Relationship Part-II them (Nature Lover Rokunga, Mizo Century Poet)

Inpuang hmasa leh phawng mai ila. Zingkar Bournvita in laiin ka zai mai mai a, ka chin ṭhan pangngai, “Aw, khawvel puan ang a chul tur hi” tih hla sain. Ka tui chawp zel a, chang li leh a thunawn ka sa zo ta vek mai a. Thunawn sa nawn chhuak zelin, ka lo hre reng ṭha tlat a. Mahse, nuam ti taka sain ngaihtuah chiam loin kan lo sa liam mai mai ṭhinte kha ka ui hnuhnawh a. Tihian ka han chhamchhuak leh ta mai a ni. Part-II them, a tlang lian lam niin ka ngai.

Siamtu Pathianin Mizo Century Poet Rokunga min pe hi a va lawmawm em! Part-I ah khan Pathian, mihringte leh thilsiamte relationship, a tlangpui tawitein kan sawi a. Part-II ah hian mihringte relationship thlûr bing ka lo rilruk zet nâ a, zingkara ka hla sak hian min tur ut ut leh ta pek a, ka tuar zo lo a ni. Tu dang mah tihbuai ka tum lo.

Pu Rokunga’n thilpek ropui, Pathian hnen aṭanga a dawn min sem nghal i ti lehnghal ang. ‘Sem sem dam dam – Zo nun mawi’ a mawi leh ta.

Khawvel, nature, a zavaia lawmtu leh hmangaihtu Rokunga hmel a lang hmelṭha! A hmangaih khawvel ṭhatzia, nawmzia a sawi chhuahna ṭawngkam hlei hlei a mawi zual. A hla pumpui, chang 4 leh thunawnah hian paih leh belh ngai a awm mawlh lo (Trevelyan English ang mai). A fiah, a kim thlap. A hla phuah taksa (embodiment) Rokunga a ni hul hual! Mi va han run fakau em ve aw!

A thu rem khawm dante hi a sangin a fuh zozai–classic. Chhiar nawn la, ngaihtuah nawn teh.

Lei mawina

1. Aw khawvel puan ang a chul tur hi,

Tin kim dawnin han thlir ila;

Aw hring nun par anga chul tur hi,

Hma te’n zamual a liam tur chu.

Aw lei mawina thinlai tihlimtu,

Zantiang chhawrthla leh si-ar eng mawi;

Aw zing eng mawi leh tlaitla eng mawi,

Damlai khuavel nun khua tinuam an lo vul rawh.

2. Tlang sang thing zar mawi leh phai zawla,

Suanglungpui leh luipui luang ri;

Van râng chhâm leh thlifim leng velin,

Khawvel mawi hi hla mawi an pe.

3. Khua ṭhal lenkawl ni chhuak eng ri riai,

Ṭuahpui par leh vau phunchawng par;

Chungtiang len thiam kawl-ngo thla khawng ri,

Lei rawngbawl kum siam an lo ni.

4. I mawi mang e piallei kan chenna,

Rianghlei tan par ang vul ve la;

Ṭahlai ni kawlkungah liam zelin,

Hlim lai ni par ang vul rawh se.

Khawvel hmangaihtu Rokunga’n a dam chhan ber a hre lo lul lo e. A hlaphuah hnuhnung ber nia sawi, thu tawpna hi mawi ka ti tawpthang. En teh maw–KHB 163.

“Ka thla chau a châwl ta,

I thisen luangah chuan;

A ropui dawn mang e,

I chhandamna hmun ralmuanga,

Ka châwl kumkhua tur chu.

Chiang ka tih ve chhan ber chu, thunawn ennawn hian a chiang:

I zahngaihna ringin,

I ângchhung ka rawn zawng;

I khawngaih bân vuanin,

I ngaihdamna ka dil a che,

Lalpa mi ngaidam rawh.

A dilna ṭawngkam thumal ṭawng chhante ka en hian, Lal Isua dinglama misual khenbeh ka mitthlaah a lo lang a, chawpchilh ngaihdamna ka hmu fiah! Pu Rokunga muangin châwl rawh se.

- F. Lalremsiama,

Chaltlang. Ph : 8415994340