hetiang nachang an hria hi ka lawm hle. Leilung nihphung tak tak, a pianzia a zira lei min duhna leh laih pawha lei min lawk theih loh tur chi thlenga hriate hi kan râwn tam a ṭul ta hle.

Rangvamual lei min reng khu mi tam tak chuan a piah deuha mi pakhat in sa turin lei a laih avanga min niin an ngai. Geologist te zuiin ṭum khat chu kan zu en ve a, geologist-te chuan a leilung awm danah min mai tur a ni lo an ti a, a minna chhan tak tak zawk chu a chung lama zu an sak ruknaa tui chhia lei hnuaia an luhtir vang leh, a leilung thawlêng vang hrim hrim a ni an ti. Tunhnaiah Upper Khatla pheiah lei laih vanga leikhi a awm thu sawi a ni leh a, geologist ten a hmunah enfiah se, a nihna tak a chiang ang.

Kan leilung hi a sakhat lo a, kan leilung sakhat dan azira in sak rih ngam theih te, lei laih dawnin, khawi lai aṭangin nge lai ila lei min lakah a him zawk ang tihte hi thil pawimawh a ni. Hetiang kan hriat a, in him, ṭha leh tlo, ṭhenawm leh in bul hnaia mite tan pawha hlauhawm lo tur kan neih theih nan geologist te hi rawih nachang hria ila, kan him lehzual hle ang.

Engineer rualte pawh hian thil tam tak an hria a, an rua-hmanna pawh a ṭha-in, an kutchhuakte pawh a ṭha hlawm hle. Kan him lehzual nen Mizote hian geologist kan nei nual tawh a, heng mite hi rawn nachang i hria ang u. In hmun kan lei turah te pawh, nakina leimin thlen theihna tur hmun a ni em tihte thleng hian kan hriat a, kan chian a pawimawh. Hotêa kan sum sen zawng zawng riral theihna a ni.

Kan geologist te hi kan hman ṭangkai thiam a pawimawh. Sorkar in sak leh hmun siamah pawh geologist te hi kan survey tir ziah em chu ka hre lo a, kan survey-tir loh ṭhin a nih chuan hman ṭangkai ngei chi a ni ang.

- Lalsanglura