Mizote tan beiseina kâwl a êng ta e

Nikum mai kha a ni, zan khat chu, tlangval pakhat, la naupan hmel tak hi, ka ṭanpui theih beiseiin min rawn pan a, "Min ṭawngṭaipui teh, thih leh dam inkara awm reng mai hi, a hrehawm em mai, ka ning tawh tak zet a ni," a ti mawlh mawlh mai a. A mittui lah chu a parawl pàr mai bawk si a, ka lainatin ka khawngaih hle mai, ka'n thlek vang vang a, a taksaah chuan han hmuh theih mai turin hliam na tak, engmah hmuh tur a awm lo va. Taksa ruangam pangngai tak a pu si a, amah pawh a duh duhin a che thei a. Nimahsela, a hmel erawh chu a dawldangin a nung lo em em mai a, tinung reng reng a nei lo a ni. A taksa chuan eng emaw tak mamawh leh tlakchham a nei tih chu a hriat reng mai.

Mihring nunphung pangngaia a nun theih lohna a rei tawh thu zawi sapin a sawi a, nun kawng dik zawh leh turin Pathianin chhia leh ṭha hriatna fim tak min pek hi, a hmang hleithei tawh lo a ni awm e. A insawi danin, a thisen zungzam chu ruihhloin a fan hneh em tawh avangin chu chuan a ngaihtuahna chu hruai boin a thunun tlat tawh a. Ruihhlo tel lo chuan dam zo dawnin a inhre tawh lo va, a zawng ruai ruai mai ṭhin a ni. A hmuh theihna tur a nih phawt chuan engpawh tih a inhuam a, mi thil ruk leh lak mai pawh hreh tawh loin, dawt sawite pawh a pawisaktir thei tawh lo va. A thil mamawh neih nan chuan, mi kutthlak hial pawh ngai se, a ti mai zel niin a insawi. Heng ang dinhmuna a din avang hian, nunphung pangngaia nun leh chu thil tih thei tawh lo niin a inhria a. A taksa mamawh ruihhlo tel lo chuan awm ngaina a hre lo hi a ni ber mai.

Vawi tam tak, ruihhlo lak aṭanga tâl chhuahna kawng zawngin Chhandamna Camping-ahte a lut fo tawh a, chhanchhuahna Home-ahte pawh awm ṭhin tawhin Jail-ah hial pawh a lo táng tawh a. Mahse, mahse, a saltânna ata chu a la tal chhuak thei si lo a ni. A chhungte vuak leh sawisak te tawk ṭhinin, thu ṭha tinreng mai an fah kur ngei nguai tawh a, a sâwt theih chuang si lo va. Tunah chuan Kohhran leh khawtlangahte pawh tu ma'n mi pangngai enin an en tawh loin a inhria a, a tan chuan dam hian awmzia nei pawhin a inhre tawh lo a ni. Hetiang mi hi, eng tin nge, kei, damdawi lama mi thiam Doctor pawh ni lo, Pathian thu zir chhuak pawh ni hek lo hian a saltânna aṭang hian ka hruai chhuak theih teh luk ang ni. A saltanna aṭang chhuak nghal a, a phurrit zawng zawngte kiang nghal duak tura han ṭawngṭaisak theih ka va chak tak em ve aw.

Kan ram zím têah hian zu leh ruihhlo ngawlvei, min rawn pantu ang hi an tam em em mai a, zu leh ruihhlo avangin kan thi zawih zawih mai a nih hi. Kum tinin nau piang aiin mitthi kan tam zawk ta ziah mai le. Hei hi hnam boral tur chhinchhiahna chu a nih hi. He ruihhlo chimawm tak mai hi kan ram leh hnam tan hi chuan hmelma lian ber a ni hial awm asin. Heti chung hian kan rama ruihhlo lo luhna ṭhin, kan ramriahte hian sawrkarin ruihhlo rawn luh tur an dan tháwm kan hre ngai der si lo va, kan ramah hian ruihhlo hi zalen takin a lo lut ṭhin niin a lang. A zuartute pawhin man an tawk zen zen lo ni tur a ni, Ruihho zuara hausakpuite pawh an awm nual tawh nia sawite pawh a awm hial a nih hi. A va pawiin a va rapthlak tak em, Ruihhlo ngaite hian enkawlna ṭha an dawng fumfe bawk si lo a, A thihin kan thi zawih zawih ta mai a nih hi. Hnam boral mai hlauhawmah kan ding ta reng mai a nia, Tih ngaihna lah chu kan hre der hlawm si lova, kan ram chu buaina chhumpui zing hnuaiah na tak tuarin kan rum vawng vawng ta mai a ni. Nimahsela, Pathianin kan hnam boral em chu a phal lo ni tur a ni, Kan ram tan beiseina kawl chu mawi takin a lo eng leh ta e.

Kan hriat ṭheuh angin kan sawrkar hrawn mek hnuaiah hian thil thar kan hmu ta mawlh mawlh mai a, Tunah pawh sawrkar leh tlawmngai pawlte leh Synot ṭangrualin ruihhlo ngaite chhanchhuah nan, Hulhliap short stay Centre an buatsaihah mi tam tak an ṭha chhuak a, a lawmawm hle mai. mi thiam rualin chhanchhuahna hna thawk a, an pen chhuak hi, a ropui tak zet a ni. Hei chauh pawh hi a la ni lo, Mizorama tlawmngai pawl lian ber YMA leh sawrkar ṭang dunin ruihhlo dopui an thlak ta mup mup mai a, Ruihhlo lo luh ṭhinna, ram ri khuaahte chuan ruihhlo lo lut tur an dang ta hmiah mai le, kan rama sual hnathawh rapthlak tak mai hi, danchahin a awm ngei dawn niin a lang ta. Mizote tan beiseina kawl a lo eng ta a ni e. Hawh teh u, Zofate u, mahni chenna khua leh veng ṭheuhahte hian ruihhlo lo lut tur hi i dang ṭheuh teh ang u. Kan ram leh hnam a lo dam leh nan, ṭanrual hi chakna a ni si a.

- Hausanga Hauzel