Zebra crossing: Ka zak ru deuh!

Kan phai awm ve lai khan zebra crossing rapa dingte kha police-te'n an dîm lo hle, tiangin motor an vaw pawp pawp a, pawisa an chawitir ṭhin.

Traffic Police-te'n June ni 1, 2026 aṭangin kan Aizawl khawpuia kawngpui kânna tura siam zebra crossing-ah "Zebra Crossing ah lirthei din loh tur" tih an târ a. Hei hi zebra crossing-ah lirthei dintir lo tura lirthei khalhtute an zirtirna leh hriattirna a ni kan ti thei ang.

Hetianga traffic police-te'n hma an la hi a lawmawm a, mipui lam pawhin kan zâwm ṭha viau a, awmzia a nei hle niin a hriat. Traffic police-te hmalakna hi mipui lam hian inzir tharna leh inhmuhchhuahna atan hmang ila; police lamin tuna an tih anga an tih reng loh hunah pawh tuna kan tih dan hian kan ti zui zel tur a ni ang.

Zebra crossing-ah "Zebra Crossing ah lirthei din loh tur" tih târ hi a ṭhat viau rual hian, a zahthlak ka ti rilru tlat pek a! Driving license nena lirthei khalhtute hi zebra crossing awmzia leh nihphung hre tura ngaih kan ni. Chutihlaia "Zebra Crossing ah lirthei din loh tur" tih târ a ngai hian traffic rules kan ngaih pawimawh lohzia te, driving manner kan hriat lohzia leh ngaih pawimawh lohzia a lantir a; chuvang chuan, ka zak ru tlat pek a, mualphothlak ka ti deuh tlat pek a nih chu!

- Kezo