I bike-ah mudguard vuah rawh le
Khai le, fûr a ni leh mek ta. I lirthei ke hnih nei, a bik takin bike khan a ke khuhna–mudguard a nei em? A nei lo a nih chuan fûr chhung na nâ nâ chu mi dang tan i hnawksak loh nan leh i ngeiawm loh nan phuahchawp deuh pawhin lo vuah ve hrâm ta che.
Fûr awm dan chu kan hriat sa vek a ni–ruah a sûr fo dawn a, kawngpuite pawh a huh leh dep dup dawn a, kawngpui hmun ṭhenkhatah phei chuan tui a tling leh dawn. Lirtheiin kawnga kalte a chîl per loh nan lirthei khalhtute kan fimkhur a ngai chho mek a, a bikin bike khalhtute fimkhur a ngai lehzual.
Ruah a sûr lai leh kawngpui tui tling a awmna laiah chuan lirthei khalhtute kan fimkhur tlân a ngai a, tui a tling a ni tih hmuh chian mai lohah pawh tlemtê tê tling a awm fo; kan fimkhur reng a ngai. Tui awmna laiah a bul hnai, lirtheiin i chîl per phâkah mi an awm leh awm loh kan hre tur a ni a, mi an awm a nih chuan chîl per lo tura fimkhur a ṭul.
Khawpui chhungah hian two wheeler zingah ke hnung lam khuhna mudguard nei lo hmuh tur a tam hle; bike hoah hmuh tur a awm tam zual a, scooter ho chu a zia viau. Bike ke hnung lamah mudguard a awm loh emaw, a têt lutuk emaw chuan hnunga tlante leh kawng sira kalte a kein a phiah per ṭhin. Hetiang hi a ngeiawm a, a thinrimthlak bawk; mi dang tan hnawksak nihna a ni.
Mudguard awm lo bike (lirthei dang pawh) ruahsur laia i khalh chhuak a nih chuan mi tan harsatna i siam thei tih hriain i fimkhur hle rawh. I hnunga tlânte mai bakah, i bike hnunga chuang (pillion rider) ngei pawh i bike ke hnungin a phiah/phuh per pha ṭhin a nia.
Lirthei siamtute hian lirtheite hi a ṭha ber tur anga an siam a ni a, kan duh anga kan tihdanglam hian engtin emaw tak mi dang tan hnawksakna a nei ṭhin. Mudguard an lo vuah hian chhan a nei a, mudguard thlawn daih hi dan bawhchhiatna a ni.
Traffic Police pawhin mudguard thlawn phal a nih loh thu hriattirna an lo chhuah tawh ṭhin a, chuti chung chuan mi tam takin an zâwm duh chuang lo. Traffic police-te'n mudguard thlawn vanga lirthei mante pawh an lo nei tawh ṭhin a ni.
Mudguard thlawna tlan hi dan bawhchhiatna a ni tih Traffic Police ngeiin an lo puanzar tawh ṭhin avangin, hemi chungchang hi traffic police lam pawhin bawhzui deuh se a ṭha hle ang. Kei pawhin mudguard awm lo ka hmu fo a nih chuan, kawngpuia rei tak tak awm (duty) ṭhin traffic police-te phei chuan kei aiin an hmu tam fê dawn tih a chiang. Mudguard awm lo an hmuh apiang chu an man kher lo a nih pawhin, fûr chhung na nâ nâ chu vuah ngei turin hrilh zel se, awmzia a nei hle ngei ang.
- Zoramchhana