Community Policing System ṭha neih a hun tawh
Veng/khua chhung police nena mumal taka venhim nan community policing system ṭha tak kan neih a hun tawh khawp mai. Assam hnuaia kan awm lai aṭanga kan chhawm ve mai mai VDP dan (Mizoram Village Defence Organization Rules, 1981) hi ‘The Assam Village Defence Organization Act, 1966’ tlawhchhana kan neih kha a ni a. Tunah hian Mizoram hi state puitling kum 39 lai kan nih tawh hnuah pawh a hranpain, keimahni pual leh kan tualzâl nun milin community policing dan thar ṭha siam tumna kan la nei lo hi a mak ka ti khawp mai.
Dik taka sawi chuan, Mizoram ang tluka community policing system ṭha neih theihna hmun leh ram hi a awm tam lo hlein ka ring ṭhin. Heti khawp hian tlawmngai pawl hrang hrang, a bikin YMA, MHIP, MUP te kan nei ṭha sa a, chu bakah VC leh LC system kan nei bawk.
Heng tlawmngai pawl (NGO)-te leh VC/LC-te hian anmahni area ṭheuhah anmahni ṭha tih dan ang anga veng chhung himna an kalpui hi humsual an dai loh va, mumal leh ṭha taka police/magistrate-te nen thawhhona an neih theih nan state puitling kan ni ve tawh a, Assam hun lai aṭanga kan chhawm VDP dan hi hluihlâwn tawh ila, a hranpa hlakin kan ram leh kan tualzâl nun nena inmil tur leh venhim nan community policing dan ṭha tak kan State Assembly-ah pass-a kan neih hi a hun hle tawh a ni.
A dan hming atan chuan, "The Mizoram Community Police Act" tiin emaw "The Mizoram Village/Community Defence Organization Act" tiin emaw ni ta se?
- CLT Mawia, Parmawi Run, Tkt, Aizawl