Writer te leh Souvenir buaipuitute inkar

Pawl inkhawmpui pual emaw, Jubilee pual leh General Conference pual hian pawl hrang hrang leh Kohhran a ṭhalaite hian Souvenir kan buatsaih ṭhin a. Kan zavaia rilrua awm chu writer larte thuziak dah a, an zara souvenir tha tak siam hi a ni.

Mahse, souvenir buatsaihtute hian thu ziak mite hlutziate hi kan la hre tawk lo hle! Ziak mi ṭhenkhatin an sawi fo chu, "Uluk takin thu ziak kan pe a, a chhuak a, kan ziahna souvenir pawh kan hmu mumal mang lo" tihte hi a ri ta fo mai a, a zialo hle.

Mizo zinga ziaktu lar berte zinga mi leh sawm hlawh ber zing a mi, Pu Mafaa sawi ka hriat chu, "Ziak miten lawmman an neih theih nan hian kum 10 chhung ka lo vahvaihpui tawh a, theihtawpa kan lo beih ve avang hian ziak mi tam takin a hlawkna an tel ve tawh a ni" a ti a, a ṭha hle. An ina leng meuha thu ziak tura sawmtute hnenah chuan thil awmzia a lo hrilhfiah a, an pawm thiam hle zel tihte pawh ka hriatpui a. Thil danga sum kan hman dan ngaihtuah ila, kan souvenir hlawhtlinna tura kan ngen chhuahte hi i hre let ve tawh teh ang khai. Kan mi sawmte lak atanga thu tha tak kan beisei hian, an thiamna bakah lehkhabute an rawn a, uluk leh nasa takin an ngaihtuahna an hmang a, zan rei tak thleng men chang an nei thin. A dik tak chuan kan souvenir siamah hian ziah an chak lo a, ziaktu lar an nih avanga a sawma kan sawm chhuah an nih avang chauha min ziaksak an ni zawk tihte hi hriatsak ila, i ngaihlu thar teh ang u.

Kan souvenir ti ropui tura kan ngaih, thu tha tak min ziah-saktute hi an kut hah man pekna chang kan hre mang lote hi a zialo hle mang e! Ṭhenkhat chu thu ziaka eizawng leh mi bik an ni a, an zara lehkhabu tha tak siam kan nih avangin an kut hah man pawisa pekna chang hi hriat a hun ta hle.

Writer te hian an duh thu rênga an vei zawng an ziah hi an zalenna a ni a, hetiang hunah erawh lawm-man pek an ngai loah ngai ila. Chutiang ni loa kan sawm chhuah-te hi chuan an hunawl tam tak an seng a, an zara lehkhabu tha tak nei thei kan nih avangin lawmthu sawina atan pawisa pekna changte hi i hre tawh teh ang u.

Hetiang kan sawi mek lai hian pawl tam tak chuan hei hi an hre tawh a, writer te kut hah man leh lawmthu sawina bakah souvenir pawh zahawm taka tuamin an pe mek tihte kan hre zel a, chhun-zawm zel ka duh a, thu ziak mite tan he mi sang tam tak punkhawm-naah hian aw rawl ka'n chhuah ve anih hi.

- Lalnunṭawma Fanai